سەناتور جول قۇرىلىسىنىڭ ساپاسىن تەكسەردى

ساپار بارىسىندا ول اۋدان ءماسليحاتىنىڭ جانە جەرگىلىكتى اتقارۋشى ورگانداردىڭ, سونداي-اق پروكۋراتۋرا وكىلدەرىمەن كەزدەستى. سونىمەن بىرگە جىبەك جولى اۋىلى ماڭىنان وتەتىن جولدى قايتا قالپىنا كەلتىرۋ جۇمىستارىمەن تانىستى.

پروكۋراتۋرا وكىلدەرىمەن كەزدەسۋدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق پروتسەستە ازاماتتاردىڭ قۇقىقتارىن قورعاۋدى جانە سىبايلاس جەمقورلىققا قارسى ءىس-قيمىلدى كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭنىڭ جاڭا نورمالارىن تالقىلادى.

ودان بولەك, كامەلەت جاسىنا تولماعاندارعا قارسى قىلمىستىق ارەكەتتەر ءۇشىن جاۋاپكەرشىلىكتى كۇشەيتۋ شارالارى, سىبايلاس جەمقورلىققا قارسى زاڭنامالار جانە باسقا دا وزەكتى ماسەلەلەر بويىنشا ءسوز قوزعادى.

سەناتور ۆلاديمير ۆولكوۆ قازاقستاندىقتار تاراپىنان كوپتەگەن وتىنىشتەر كەلىپ تۇسەتىنىن, ونداعى ماسەلەلەردىڭ بارلىعى دەپۋتاتتىق كورپۋستىڭ باستى نازارىندا ەكەنىن جەتكىزدى.

«ماعان قاراساي اۋدانىنىڭ تۇرعىندارىنان جەر, جول-كولىك ينفراقۇرىلىمىن دامىتۋ جانە باسقا دا ماسەلەلەر بويىنشا وتىنىشتەر كەلىپ تۇسۋدە. جولاۋشىلار پويىزى مەن اۆتوبۋس سوقتىعىسقان بۇرىنعى شامالعان ستانساسى ماڭىندا جاياۋ جۇرگىنشىلەرگە ارنالعان كوپىر سالۋ ماسەلەسى سەنات قابىرعاسىندا دا تالقىلاندى. ول كوپىر وتكەن جىلى اشىلعانىن جاقسى بىلەسىزدەر. قازىر جىبەك جولى اۋىلىندا اينالما جولدى قالپىنا كەلتىرۋ جۇمىستارى جۇرگىزىلىپ جاتىر. بۇل جول تەمىرجول وتكەلىنەن وتەتىن كولىكتەردى ايتارلىقتاي ازايتادى. تۇرعىنداردى الاڭداتقان بارلىق ماسەلە نازاردان تىس قالمايدى. الداعى ۋاقىتتا ولار بويىنشا جەرگىلىكتى اكىمدىكتەرمەن بىرلەسىپ جۇمىس ىستەيمىز», دەدى سەناتور.

سەنات دەپۋتاتى اۋداندىق جولاۋشىلار كولىگى جانە اۆتوموبيل جولدارى ءبولىمىنىڭ وكىلدەرىمەن كەزدەسىپ, ساپالى جول قۇرىلىسى ءۇشىن قاجەتتى تەحنيكامەن جانە قۇرىلىس ماتەريالدارىمەن جابدىقتاۋ ماسەلەسىن تالقىلادى.