باياناۋىل اۋدانىندا ورتالىق سۋ مۇناراسى ىستەن شىعىپ, كوشەلەرگە سۋ جايىلدى, دەپ حابارلايدى Egemen.kz «حابار 24» ارناسىنا سىلتەمە جاساپ.
ايماق تۇرعىندارىنىڭ ايتۋىنشا, مۇنداي جاعداي جاز مەزگىلىندە دە بىرنەشە رەت قايتالانعان. ايتا كەتۋ كەرەك, اۋداندى ورتالىق سۋ جۇيەسىمەن قامتاماسىز ەتەتىن ماڭىزدى نىسان ەكى جىل بۇرىن قولدانىسقا بەرىلگەن بولاتىن.
نۇربول, باياناۋىل اۋدانىنىڭ تۇرعىنى:
– بۇل ەندى ءبىرىنشى رەت بولىپ جاتقان جاعداي ەمەس. جازدى كۇندەرى دە بىرنەشە رەت بولعان. ەندى قىستى كۇنى قايتالانىپ وتىر. بۇل دۇرىس ەمەس دەپ ويلايمىن. توقتاماسا, مىنا ۇيلەردىڭ ىشىنە دە سۋ كىرۋ قاۋپى بار. سول سەبەپتى بۇعان ءبىر شارا قولدانسا دەگەن شاكەن ايمانوۆ اتىنداعى تۇرعىنداردىڭ ءوتىنىشى بار.
ال جەرگىلىكتى كوممۋنالدىق سالا وكىلدەرى اپات سالدارىنىڭ جويىلعانىن حابارلادى. وقىس جاعدايعا سۋ تازارتۋ بەكەتىندەگى اۆتوماتتى قۇرىلعىنىڭ ىستەن شىعۋى سەبەپ بولىپتى. سونىڭ كەسىرىنەن تازا سۋ ساقتالاتىن رەزەرۆۋارلار تولىپ كەتكەن.
رۋسلان اۆكۋباەۆ, قىزمەت كورسەتۋ مەكەمەسىنىڭ وكىلى:
– تاڭعى ساعات 5-تەن 8-گە دەيىن ءبىز اپاتتى جاعدايدى تولىق قالپىنا كەلتىردىك. سۋ قۇبىرلارى جەلىسى قازىر قالىپتى جاعدايدا جۇمىس ىستەپ تۇر. تۇرعىنداردان كەلتىرىلگەن قولايسىزدىقتار ءۇشىن كەشىرىم سۇرايمىز.