ماڭعىستاۋ وبلىسىنا ساپارمەن كەلگەن دەنساۋلىق ساقتاۋ مينيسترى ساليدات قايىربەكوۆا ايماقتىڭ دەنساۋلىق ساقتاۋ سالاسىنىڭ جاي-كۇيىمەن, مەملەكەتتىك باعدارلامالاردىڭ جۇزەگە اسىرىلۋ بارىسىمەن تانىستى.
ماڭعىستاۋ وبلىسىنا ساپارمەن كەلگەن دەنساۋلىق ساقتاۋ مينيسترى ساليدات قايىربەكوۆا ايماقتىڭ دەنساۋلىق ساقتاۋ سالاسىنىڭ جاي-كۇيىمەن, مەملەكەتتىك باعدارلامالاردىڭ جۇزەگە اسىرىلۋ بارىسىمەن تانىستى.
جاڭاوزەن قالاسىنىڭ تەڭگە اۋىلىندا وتكەن جىلى ىسكە قوسىلعان دارىگەرلىك امبۋلاتوريادا بولىپ, دەنساۋلىق ساقتاۋ ۇيىمدارىنىڭ حالىققا قولجەتىمدى جانە ساپالى دارىگەرلىك قىزمەت كورسەتۋ جونىندەگى جۇمىستارىمەن تانىستى. ەمدەلۋشىلەرمەن ءجۇزدەسكەن مينيستر دارىگەرلەردىڭ ءبىلىكتىلىگىن ارتتىرۋ ءۇشىن كوشپەلى سەمينارلار وتكىزۋ جانە كۇندىزگى ستاتسيونارلاردىڭ, ەگۋ كابينەتتەرىنىڭ جۇمىسىن جاقسارتۋ قاجەتتىگىنە ءمان بەردى. سونداي-اق, ول «راحات» شاعىن اۋدانىندا ورنالاسقان اۋىسىمىنا 250 ادام قابىلدايتىن جاڭادان سالىنىپ جاتقان ەمحانادا بولدى. بۇل ەمحانانىڭ قۇرىلىسىنا 598 ملن. تەڭگە بولىنگەن, ونىڭ 160 ملن. تەڭگەسى زاماناۋي قۇرال-جابدىقتارمەن قامتاماسىز ەتۋگە جۇمسالماق.
س.قايىربەكوۆا جاڭاوزەن قالاسىندا جاڭادان بوي كوتەرگەن 100 توسەكتىك پەرزەنتحانا قۇرىلىسىمەن تانىستى. بۇعان دەيىن ءتۇرلى سەبەپتەرمەن كەشەۋىلدەپ, جىرعا اينالعان پەرزەنتحانا قۇرىلىسى 2014 جىلدىڭ العاشقى ايى باستالىسىمەن پايدالانۋعا بەرىلەدى دەپ كۇتىلۋدە. جاڭا پەرزەنتحانانىڭ كوممۋنالدىق شىعىندارىن وتەۋ ءۇشىن مينيستر نىساننىڭ 1 قاباتىن جالعا بەرۋگە بولاتىنىن ايتتى.
جاڭاوزەن قالاسىنىڭ مەديتسينا قىزمەتكەرلەرىمەن كەزدەسكەن مينيستر ەلباسىنىڭ قازاقستان حالقىنا جولداۋىندا دەنساۋلىق ساقتاۋ ۇيىمدارىنىڭ جاڭارتىلۋىنا, اۋرۋحانالارعا جوندەۋ جۇمىستارىن جۇرگىزۋگە, ولاردىڭ زاماناۋي قۇرالدارمەن جابدىقتالۋىنا, بىلىكتى ماماندار دايارلاۋعا ەرەكشە ءمان بەرىلىپ وتىرعاندىعىن ايتا كەلىپ, العا قويعان مىندەتتەردى ورىنداۋدى تاپسىردى.
مۇنايلى اۋدانىندا, ماڭعىستاۋ وبلىستىق اۋرۋحاناسىنىڭ قۇرىلىسى سالىنىپ جاتقان «گ» بلوگىندا بولدى. مەديتسينا قىزمەتكەرلەرىمەن كەزدەسكەن مينيستر 2013 جىلدىڭ 9 ايىنىڭ قورىتىندىسى بويىنشا دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىنىڭ ورىندالۋ بارىسىنا توقتالىپ, وڭىردە تۋبەركۋلەز, ونكولوگيالىق اۋرۋلاردان ءولىم-ءجىتىمنىڭ ازايماي وتىرعاندىعىن اتاپ ءوتتى. كادر ماسەلەسىن شەشۋ قاجەتتىگىن, سونداي-اق, مامانداردىڭ بىلىكتىلىگىن ارتتىرۋ ماقساتىندا رەسپۋبليكالىق عىلىمي ورتالىق ماماندارىن شاقىرتىپ كوشپەلى سەمينارلار ۇيىمداستىرۋدىڭ تيىمدىلىگىن ايتتى.
ماڭعىستاۋدىڭ دەنساۋلىق ساقتاۋ سالاسىنداعى باستى قاجەتتىلىكتىڭ ءبىرى – بىلىكتى مامان. جوعارىدان بايقاعانىمىزداي, مۇنى مينيستر دە ايتتى. ەلگە مينيسترلەردىڭ كەلىپ-كەتۋى ەمەس, سوڭىنان ناتيجەلى ءىس قالعانى كەرەك. سوندىقتان, ساپاردىڭ ءساتتى بولۋى – مينيستر تاراپىنان بەرىلگەن تاپسىرمالار مەن ايتىلعان ۇسىنىستاردىڭ جەمىستى بولۋىمەن ولشەنبەك.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.