تەننيستەن كەلەسى جىلدىڭ ەڭ العاشقى «ۇلكەن دۋلىعا» ءتۋرنيرى اقپاننىڭ 8-21 ارالىعىندا وتەدى. قازاقستاننىڭ التى وكىلى اۋستراليا اشىق چەمپيوناتىنىڭ نەگىزگى كەزەڭىنە جولداما الدى.
قىزدار اراسىنداعى باسەكەدە ەلەنا رىباكينا, يۋليا پۋتينتسەۆا, زارينا دياس جانە ياروسلاۆا شۆەدوۆا ەل نامىسىن قورعايتىن بولسا, ەرلەر سايىسىندا الەكساندر بۋبليك پەن ميحايل كۋكۋشكين ونەر كورسەتەدى. سونىمەن قاتار جۇپتىق سايىستا الەكساندر بۋبليك اندرەي گولۋبەۆپەن بىرگە باق سىنايدى.
سونداي-اق دميتري پوپكو جارىستى ىرىكتەۋ كەزەڭىنەن باستايدى. پاندەمياعا بايلانىستى ەرلەردىڭ ىرىكتەۋ جارىسى دوحادا وتەدى. سونىمەن قاتار بيىل اۋستراليانىڭ اشىق چەمپيوناتى ەرەكشە فورماتتا ۇيىمداستىرىلماق. ەرەجە بويىنشا, سپورتشىلار جاسىل قۇرلىققا جارىستان ەكى اپتا بۇرىن كەلىپ, 14 كۇندىك كارانتيننەن ءوتۋى ءتيىس.