«وسى ءجۇز جىلدىقتا جەردەگى ادام ءومىرىنىڭ ورتا جاسى 120-عا جەتەدى», – دەپ مالىمدەدى انتروپولوگياعا ارنالعان حالىقارالىق عىلىمي-تاجىريبەلىك كونفەرەنتسيادا رەسەي ۇكىمەتى جانىنداعى ساراپشىلار كەڭەسىنىڭ مۇشەسى سەرگەي گراديروۆسكي. بۇل تۋرالى يتار-تاسس حابارلادى.
«دامىعان ەلدەردە 30 جىلدان كەيىن ادام ءومىرىنىڭ ورتا جاسى 120 بولماق. بۇل كورسەتكىشكە رەسەي 40-45 جىلدان كەيىن جەتەدى», – دەيدى عالىم.
سەرگەي گراديروۆسكيدىڭ ايتۋى بويىنشا, ادام ءومىرىنىڭ ۇزارۋى تاريحي زاڭدىلىق. مۇنداي جاعداي سوڭعى بىرنەشە ءجۇز جىلدىقتىڭ ىشىندە ەكى رەت بايقالعان. «قازىردىڭ وزىندە دامىعان ەلدەردەگى ادامداردىڭ ورتا جاسى 90-عا تاياپ قالدى. 10 مەملەكەتتە ايەلدەر اراسىنداعى بۇل كورسەتكىش 85-تەن اسقان», – دەدى ول.
عالىمنىڭ پىكىرىنشە, ادام ءومىرىن ۇزارتۋعا جوعارى تەحنولوگيالىق مەديتسينانى دامىتۋ مەن سالاۋاتتى ءومىر سالتىنىڭ ىقپالى زور.
انتروپولوگياعا ارنالعان حالىقارالىق عىلىمي-تاجىريبەلىك كونفەرەنتسيادا ادامدى جان-جاقتى قالىپتاستىرىپ, دامىتۋدىڭ ءتۇرلى تۇجىرىمدامالىق, جوبالىق, تاجىريبەلىك جولدارى قاراستىرىلدى. وعان رەسەي, ۇلىبريتانيا, يزرايل, يرلانديا, مەكسيكا, فرانتسيا مەن شۆەيتساريا عالىمدارى قاتىستى.
ايدار ورىسباەۆ.
دەرەككوز: Itar-tass.com