الىستان قاراساڭ, ءاپ-ادەمى ۇيلەر. سەمەيدەگى «قاراعايلى» ىقشاماۋدانىنداعى جاڭا كوپقاباتتى ۇيلەردى ايتامىن. وكىنىشكە وراي, ءبىرىنىڭ قابىرعاسى قاقىراپ, ەندى ءبىرىنىڭ توبەسىنەن سۋ اعىپ جاتىر.
6 قاڭتاردىڭ تۇنىندە №15 ءۇيدىڭ قۇبىرى جارىلىپ, جوعارىدان تومەنگە اققان سۋ تۇرعىنداردى اۋرە-سارساڭعا تۇسىرگەن.
— كىلتىن بىلتىر 1 جەلتوقسان – تۇڭعىش پرەزيدەنت كۇنىنە وراي, وبلىس اكىمى دانيال احمەتوۆ ءوزى تابىستاعان ەدى. كۇيەۋىمە بالالار ءۇيىنىڭ تاربيەلەنۋشىسى رەتىندە بەرىلگەن بولاتىن. جالعا بەرىلەتىن پاتەر بولسا دا, شىن قۋاندىق. 6 قاڭتار كۇنى كەشكىسىن قوناقتا بولعان ەدىك. تومەنگى قاباتتاعى كورشىلەر بىرىنەن سوڭ ءبىرى حابارلاسىپ, ءبىزدىڭ پاتەردەن تومەنگە سۋ كەتىپ جاتقانىن ايتتى. وقيعا وسى ءۇيدى سالعان «ازيا» فيرماسىنا دا جەتىپتى. فيرمانىڭ تەحنيكالىق ديرەكتورى قوڭىراۋ شالىپ, ب ۇلىنگەن جيھازدى, زاتتاردى, ەدەن توسەنىشتەرىن جاڭارتىپ بەرۋگە ۋادە بەردى. ءدال قازىر باراتىن جەرىمىز جوق, كورشىنىڭ ۇيىندە ءجۇرمىز, – دەيدى ءسابيىن قولىنا ۇستاعان زارينا.
سونىمەن قاتار, ءۇيدىڭ باتارەيلەرى دە قان جىلى. ايازدى كۇندەرى ءۇي ءىشى اڭىراپ كەتەتىن كورىنەدى. اڭىراماعاندا, ۋاقىت وتە قابىرعالارى جارىلا باستاعان. «ساپاسىز ۇيگە ساپالى جوندەۋ كەرەك» دەسەدى تۇرعىندار ءبىر اۋىزدان. ءۇيدى سالعان فيرما ءۇش جىل كەپىل بەرگەنمەن, كەمشىلىكتەر قاشان, قالاي جويىلارى بەلگىسىز.