وسكەمەندە وتكەن حالىقارالىق جارىسقا شەتەلدەن ەشكىم كەلمەدى

اشىلۋ سالتاناتىندا حابارلانعانداي, تۋرنيرگە الماتى, سولتۇستىك قازاقستان, پاۆلودار, قاراعاندى, شىعىس قازاقستان وبلىستارى مەن نۇر-سۇلتان قالاسىنىڭ كوماندالارى قاتىستى.

كەڭەيتىلگەن جەڭىل اتلەتيكا كەشەنىندە وتكەن جارىسقا ادەتتەگىدەن باسقا ەكى سپورت ءتۇرى قوسىلدى. تىزە كەتسەك; ەرلەردىڭ كەدەرگىلەر ارقىلى 110 مەتر قاشىققا جۇگىرۋى, سەرگىتۋ ەستافەتاسى. ال بۇرىننان ءوتىپ كەلە جاتقان جەڭىل اتلەتيكا تۇرلەرى; ءۇش قارعىپ سەكىرۋ, بيىكتىككە سەكىرۋ, سىرىقپەن سەكىرۋ, ارالاس ەستافەتا, 400, 200, 800, 1500 جانە 60 مەتر قاشىققا جۇگىرۋ.

حالىقارالىق دەگەن اتى بار جارىسقا ولگا رىپاكوۆانىڭ ءوزى دە قاتىستى.

– جارىس جولىنا شىقپاعانىما كوپ ۋاقىت بولدى. بۇگىن جارىس اتموسفەراسىن سەزىنەيىن دەپ قاتىستىم. ماقساتىم جەڭىس ەمەس. ءوزىم ءۇشىن وليمپياداعا دايىندىق بولدى. بىلتىر سپورت كەشەنىمىزگە كۇردەلى جوندەۋ جۇرگىزىلگەندىكتەن, تۋرنير وتپەگەن ەدى. بيىل ەلدەگى جاعدايعا قاراماستان رۇقسات ەتىلگەنىنە قۋانىشتىمىن. وكىنىشتىسى, كورونوۆيرۋس ينفەكتسياسىنا بايلانىستى شەتەلدەن سپورتشىلار كەلە المادى, – دەدى سپورتشى.

جارىسقا قاتىسقان 66 سپورتشىنىڭ ىشىنەن بابى مەن باعى شاپقاندارى تۇعىرعا تۇرىپ, ماراپاتتالىپ جاتتى. جارىس جولىنا شىققانداردىڭ 35-ءى ەرلەر بولسا, 31-ءى ايەلدەر ەدى. جۇلدەنىڭ نەگىزگى بولىگى قاراعاندىلىق سپورتشىلاردىڭ قانجىعاسىنا بايلاندى.