ەلوردا اكىمى التاي كولگىنوۆ «جاستار» اۋدانىنداعى تازارتۋ قوندىرعىسىنىڭ قۇرىلىسىمەن ارنايى بارىپ تانىستى, دەپ حابارلايدى Egemen.kz قالا اكىمدىگىنە سىلتەمە جاساپ.
«قۇرىلىس جۇرگىزىپ, ينجەنەرلىك جەلىنى تارتۋ بارىسىندا جاۋىن-شاشىن كارىزدەرى مەن كوللەكتورلاردى دا ۇمىتپاعان ءجون. ولاردى تازارتىپ, قاراۋسىز قالعان جاۋىن-شاشىن كارىزدەرى مەن ارىق جۇيەسىن بالانسقا الىپ, جاۋىن-شاشىن قۇبىرلارىنا زاڭسىز جالعانۋدى انىقتاپ, ت.س.س. جۇمىستاردى جوسپارلى تۇردە جۇرگىزۋ كەرەك. جارتى جىل ىشىندە وتكىزۋ قابىلەتىن جاقسارتۋ ماقساتىندا 54 شاقىرىم كوللەكتور, 4 مىڭ جاڭبىر سۋىن جيناۋ جانە قاداعالاۋ قۇدىعى, 32 مىڭ مەتر ارىق جۇيەسى تازارتىلدى. ارىقتار مەن قۇدىقتاردان شىعارىلعان قوقىستىڭ ءوزى 2,5 مىڭ توننا بولدى, وسىنداي جۇمىس كوپ. جاۋىن سۋى اعاتىن قۇبىرلارعا 230 ءۇي-جايدىڭ زاڭسىز جالعانعانى انىقتالدى. بۇل جۇمىس تۇراقتى اتقارىلىپ كەلەدى», دەدى التاي كولگىنوۆ.
ونىڭ ايتۋىنشا, «جاستار» اۋدانىنداعى, ياعني ج.تاشەنوۆ پەن اممان كوشەلەرىنىڭ قيىلىسىنداعى تازارتۋ قوندىرعىسىنىڭ قۇرىلىسى جاۋىن-شاشىن كوللەكتورلارىنىڭ رەكونسترۋكتسياسىن دا قامتيدى.
«بۇگىنگى ارالاۋ بارىسىندا «جاستار» اۋدانىنداعى (ج.تاشەنوۆ پەن اممان كوشەلەرىنىڭ قيىلىسى) تازارتۋ قوندىرعىسىنىڭ قۇرىلىسىمەن تانىستىم. بۇل قۇرىلىس كەلىپ تۇرعان جاۋىن-شاشىن كوللەكتورلارىنىڭ رەكونسترۋكتسياسىن دا كوزدەيدى. بۇل جوبانى ءبىز ەكى كەزەڭدە جۇزەگە اسىرامىز. ءبىرىنشى كەزەڭى - بىلتىرعى كۇزدە باستالدى. بۇرىن قالدىق سۋ وزەنگە تىكەلەي اعىزىلىپ, ونى لاستاپ, قالا ەكولوگياسىنا كەرى اسەرىن تيگىزەتىن. جوسپارىمىز جۇزەگە اسقان سوڭ, ەندى جاڭبىر مەن قار سۋى ەسىلگە اعىزار الدىندا تازارتىلاتىن بولدى», دەدى قالا اكىمى.
التاي كولگىنوۆ بيىلعى كوكتەمدە بۇل جوسپاردىڭ ەكىنشى كەزەڭى اياقتالاتىنىن اتاپ ءوتتى.
«ناتيجەسى – جاۋىن-شاشىن كوللەكتورلارى رەكونسترۋكتسيالانادى.جاڭا قوندىرعىلاردىڭ قۋاتى تاۋلىگىنە 42 مىڭ تەكشە مەتر. بۇل قوندىرعىلار ج.تاشەنوۆ, باراەۆ, ش.ءۋاليحانوۆ, ش.يمانباەۆا جانە رەسپۋبليكا داڭعىلىن سۋ باسۋدان ساقتايدى. قوندىرعىلار جەر استىمەن جۇرگىزىلىپ, ال ۇستىنە - كىشى ارحيتەكتۋرالىق مۇسىندەرمەن كومكەرىلگەن ءارى جاسىل جەلەكتى سكۆەر سالامىز. سونىمەن بىرگە, ب. مومىش ۇلى كوشەسىندەگى پروبلەمالى جەرگە جاۋىن-شاشىن كارىز جۇيەسىنىڭ ماگيسترالدىق كوللەكتورىنىڭ قۇرىلىسى اياقتالدى. جاڭا قوندىرعى قازىرگى جاۋىن-شاشىن كارىزدەرىنىڭ وتكىزۋ قابىلەتىن 1,5 ەسەگە ارتتىرادى», دەيدى اكىم.
ال تەلمان تۇرعىن الابىنىڭ تازارتۋ قوندىرعىلارى مەن ماگيسترالدى كوللەكتورىنىڭ وتكىزۋ قابىلەتى تاۋلىگىنە 36 مىڭ تەكشە مەتر بولماق.
«جوبا جۇزەگە اسقان سوڭ - وسى الاپتىڭ جانە № 27 كوشەنىڭ قۇرىلىس ءجۇرۋى مۇمكىن اۋماقتارىنان جاڭبىر سۋىن اعىزىپ اكەتۋ مۇمكىن بولادى. بۇعان قوسا, ءبىرشاما تازارتۋ قوندىرعىلارى مەن جاۋىن-شاشىن كارىزدەرى باسقا جەرلەرگە دە سالىندى. بۇل جۇمىستار جۇيەلى تۇردە جۇرگىزىلىپ كەلەدى», - دەدى التاي كولگىنوۆ.