جالپىقالالىق ءباسپاسوز-ورتالىعى الاڭىندا كەزەكتى ءباسپاسوز-كونفەرەنتسيا وتكىزگەن الماتى قالاسى ايماقتىق سايلاۋ كوميسسياسىنىڭ ءتورايىمى جاننا اسانوۆا سايلاۋ ۋچاسكەلەرىنىڭ دايىندىعى مەن جۇمىس ىستەۋ ءتارتىبى تۋرالى ايتىپ بەردى, دەپ حابارلايدى Egemen.kz
بۇگىن 6.00-دە قالا بويىنشا بارلىق سايلاۋ ۋچاسكەلەرى اشىلىپ, 7.00-دە ءوز جۇمىستارىن باستادى. الماتىدا جالپى 581 سايلاۋ ۋچاسكەسى بار. قازىرگى ۋاقىتقا دەيىن 4 مىڭنان استام باقىلاۋشى تىركەلىپ ۇلگەردى.
سونىمەن قاتار, الماتى ق. بويىنشا ايماقتىق سايلاۋ كوميسسيانىڭ توراعاسى ازاماتتاردىڭ ۇيدەن داۋىس بەرۋ قۇقىعىن پايدالانۋ ءۇشىن ساعات 12.00-گە دەيىن ءوز سايلاۋ ۋچاسكەسىنە ءوتىنىش بەرىپ ۇلگەرۋ كەرەكتىگىن ەسكەرتتى. ساعات 12.00-دەن كەيىن سايلاۋ كوميسسياسى ءوتىنىش بەرگەن ازاماتتاردىڭ مەكەن-جايىنا باراتىن بولادى.
«جالپى سايلاۋ ۋچاسكەلەرىنىڭ اشىلۋىندا كەلىپ تۇسكەن ءوتىنىش كوپ بولدى. بىراق ول سۇراقتار رەتكە كەلتىرىلدى, قازىرگى كەزدە بارلىق ماسەلە شەشىلدى. نەگىزىنەن سۇراقتار باقىلاۋشىلاردىڭ قۇجاتتارى جونىندە بولدى. قازىر باقىلاۋشىلاردىڭ بارلىعى ءوز ۋچاسكەلەرىنە جىبەرىلىپ, ءوز جۇمىستارىن جالعاستىرۋدا», - دەدى ج. اسانوۆا.
ج.اسانوۆا پتر-تەست تاپسىرىلعان كلينيكالار تىزىمىندە بولماعان كەيبىر باقىلاۋشىلاردىڭ سايلاۋ ۋچاسكەلەرىنە جىبەرىلمەۋى تۋرالى جاعدايدى ءتۇسىندىرىپ بەردى.
«سايلاۋ ۋچاسكەلەرىندە باقىلاۋشىلارعا قاتىستى بولعان ماسەلە شەشىمىن تاپتى. باقىلاۋشىلار ۋچاسكەگە جىبەرىلدى. بۇل جاعداي قالالىق قوعامدىق دەنساۋلىق باسقارماسىنىڭ وتكەن دەيىنگى وتكەن بريفينگىنە قاتىستى دەپ ولايمىن. بىراق, جالپى ايتقاندا لابوراتوريالارلاردى تاڭداۋعا دەگەن تالابىمىز جوق. ويتكەنى ول ءبىزدىڭ قۇزىرىمىزعا جاتپايدى. سوندىقتان ءبىز قالالىق باس سانيتارلىق دارىگەردىڭ قاۋلىسىنا سۇيەنىپ, تەك قانا پتر-تەستتىڭ بولۋىن عانا تالاپ ەتەمىز. سول ءۇشىن بارلىق باقىلاۋشىلاردىڭ تەستتى قايدا تاپسىرعانىنا قاراماستان سايلاۋ ۋچاسكەلەرىنە جىبەرىلدى», دەپ اتاپ ءوتتى ج. اسانوۆا.