قازىنالى وڭىردە قاۋىپتى ۆيرۋسقا قارسى ۆاكتسينا سالۋعا ازىرلىك ءجۇرىپ جاتىر. وسىعان وراي قاڭتاردىڭ سوڭىندا «سپۋتنيك V» ۆاكتسيناسىنىڭ 1 مىڭ دوزاسى اكەلىنەدى. وبلىستىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنە سۇيەنسەك, قازىر 2 500 دوزانى ساقتاۋعا ارنالعان 180 ليترلىك مۇزداتقىش بار.
– ەندى «تەڭىزشەۆرويل» جشس-نىڭ دەمەۋشىلىگىمەن وبلىستىڭ مەديتسينا مەكەمەلەرىنە ۆاكتسينانى ساقتايتىن 700 ليترلىك مۇزداتقىش جەتكىزىلگەلى كۇتىلىپ وتىر. بۇعان قوسا ۆاكتسينانى اۋداندارعا تاراتۋ ءۇشىن تاعى 60 ليترىك 2 مۇزداتقىش, 15 مەملەكەتتىك ەمحاناعا 110 ليترلىك 15 مۇزداتقىش الىنادى, – دەپ حابارلادى باسقارمانىڭ ءباسپاسوز قىزمەتى. – ال جەكەمەنشىك مەديتسينالىق مەكەمەلەر مۇزداتقىشتى ءوز قاراجاتى ەسەبىنەن الاتىن بولادى. ۆاكتسينانى ساقتاۋ جاۋاپكەرشىلىگى اتالعان مەكەمەلەردىڭ وزدەرىنە جۇكتەلىپ وتىر.
دەنساۋلىق ساقتاۋ مينيسترلىگى بەكىتكەن الگوريتمگە سايكەس, تۇرعىندارعا ەرىكتى تۇردە ەكپە سالۋ ءۇشىن ۆاكتسيناعا جاۋاپتى مەديتسينا ماماندارىن كاسىبي وقۋدان وتكىزۋ كوزدەلىپتى. سودان سوڭ اقپان ايىندا ۆاكتسينا سالۋ باستالادى. وسى ماقساتتا باستاپقى مەديتسينالىق-سانيتارلىق كومەك كورسەتەتىن 22 ۇيىمدا ارنايى ورىندار دايىندالدى. ونىڭ ىشىندە 15 مەملەكەتتىك مەكەمە بار. قالعانى – جەكەمەنشىك مەديتسينالىق مەكەمەلەر.
ەمحانالار ۆاكتسينا سالۋدى تۇرعىنداردىڭ سانىنا قاراي ەرىكتى تۇردە قولعا الادى. الگوريتمگە سايكەس, ەكپەنى ءبىرىنشى كەزەكتە كوروناۆيرۋس ينفەكتسياسىن جۇقتىرعان ناۋقاستارعا كومەك كورسەتەتىن مەديتسينا ماماندارىنا سالۋ جوسپارلانۋدا.
اتىراۋ وبلىسى