قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ شىعىس قازاقستان وبلىسىنا جۇمىس ساپارى بارىسىندا «GrandFish» جشس-نا باردى, دەپ حابارلايدى Egemen.kz
بالىق شارۋاشىلىعى كەلىسىمشارت نەگىزىندە وسكەمەن سۋ قويماسى اۋماعىندا جۇمىس ىستەيدى. 2017 جىلى قۇرىلعان كاسىپورىن باقتاق (فورەل) وسىرۋمەن اينالىسىپ جاتىر. 2021 جىلدان باستاپ ءوز بازاسىندا ينكۋباتسيالىق تسەحى ىسكە قوسىلماق.
«قازىر كاسىپورىندا 20 ادام جۇمىس ىستەيدى. كەلەر جىلى كوكتەمنەن تسەح اشىلۋىنا بايلانىستى 30 ادامعا دەيىن كوبەيەدى. جوبا قۋاتى – جىلىنا 1200 توننا تاۋارلى بالىق وندىرۋگە جەتەدى. بۇل كورسەتكىشكە 2030 جىلعا قاراي جەتەمىز دەپ وتىرمىز. باقتاقتان دا باسقا بالىقتار ءوسىرۋ جوسپاردا بار», دەدى شارۋاشىلىق باسشىسى الەكساندر سوبولەۆسكي.
2019 جىلى شارۋاشىلىق ىشكى نارىققا 34 توننا باقتاق ساتقان. رەسەيگە ەكسپورت جاساۋ دا جوسپاردا بار.
مينيستر ماعزۇم مىرزاعاليەۆ پەن وبلىس اكىمى دانيال احمەتوۆ شارۋاشىلىق بازاسىندا بالىق جەم زاۋىتىن سالۋعا قولداۋ كورسەتۋگە كەلىستى.
ەسكە سالساق, مەملەكەت باسشىسى قاسىم-جومارت توقاەۆ حالىققا جولداۋىندا بالىق شارۋاشىلىعىنا ەرەكشە ءمان بەرۋ كەرەكتىگىن ايتقان. 2019 جىلى ەلىمىزدىڭ بالىق جانە بالىق ونىمدەرى نارىعىنىڭ جالپى كولەمى 66 مىڭ توننانى قۇرادى. قازاقستانداعى سۋ رەسۋرستارى 600 مىڭ تونناعا دەيىن بالىق ءوسىرىپ, ەكسپورتتى 10 ەسەگە ارتتىرۋعا مۇمكىندىك بەرەدى.
سول سەبەپتى قازىر ەكولوگيا مينيسترلىگى شارۋالاردى قولداۋ ماقساتىندا بىرقاتار زاڭدارعا وزگەرىس ەنگىزىپ, سۋبسيديا بەرۋ جولدارىن قاراستىرىپ جاتىر.