كەلەسى جىلى جەر كودەكسىنىڭ جەكەلەگەن نورمالارىنا قاتىستى ەنگىزىلگەن ءموراتوريدىڭ مەرزىمى اياقتالادى. وسىعان وراي قاسىم-جومارت كەمەل ۇلى اۋىل شارۋاشىلىعى ماقساتىنداعى جەرلەردى اينالىمعا ەنگىزىپ, حالىقتىڭ يگىلىگىنە جاراتۋ – وتە ماڭىزدى ماسەلە ەكەنىن اتادى, دەپ حابارلايدى ەgemen.kz.
سوندىقتان, بيىل جەر ماسەلەسى جونىندەگى كوميسسيانى قۇرىپ, سونىڭ اياسىندا ءبىر بايلامعا كەلگەن ءجون ەكەنىن العا تارتتى.
«قازاق ءۇشىن توقىمداي جەردىڭ ءوزى قىمبات, ءبىر ۋىس توپىراقتىڭ ءوزى التىن. بىراق ءبىز سونى باعالاي بىلەمىز بە؟! جەر قادىرىن ءبىلۋ جالاڭ ۇرانمەن ولشەنبەيدى. وكىنىشكە قاراي, اسقار تاۋلارىمىز بەن ايدىن كولدەرىمىزدى, ۇلان-عايىر دالامىزدى لاستاپ جاتقان دا ءوز ازاماتتارىمىز. كوكجايلاۋعا وت جاعىپ, قوقىس شاشىپ كەتكەن دە, كوبەيتۇزدىڭ باتپاعىن شەلەكتەپ تاسىپ, كولدىڭ ورتاسىندا كولىكپەن ويقاستاعان دا سولار. ءبىر تۇتام ءمۇيىزى ءۇشىن كوزىن مولدىرەتىپ كيىكتەردى قىرعان دا وزگەلەر ەمەس. قاسيەتتى جەرىمىزدىڭ كيەسىنەن قورىقپاي, جات جۇرتتىڭ دا قولى بارماس ارەكەتتەردى جاساپ وتىرىپ, قالايشا وسى مەكەننىڭ يەسىمىز دەپ كەۋدە سوعا الامىز؟ بۇل – اششى دا بولسا, شىندىق. ءبىز جەرىمىزدىڭ شىن جاناشىر يەسى ەكەنىمىزدى ناقتى ىسپەن كورسەتۋگە ءتيىسپىز. ول كوشەگە قوقىس تاستاماۋ, كورىنگەن جەرگە وت جاقپاۋ سياقتى قاراپايىم نارسەلەردەن باستاپ, جالپىحالىقتىق سيپاتتاعى اۋقىمدى ەكولوگيالىق شارالار ارقىلى كورىنىس تابۋى قاجەت», - دەدى مەملەكەت باسشىسى.
مەملەكەت باسشىسى مۇنىڭ ءبارى ءتالىم-تاربيەدەن باستالاتىنىن دا اتاپ ءوتتى.
«اتا-اناسىمەن بىرگە اۋلاسىنا اعاش ەكپەگەن, ۇلكەندەردىڭ جان-جانۋارعا مەيىرىمىن كورمەگەن, كىشكەنتايىنان تابيعاتتى ايالاۋعا داعدىلانباعان بالا وسكەندە تۋعان جەرىنە جانى اشىمايدى. ماسەلە ەكولوگيادا ەمەس – وتانشىلدىقتا, زاڭدا ەمەس – سانادا», - دەدى پرەزيدەنت.