تارباعاتايدىڭ باسىنا كۇزدە تۇسكەن قاردىڭ كوبەسى كوكتەم شىعا سوگىلىپ, ۇزاق ەريدى. مۇز بولىپ سىرەسىپ, جىل ون ەكى اي جاتاتىن قويىن-قولاتتارى دا جوق ەمەس. قالىڭ قاردا بارىنەن بۇرىن تەبىنمەن شىعاتىن ءتۇز تاعىلارىنا قيىن. سول ءۇشىن دە قورىقشىلار قىس مەزگىلىندە جەم-شوپتەرىن سالىپ, بيوتەحنيالىق ءىس-شارالاردى ۇنەمى جۇرگىزىپ وتىرادى.
بيوتەحنيالىق دەپ وتىرعانىمىز, جابايى جانۋارلاردىڭ قىستان قىسىلماي امان شىعۋى ءۇشىن جاسالاتىن شارالاردىڭ ءبىر ءتۇرى. تۇياقتىنىڭ ءىزى بايقالعان تۇستاعى ناۋالارعا بيدايىن, تۇزىن سالادى, اعاشتىڭ ءبۇرىن بۋىپ ىلەدى. ال ناۋالاردى ينسپەكتورلار جاز ماۋسىمىندا ازىرلەپ, ورناتىپ قويادى.
– «جاز كيەرىڭدى قىس سايلا, قىس مىنەرىڭدى جاز سايلا» دەگەندەي, مەملەكەتتىك ينسپەكتورلار بيوتەحنيالىق شارالارعا كۇزدەن باستاپ كىرىسەدى. ولار بەكىتىلگەن اۋماقتارىنداعى ناۋاعا جەم سالىپ, ءشوپ بايلايدى. ونىڭ ىسكە اسىرىلۋىن عىلىمي قىزمەتكەرلەر مەن اڭشى بيولوگ ماماندار قاداعالايدى, – دەيدى «تارباعاتاي» مەملەكەتتىك ۇلتتىق تابيعي پاركىنىڭ عىلىم, اقپارات جانە ەكولوگيالىق مونيتورينگ ءبولىمىنىڭ باسشىسى جاڭىلقان قابيقىزى.
تارباعاتاي تاۋلارى – اڭ-قۇسى شۋلاپ جاتقان ءوڭىر. ارقارى دا, تاۋتەكەسى دە بار. جىرتقىشتىڭ دا ءتۇر-ءتۇرى جورتادى. مامانداردىڭ ايتۋىنشا, قورىق قۇرىلعاننان بەرى اڭ-قۇستاردىڭ سانى اناعۇرلىم ارتىپ كەلە جاتقان كورىنەدى. ارينە, اڭ اۋلاۋعا شەكتەۋ قويىلىپ, قورعاۋعا الىنعان سوڭ جىل سايىن ارتا ءتۇسۋى زاڭدىلىق. جۋىقتا قۇرىپ قويعان فوتوتۇزاقتارعا قاسقىر دا, قابان دا ءتۇسىپ قالعان. جازعا سالىم مالاق اۋىلىنىڭ ماڭىنان اققۋلاردىڭ قيقۋى ەستىلەدى. كۇزدىڭ كۇنى اڭ-قۇستارى كوشىپ-قونىپ جاتاتىندىقتان, ساناق ناقتى بولا قويمايتىن كورىنەدى. ال قىسقى ساناققا ماماندار ەندى كىرىسەدى.
شىعىس قازاقستان وبلىسى,
ءۇرجار اۋدانى