الماتى وبلىسىندا ەپيدەميالىق جاعداي وڭالماي تۇر

بۇگىندە وبلىستىڭ مەديتسينا مەكەمەلەرىندە 550 ناۋقاس ەم قابىلداۋدا. ونىڭ ىشىندە 33 ناۋقاستىڭ جاعدايى اۋىر ەكەن. دەرت بەلگىسى انىقتالعان تاعى 369 ادام ۇيدەن ەم الىپ جاتىر. جالپى, ىندەت وشاعىنى نەگىزىنەن ادام كوپ شوعىرلانعان اۋماقتاردا بايقالىپ وتىر. مىسالى, ءبىر تاۋلىك ارالىعىندا وبلىس ورتالىعى تالدىقورعان قالاسىندا 28 ادامنان ۆيرۋس انىقتالسا, الماتى قالاسىنا جاقىن ورىن تەپكەن تالعار اۋدانىندا 22 ناۋقاس دارگەرلىك كومەككە جۇگىنگەن. وسى تىزىمدە ءبىر كۇندە 8 ناۋقاس انىقتالعان ىلە اۋدانى جانە التى ادام اۋىرعان ەڭبەكشىقازاق اۋدانى بار. ايماقتىڭ باسقا اۋدان, قالالارىنداعى كورسەتكىش تە ءماز ەمەس, ءبىر تاۋلىكتە 4-2 ادامعا دەيىن ىندەت جۇقتىرۋشىلار شىعىپ جاتىر.

وكىنىشكە قاراي, كارانتين شەكتەۋى مەن ساقتىق شاراسىنىڭ مەيلىنشە ساقتالۋىنا قاراماستان بالالاردىڭ ىندەت جۇقتىرۋ دەرەگى دە ءوسىپ وتىر.ونىڭ ىشىندە كەزەكشى سىنىپتا وقيتىن وقۋشى مەن قاشىقتان ءبىلىم الىپ وتىرعان بالالار دا بار. ماسەلەن, وقۋ جىلىنىڭ باسىنان بەرى 320 جاسوسپىرىمنەن كورونوۆيرۋس انىقتالعان. اۋىرعان 20 بالا كەزەكشى سىنىپتا وقىعان بولسا, قالعان 300 وقۋشى قاشىقتان وقىعانداردىڭ اراسىنان شىققان ەكەن.

ايتپاقشى, وبلىس مەكتەپتەرىنىڭ كەزەكشى سىنىپتارىنداعى كارانتين تالابىنىڭ ساقتالۋىن تەكسەرگەن ءتيىستى ورگاندار ءبىلىم بەرۋ مەكەمەلەرىنەن ورەسكەل قاتەلىكتەر تاۋىپتى. ەپيدەمياعا قارسى كۇرەس قىزمەتىنىڭ ماماندارى ايماقتاعى 765 مەكتەپتە وقيتىن 400 مىڭ بالانىڭ دەنساۋلىعىنا الاڭداۋشىلىق ءبىلدىرىپ وتىر. ال سانيتارلىق تالاپتى بۇزعان 22 ءبىلىم بەرۋ مەكەمەسىنە 1 833 470 تەڭگە ايپپۇل سالىنىپتى.