پرەزيدەنتتىڭ تاپسىرمالارى اياسىندا 3 ۇلتتىق جوبا جانە 5 كەشەندى جوسپار قابىلدانادى. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى اسەت ەرعاليەۆ ايتتى, دەپ حابارلايدى Egemen.kz
«ۇكىمەتتىڭ كەڭەيتىلگەن وتىرىسىندا مەملەكەت باسشىسى ەكونوميكالىق بەلسەندىلىكتى قالپىنا كەلتىرۋ, ينۆەستيتسيالار تارتۋ جانە حالىقتىڭ ءال-اۋقاتىن ارتتىرۋ جونىندە ناقتى مىندەتتەر قويدى. 7 نەگىزگى باعىت ايقىندالدى. بۇل: ەكونوميكالىق بەلسەندىلىكتى قولداۋ, جۇمىس ورىندارىمەن قامتاماسىز ەتۋ, جۇيەلىك جانە سالالىق ساياساتتى قايتا رەتتەۋ, تۇرعىن ۇيگە قولجەتىمدىلىكتى ارتتىرۋ, دەنساۋلىق ساقتاۋ جانە ءبىلىم بەرۋ جۇيەسىن دامىتۋ», دەدى مينيستر.
ونىڭ ايتۋىنشا, جالپى 26 قاڭتاردا وتكەن ۇكىمەتتىڭ كەڭەيتىلگەن وتىرىسىندا پرەزيدەنت 68 تاپسىرما بەرگەن.
«وسى تاپسىرمالاردى ىسكە اسىرۋ اياسىندا 3 زاڭنامالىق اكتى قابىلدانادى. بۇل: دەربەس دەرەكتەر جانە ولاردى قورعاۋ تۋرالى, باسەكەلەستىك ماسەلەلەرى جونىندەگى زاڭدار, سونداي-اق جەر كودەكسىنە مەنگىزىلەتىن وزگەرىستەر. سونىمەن قاتار ءۇش ۇلتتىق جوبانى بەكىتۋ كوزدەلىپ وتىر. بۇل: اگروونەركاسىپ كەشەنىن دامىتۋ, سۋ رەسۋرستارىن باسقارۋ جانە 2021-2025 جىلدارعا ارنالعان «جاسىل قازاقستان» جوبالارى. بۇعان قوسا, 5 كەشەندى جوسپار ازىرلەنەدى. بۇل: شەكارالارداعى زاڭسىز ساۋدا اينالىمىنا قارسى ءىس-قيمىل, كەلىسىمشارتتارمەن رەتتەلەتىن ساتىپ الۋلار ارقىلى وندىرىستەردى قۇرۋ جانە كەڭەيتۋ, 2025 جىلعا دەيىنگى ەكىباستۇز قالاسىن دامىتۋ, ازاماتتاردى ۆاتسينالاۋ جانە مەكتەپكە دەيىنگى ءبىلىم بەرۋدى دامىتۋ بويىنشا شارالار», دەدى اسەت ەرعاليەۆ.