ءىىم «102» ءموبيلدى قوسىمشاسىن ىسكە قوستى. بۇل تۋرالى ۆەدومستۆو باسشىسى ەرلان تۇرعىمباەۆ ءوزىنىڭ Facebook پاراقشاسىندا جازدى, دەپ حابارلايدى Egemen.kz
«مينيسترلىك الدىندا تۇرعان مىندەتتەردىڭ ءبىرى – زاماناۋي تەحنولوگيالىق, ازاماتتاردىڭ سەنىمىنە يە ىشكى ىستەر ورگاندارى جۇيەسىن قۇرۋ. بۇگىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا ءبىز رەسمي تۇردە حالىققا ىڭعايلى جاڭا سەرۆيس – «102» ءموبيلدى قوسىمشاسىن ىسكە قوسامىز. اقپاراتتىق تەحنولوگيالاردىڭ قازىرگى دامۋ دەڭگەيىندە كەز كەلگەن اقپارات تەز تارالادى. پوليتسيانىڭ ازاماتتاردىڭ حابارلامالارىنا دەن قويۋى دا وسىنداي تەز بولعانىن قالايمىز. كۇن سايىن بۇكىل رەسپۋبليكا بويىنشا پوليتسيانىڭ جەدەل باسقارۋ ورتالىقتارىنىڭ وپەراتورلارى 102-ارناعا كەلىپ تۇسكەن 10 مىڭعا جۋىق حابارلاماعا جاۋاپ بەرەدى. سونىمەن بىرگە, وقيعا تۋرالى اقپارات پوليتسياعا ەمەس, الەۋمەتتىك جەلىلەرگە جىبەرىلەتىن جاعدايلار دا كەزدەسەدى. ادەتتە, ءتۇرلى وقيعالاردىڭ كۋاگەرلەرى فوتوسۋرەتتەردى نەمەسە ۆيدەولاردى ءوز پاراقشالارىنا سالادى نەمەسە تانىمال پابليكتەرگە جىبەرەدى. بۇل وقيعالاردى ءبىزدىڭ ماماندار الەۋمەتتىك جەلىلەردى باقىلاۋ كەزىندە انىقتايدى. بۇل رەتتە پوليتسيا قىزمەتكەرلەرى قۇقىق بۇزۋشىلىقتىڭ جولىن كەسۋ نەمەسە قىلمىستى ء«ىزىن سۋىتپاي» اشۋ ءۇشىن پايدالانۋعا قاجەت بولاتىن قىمبات ۋاقىتتى جوعالادى», دەپ جازدى مينيستر.
سونىمەن بىرگە, مينيستر ءموبيلدى قوسىمشانى پايدالانۋدىڭ ارتىقشىلىقتارى تۋرالى ايتتى. بۇل – وقيعالار تۋرالى قىسقا حابارلامالار مەن فوتو, ۆيدەولار جىبەرۋ مۇمكىندىگى جانە وقيعا ورنىنان تىكەلەي بەينەقوڭىراۋ شالۋعا بولادى, بۇل جبو وپەراتورىنا نە بولىپ جاتقانىن كورۋگە جانە دەرەۋ ءتيىستى شارالار قابىلداۋعا مۇمكىندىك بەرەدى.
«قوسىمشا ارقىلى سىبايلاس جەمقورلىق, پوليتسيا قىزمەتكەرى تاراپىنان جاسالعان بوپسالاۋ فاكتىسىنە تاپ بولعان جاعدايدا, ءىىم-ءنىڭ وزىندىك قاۋىپسىزدىك قىزمەتىنە دە جۇگىنۋگە بولادى. قوسىمشانىڭ كومەگىمەن جانە بىرلەسكەن كۇش-جىگەرىمىزدىڭ ارقاسىندا پوليتسيانىڭ جەدەل ارەكەت ەتۋى, قىلمىستاردى اشۋداعى تيىمدىلىك ارتادى جانە كوپتەگەن قۇقىق بۇزۋشىلىقتاردىڭ الدىن الۋعا بولادى دەپ كۇتەمىز. ەگەر وزىڭىزگە نەمەسە وزگەلەرگە قاۋىپ ءتونىپ تۇر دەپ ويلاساڭىز, ماس ادامنىڭ رولگە وتىرعانىن كورسەڭىز, زورلىق-زومبىلىقتىڭ كۋاسى بولساڭىز, جانۋارلارعا قاتىگەزدىك جاسالىپ جاتقانىن كورسەڭىز, كۇدىكتى ادامدى بايقاساڭىز, دەرەۋ حابارلاڭىز. تەك بىرلەسكەن كۇش-جىگەرىمىزبەن عانا قۇقىقبۇزۋشىلىققا توزبەيتىن جانە قاۋىپسىز قوعام قۇرامىز», دەيدى ىشكى ىستەر ءمينيسترى.
قوسىمشانى Android جۇيەسىندەگى سمارتفوندارعا ارنالعان Play Market-تەن جانە IOS جۇيەسىندەگى سمارتفوندارعا ارنالعان App Store-دان جۇكتەۋگە بولادى.