تامىرى تەرەڭ تاريحىمىز ارقىلى رۋحتى كوتەرىپ, ۇرپاقتى مەملەكەتشىلدىككە, وتانشىلدىققا ۇندەۋى كەرەك. «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى قر پرەزيدەنتى قاسىم-جومارت توقاەۆتىڭ «تاۋەلسىزدىك بارىنەن قىمبات» اتتى ماقالاسىنا قاتىستى وسىنداي پىكىر ءبىلدىردى, دەپ حابارلايدى Egemen.kz قازاقپاراتقا سىلتەمە جاساپ.
«مەملەكەت باسشىسى بۇل ماقالاسىندا كوروناۆيرۋس ىندەتىنەن كەيىن قالىپتى ومىرگە قايتا ورالعان كەزدە ءبىز ءۇشىن ەڭ باستى قۇندىلىق, ومىرىمىزگە, تىرشىلىگىمىزگە ءمان بەرەتىن نارسە – تاۋەلسىزدىك ەكەنىن, تاۋەلسىزدىكتەن قىمبات, تاۋەلسىزدىكتەن قاستەرلى ەشتەڭە جوق ەكەندىگىن ايتقان. بۇل - وتە دۇرىس جانە دەر كەزىندە ايتىلعان ماسەلە», دەيدى «ۇلتتىق اۋدارما بيۋروسى» قوعامدىق قورىنىڭ اتقارۋشى ديرەكتورى راۋان كەنجەحان ۇلى.
مەملەكەت باسشىسى ماقالاسىندا ەگەمەندىگىمىزدىڭ ماڭگىلىك ۇشتاعانى – جەرىمىز, ءتىلىمىز جانە بىرلىگىمىز ەكەنىن ءسوز ەتەدى.
«بۇل ۇشەۋى دە – ماڭىزدى, نەگىزگى ماسەلە. پرەزيدەنت جەردىڭ بولىنبەيتىندىگىن, شەتەلگە جالعا بەرىلمەيتىنىن جانە ساتىلمايتىنىن ايتتى. ول ماقالادا ءبىز ءۇشىن مەملەكەت بولىپ ساقتالۋىپ قالۋىمىزدىڭ جانە تاۋەلسىزدىگىمىزدىڭ باستى العىشارتى – جەر ەكەندىگىن, ءبارىمىزدى بىرىكتىرىپ, ومىرىمىزگە ءمان بەرەتىن نەگىزگى قۇندىلىق – ءتىل ەكەندىگىن, بىرگە ەڭبەك ەتۋ ءۇشىن بىرلىكتىڭ قاجەت ەكەندىگىن وتە جاقسى تۇسىندىرگەن. سونداي-اق, ونىڭ تاريحي سانا تۋرالى ايتقانى مەنىڭ كوڭىلىمنەن شىقتى. راسىمەن, ءبىز تاريحىمىزدا بولعان قايعى-قاسىرەتتى ازا تۇتۋعا كوبىرەك كوڭىل بولەتىن سياقتىمىز, ول دا دۇرىس شىعار, بىراق ەڭ باستىسى – ول قايعى-قاسىرەت پەن قيىندىقتار ءبىزدىڭ قازىرگى ومىرىمىزگە ءمان-ماعىنا بەرۋى ءتيىس. سول ارقىلى رۋحتى كوتەرىپ, ۇرپاقتى مەملەكەتشىلدىككە, وتانشىلدىققا ۇندەۋ, تاربيەلەۋ ماڭىزدى. ونىڭ جۇزەگە اسۋى ءۇشىن ماماندار, تاريحشىلار, كينوشىلار جانە باسقالارى ناقتى نە ىستەي الاتىندىعى اتاپ كورسەتىلگەن. بۇل دا وتە ورىندى, دۇرىس ايتىلعان», دەيدى ول.
سونداي-اق, ول مەملەكەت باسشىسىنىڭ اۋدارما سالاسىنا قاتىستى ايتقان ويىنا توقتالدى.
«پرەزيدەنت بالالار ادەبيەتى, تاريحىمىز شەت تىلدەرگە اۋدارىلۋى قاجەتتىگىن ايتتى. بۇل – وتە ماڭىزدى ءارى قاجەت دۇنيە. ءوزىم وسى سالادا جۇرگەندىكتەن بۇل ماسەلەنىڭ قانشالىقتى وزەكتى ەكەنىن جاقسى تۇسىنەمىن. ازامات رەتىندە دە, مامان رەتىندە دە مەملەكەت باسشىسىنىڭ ويىن قولداپ, جۇزەگە اسىرۋعا اتسالىسامىز», دەيدى ول.
ەسكە سالا كەتسەك, بۇگىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «Egemen Qazaqstan» گازەتىندە «تاۋەلسىزدىك بارىنەن قىمبات» اتتى ماقالا جاريالادى.