ءۇندىستاننىڭ Bharat Biotech كومپانياسى يممۋندىق جۇيەسى ءالسىز, اللەرگياسى بار, قان اۋرۋىمەن اۋىراتىن ازاماتتارعا كوروناۆيرۋسكە قارسى دايىنداپ جاتقان ۆاكتسيناسىن سالدىرۋدان باس تارتقانى دۇرىس دەگەن مالىمدەمە جاسادى.
ۆاكتسينا سالدىرعان ادامدا جۇرەك سوعىسى, قىشىما, باس اينالۋ سياقتى رەاكتسيالار شاقىرۋى مۇمكىن. بۇل مالىمدەمە ءۇندىستان ۇكىمەتى «جاھاندىق ۆاكتسينالاۋدىڭ ۇلكەن باعدارلاماسى» دەپ اتالاتىن جوسپاردى تانىستىرعاننان كەيىن جاسالدى.
جالپى, ءۇندىستان ۇكىمەتى ەكى ۆاكتسينا ەگىلەتىنىن حابارلادى. ءبىرىنشىسى جوعارىدا اتالعان جەرگىلىكتى كومپانيا ءونىمى بولسا, ەكىنشىسى – Oxford ۋنيۆەرسيتەتى مەن ۇلىبريتانيانىڭ بىرلەسكەن جوباسى, AstraZeneca كومپانياسى جاساعان ۆاكتسينا.
ال ۆاكتسينا جاساپ وتىرعان Bharat Biotech كومپانياسى ۆاكتسينا قۇرامىنا قاتىستى اقپاراتپەن بولىسكەن جوق. ولار ۆاكتسينا ەگۋگە قاتىستى نۇسقاۋلىقتىڭ بولاتىنىن عانا حابارلاپ وتىر. وسى رەتتە ءۇندىستان اۋرۋحانالارى شەتەلدىك ۆاكتسيناعا باسىمدىق بەرىپ وتىرعانىن ايتا كەتكەن ءجون. وتاندىق ءونىمدى تۇتىنۋشى مەديتسينالىق ورتالىقتار سانى تىم از. ءتىپتى نيۋ-دەلي اۋرۋحانالارىنداعى دارىگەرلەر Bharat Biotech ۆاكتسيناسىن قولدانۋدان قورقاتىنىن جاسىرمادى.
ۆاكتسيناتسيالاۋعا جازىلعان مىڭداعان مەديتسينا قىزمەتكەرىنىڭ وننان ءبىرى وتكەن اپتادا ەكپە جاساتىپ ۇلگەردى.
ءبىر اپتا بۇرىن جاپپاي ەگۋ جاريالاعان ءۇندىستاندا بۇگىندە 381 305 ادام ۆاكتسينا ەكتىرگەن. ءۇندىستان دەنساۋلىق ساقتاۋ مينيسترلىگى 2021 جىلدىڭ شىلدەسىنە قاراي 300 ملن ادامعا ۆاكتسينا سالىپ شىعامىز دەگەن جوسپارىن جاريالادى.
العاشقى لەككە كىرەتىن دارىگەر, مەيىرگەر, ۆيرۋسپەن كۇرەستە العى شەپتە قىزمەت ەتەتىندەردى ەسەپتەگەندە 30 ملن-عا جۋىق ادام ۆاكتسينا ەكتىرەدى. ءۇندىستان ناۋقاستار سانى بويىنشا اقش-تان كەيىنگى ورىندا. سوڭعى اقپارات بويىنشا بۇل ەلدە 10,5 ملن ازامات ۆيرۋس جۇقتىرعان.