اتىراۋ وبلىسىنداعى ەڭ ءىرى كەنىشتىڭ ءبىرى – تەڭىز. كەشە وسىنداعى ۆاحتالىق كەنتتە ورنالاسقان قويما وتقا وراندى, دەپ حابارلايدى Egemen.kz.
«31 جەلتوقساندا تەڭىز كەنىشىندەگى وندىرىستىك الاڭنان تىس ۆاحتالىق كەنتتەگى مەردىگەرلىك مەكەمەنىڭ قويماسى ورتەنگەنى بەلگىلى بولدى. تشو-نىڭ ءورت-اۆاريالىق قىزمەتىنىڭ قىزمەتكەرلەرى وقيعا ورنىنا جەدەل جەتتى. عيماراتتان بارلىق قىزمەتكەر ەۆاكۋاتسيالاندى. ەشكىمگە مەديتسينالىق كومەك قاجەت بولمادى» دەلىنگەن «تەڭىزشەۆرويل» جشس-ءنىڭ ءباسپاسوز قىزمەتى تاراتقان اقپاراتتا.
ءورت تۋرالى ءتيىستى ورگاندارعا حابارلانىپتى. ەندى قويمانىڭ نەدەن ورتەنگەنى تەكسەرۋ كەزىندە انىقتالادى.