جەكسەنبى كۇنى ىستانبۇلدان الماتىعا باعىت العان Turkish Airlines (THY) اۋە كومپانياسىنىڭ جۇك تاسيتىن ۇشاعى اپاتتى جاعدايدا قايتا قوندى. جۇك تاسيتىن ۇشاق اتاتۇرىك اۋەجايىنان ۇشقان كەزدە قۇستارمەن سوقتىعىسىپ قالعان.
جۇك تاسيتىن ۇشاق اتاتۇرىك اۋەجايىنان جەرگىلىكتى ۋاقىت بويىنشا (0540GMT) تاڭعى ساعات 08:40-تا ۇشقان. Turkish Airlines ءباسپاسوز قىزمەتى اۋەگە كوتەرىلگەن B777-F ۇشاعى قۇستارمەن سوقتىعىسىپ قالعانىن حابارلادى.
قۇستار جۇك تاسيتىن ۇشاقتىڭ پلانەرىن زاقىمداعان. اتالعان ۇشاق شۇعىل تۇردە جەرگە قونۋ ءۇشىن سالماعىن ازايتۋ كەرەك بولعان, سول سەبەپتى جانارمايدى ءمارمار تەڭىزىنىڭ ۇستىنە توگىپ جىبەرىپ, ودان كەيىن اتاتۇرىك اۋەجايىنا قايتا قونعان.