بيىل اتىراۋ وبلىسىندا 1 ملرد تەكشە مەتر گاز وڭدەيتىن زاۋىتتىڭ قۇرىلىسى باستالادى, دەپ حابارلايدى Egemen.kz.
ماقات اۋدانىنىڭ اكىمى شاكىر كەيكيننىڭ ايتۋىنشا, زاۋىت قۇرىلىسىنا 1 ملرد 250 ملن دوللار ينۆەستيتسيا سالۋ جوسپارلانىپ وتىر.
«ەسكەنە كەنتىنە تاياۋ ماڭدا جىلىنا 1 ملرد تەكشە مەتر گازدى كەشەندى وڭدەۋ زاۋىتىنىڭ قۇرىلىسىن جۇرگىزۋ جوسپارلانىپ وتىر. جوبانىڭ قۇنى 1 ملرد 250 ملن دوللاردى قۇرايدى. كاسپي تەڭىزىندەگى «قاشاعان» كەن ورنىنىڭ گازىن وڭدەيتىن نىساننىڭ قۇرىلىسىن «GPC Investment» جشس جۇرگىزەدى. زاۋىت قۇرىلىسى بيىل باستالىپ, 2023 جىلى اياقتالادى. قۇرىلىستى جۇرگىزۋ كەزىندە 3000-عا جۋىق ادام جۇمىسپەن قامتىلادى. ال, زاۋىت پايدالانۋعا بەرىلگەن سوڭ 450 ادام تۇراقتى جۇمىسقا ورنالاسادى» دەيدى شاكىر كەيكين.