وسكەمەندە بەس قاباتتى تۇرعىن ءۇي وتقا وراندى

شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, 29 قاڭتاردا ساعات 02:36-دا قابانباي باتىر كوشەسىندە ورنالاسقان بەس قاباتتى تۇرعىن ءۇيدىڭ ءبىرىنشى قاباتىنداعى پاتەردە ءورت شىققان. ءورت سوندىرۋشىلەر كەلىپ جەتكەندە جەكە زاتتار مەن جيھازدى جالىن شارپىپ جاتقان. قۇتقارۋشىلار تۇرعىنداردى ەۆاكۋاتسيالاۋعا كىرىسكەن.

«ارنايى ساتىنىڭ كومەگىمەن 9 ادام قۇتقارىلدى. سونداي-اق 6 ادام, ونىڭ ىشىندە 5 بالا سىرتقا شىعارىلدى. ءورت شىققان پاتەردىڭ 67 جاستاعى يەسىنىڭ دەنەسىن كۇيىك شالعان. قازىر ەر ادام اۋرۋحاناعا جاتقىزىلدى. ال ونىڭ 74 جاستاعى كورشىسىنە ءيىس تيگەن. دارىگەرلەر تەكسەرۋىنەن كەيىن ايەل ۇيىنە جىبەرىلدى», دەپ حابارلادى ۆەدومستۆو وكىلدەرى.

جالپى 15 شارشى مەتر اۋماقتى شارپىعان ءتىلسىز جاۋ ساعات 03:31-دە ءسوندىرىلدى. ونى سوندىرۋگە جەكە قۇرامنان 19 مامانى مەن 5 تەحنيكاسى جۇمىلدىرىلدى.

قازىرگى مالىمەت بويىنشا ءورتتىڭ شىعۋىنا – ءورت قاۋىپسىزدىگى تالاپتارىن ساقتاماۋدان نەمەسە بولمەدە تەمەكى شەگۋ سەبەپشى بولۋى مۇمكىن.