سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا قازاقستان مەن گرۋزيا اراسىنداعى جۇك تاسىمالىنا رۇقسات بەرۋ جۇيەسىن ەنگىزۋ باستى تاقىرىپ بولدى, دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.
وعان ەلىمىزدىڭ ۇلتتىق مۇددەلەرىن ساقتاۋ, سونداي-اق قازاقستان مەن گرۋزين باعىتىندا جۇمىس ىستەيتىن وتاندىق تاسىمالداۋشىلار مەن وسى ەكى ەل ارقىلى ترانزيتتىك جۇك تاسىمالىن جۇزەگە اسىرۋشىلاردىڭ جاعدايىن جاقسارتۋ قاجەتتىگى سەبەپ بولىپ وتىر.
قازىرگى كەزدە تاسىمالداۋ رۇقسات ەتىلمەسە دە جۇزەگە اسىپ جاتقانىن اتاپ وتكەن ءجون. ول گرۋزيا تاراپىنا, گرۋزيادا تىركەلگەن شەتەلدىك كومپانيالارعا نارىقتىڭ وسى باعىتىندا ۇستەمدىك ەتۋىنە مۇمكىندىك بەرىپ وتىر. مىسالى, 2019 جىلى ولار جالپى نارىقتىڭ 69%-نا يە بولدى.
رۇقسات بەرۋ جۇمىستارىنىڭ قاعيداسى وزگەرگەننەن كەيىن حالىقارالىق تاسىمالداۋدا تەپە-تەڭدىك ورناتۋ مۇمكىندىگى تۋىندايدى, قازاقستاندىق تاسىمالداۋشىلاردىڭ ۇلەسىن ۇلعايتۋعا, سونداي-اق ولاردىڭ باسەكەگە قابىلەتتىلىگىن ارتتىرۋعا جول اشىلادى.
«2007 جىلعى 6 ناۋرىزداعى قازاقستان رەسپۋبليكاسىنىڭ ۇكىمەتى مەن گرۋزيا ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىندا ءبىر رەيسكە بارۋعا قۇقىق بەرەتىن جۇكتەردى تاسىمالداۋدىڭ ارقايسىسىنا جەكە رۇقسات بەرۋ قاجەت ەكەندىگى كورسەتىلگەن. سونداي-اق جوبادا تاراپتار جىل سايىن ءبىر-بىرىنە تاۋارلاردى تاسىمالداۋعا ارنالعان كەلىسىمنىڭ قۇجاتتارىن جىبەرەتىنى ايتىلعان. وندا ارنايى بلانكىلەرگە ءمور باسىلىپ, رۇقسات بەرگەن قۇزىرەتتى ورگاننىڭ قولى قويىلۋى كەرەك.
ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتى زاڭ جوباسىن پالاتانىڭ قاراۋىنا ەنگىزدى.