الماتى وبلىسىندا ونىنشى سپورتتىق-ساۋىقتىرۋ كەشەنى اشىلدى

ا.باتالوۆ بۇل نىساننىڭ ەلباسىنىڭ 100 دەنە شىنىقتىرۋ-ساۋىقتىرۋ كەشەنىن سالۋ تۋرالى جانە پرەزيدەنتتىڭ جولداۋىنداعى بارلىق جاستاعى ەل ازاماتتارى اراسىندا بۇقارالىق سپورتتى دامىتۋ تۋرالى تاپسىرمالارىنا سايكەس اشىلىپ وتىرعانىن تىلگە تيەك ەتتى.

- زامانعا ساي دەنە شىنىقتىرۋ-ساۋىقتىرۋ كەشەنىنىڭ اشىلۋى -  كوپتەن كۇتكەن قۋانىشتى جاڭالىق. بۇرىن قارابۇلاقتىڭ سپورتشى جاستارى ارنايى ورىن بولماعاندىقتان, سپورتتىق ويىنداردى تۇرمىستىق زالداردا, جەرتولەدە وتكىزىپ جۇرەتىن. بۇل ءوڭىردىڭ, اسىرەسە, ۆولەيبول ويناۋداعى شەبەرلىگى ماعان جاقسى تانىس. ەندى, مىنە, وسىنداي ءزاۋلىم, كەڭ, بارلىق جاعدايى جاسالعان سپورتتىق كەشەندە جاتتىعىپ, جاستاردى تاربيەلەيتىن بولاسىزدار. كۇنى ەرتەڭ بۇل جەردەن ءبىزدىڭ ماقتانىشتارىمىز جاقسىلىق ۇشكەمپىروۆتەي, جانىمىزدا تۇرعان بەلگىلى سپورتشىلار - مەرەي, ماۋلەن مەن نۇرباقىت سياقتى مىقتى ازاماتتار تاربيەلەنىپ شىعادى. بۇگىنگى كۇنى باقاناستا, نارىنقولدا, بالپىق بيدە وسىنداي كەشەندەر ىسكە قوسۋعا دايىن تۇر. ەسكەلدى اۋدانىندا اشىلىپ وتىرعان بۇل نىسان - وبلىستا سالىنعان 10-شى سپورتتىق كەشەن, دەدى ول.

قارابۇلاقتىقتار اتىنان ارداگەر سپورتشى مانات راقىمشالوۆ ءسوز الىپ, بۇگىن اۋدان سپورتشىلارى ءۇشىن ۇلكەن مۇمكىندىك جاسالىپ وتىرعانىن اتاپ ءوتىپ, ەل باسشىلارىنا شىنايى ريزاشىلىعىن ءبىلدىردى. مۇنان سوڭ كەشەندى تۇرعىزعان «قۇرىلىس تبس» مەردىگەر كومپانياسىنىڭ باسشىسى باتىرحان توقتاەۆ نىساننىڭ سيمۆوليكالىق كىلتىن كەشەن باسشىلىعىنا تاپسىردى. اۋداندىق ارداگەرلەر كەڭەسىنىڭ توراعاسى بيمۇرات كوپباي ۇلىنىڭ اق باتاسىنان كەيىن كەشەننىڭ لەنتاسى قيىلىپ, شاشۋ شاشىلدى.

كوپشىلىك سپورت كەشەنىنىڭ ءىشىن ارالاپ, جاتتىعۋ زالدارىندا بولدى. وبلىس اكىمى اماندىق باتالوۆ بوكس, كۇرەس, ترەناجەرلىق زالدارعا كىرىپ, سپورتتى سەرىك ەتكەن بالالارمەن تىلدەستى, ولارعا بوكس قولعاپتارى, كۇرەسكە ارنالعان سپورتتىق كيىمدەر ۇلەستىرىلدى. ارداگەر سپورشىلار ۆولەيبولدان جولداستىق كەزدەسۋ وتكىزىپ, ويىن كورىگىن قىزدىردى.

جالپى قارابۇلاقتاعى بۇل كەشەن «اۋىل – ەل بەسىگى» باعدارلاماسى بويىنشا سالىندى. ونىڭ قۇرىلىسىنا جەرگىلىكتى بيۋدجەت ەسەبىنەن 1,3 ملرد. تەڭگە جۇمسالعان. مۇندا بارلىق قاجەتتى سپورتتىق زاماناۋي قۇرالدار بار. جەكپە جەك جانە كۇش قولدانىلاتىن سپورت تۇرلەرىنە ارنالعان بۇل امبەباپ دەنە شىنىقتىرۋ-ساۋىقتىرۋ كەشەنىندە بوكسپەن, كۇرەسپەن, دزيۋدومەن, تاەكۆوندومەن, اۋىر اتلەتيكامەن فۋتبولمەن جانە ۆولەيبولمەن اينالىسۋعا بارلىق مۇمكىندىك جاسالعان.

كەشەننىڭ قۇرىلىسىنا نەگىزىنەن جەرگىلىكتى جۇمىسشىلار تارتىلعان. سولاردىڭ ءبىرى مۇرات نۇسقاباەۆ.

- سپورت كەشەنىنىڭ قۇرىلىسىن جۇرگىزۋگە جەرگىلىكتى قۇرىلىسشىلار باستان اياق قاتىستىق. قۇرىلىستا نەگىزىنەن قارابۇلاق, ەشكىولمەس, اباي اۋىلدارىنىڭ جىگىتتەرى جۇمىس ىستەدى. كەشەندى بارىنشا ساپالى سالدىق دەپ ويلايمىن. ەندى مۇندا ءوزىمىزدىڭ بالالارىمىز, نەمەرەلەرىمىز كەلىپ سپورتپەن شۇعىلدانادى, دەدى ول.

بۇگىنگى كۇنى وبلىستا 10 دسو ىسكە قوسىلسا, وسىنداي تاعى 7 نىساننىڭ قۇرىلىسى اياقتالۋعا جاقىن, سونىڭ 1-ءى -  تالدىقورعانداعى تەڭدەسى جوق وليمپيادالىق ستاندارتقا ساي «تالدىقورعان» ورتالىق باسسەينى.

اتاپ وتسەك, الماتى وبلىسىندا 2020 جىلى دەنە شىنىقتىرۋ مەن سپورت سالاسىن دامىتۋعا جەرگىلىكتى  بيۋدجەتتەن 1,5 ملرد. تەڭگە بولىنگەن. بۇل سپورت مەكتەپتەرىنىڭ ماتەريالدىق-تەحنيكالىق بازاسى نىعايتۋعا, سپورتتىق نىسانداردى جاراقتاندىرۋعا جۇمسالدى.