ءبىرجان نۇرىمبەتوۆ تۇركىستان وبلىسىندا حالىقتى الەۋمەتتىك قورعاۋ جۇمىستارىمەن تانىستى

رەسپۋبليكا بويىنشا تىرەك-قيمىل اپپاراتى بۇزىلعان مۇمكىندىگى شەكتەۋلى ازاماتتارعا كاسىپتىك ءبىلىم بەرەتىن بىردەن ءبىر مەكەمەنى ارالاپ كوردى. تۇركىستان وبلىسىنداعى ساپارى اياسىندا مينيستر وڭىرلىك جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ «ارناۋلى كاسىپتىك كوللەدجىندەگى» بالالاردىڭ قۇقىقتارى مەن زاڭدى مۇددەلەرىن قورعاۋدى قامتاماسىز ەتۋ جۇيەسىمەن تانىستى. بۇل مەكەمە مەملەكەت قامقورلىعىنا الىنعان ءارى جاسى 15-تەن اسقان مۇگەدەك بالالار اراسىنان كاسىپتىك ءبىلىمى بار مامانداردى دايارلاۋمەن جانە ەڭبەك نارىعىنىڭ تالاپتارى مەن ءوندىرىس سۇرانىستارىن ەسكەرە وتىرىپ دايارلاۋدىڭ ساپاسىن ۇدايى جەتىلدىرۋ ماقساتىندا اشىلعان.

كاسىپتىك ءبىلىم بەرۋدىڭ وقۋ باعدارلامالارىن ىسكە اسىرۋدا ارناۋلى الەۋمەتتىك قىزمەتتەردىڭ كەپىلدىك بەرىلگەن كولەمىن ۇسىنۋداعى ستاتسيونارلىق ۇلگىدەگى ۇيىم سانالادى. ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى شەڭبەرىندە 2020 جىلى 74 955 ادام جۇمىسپەن قامتۋ شارالارىنا قاتىسقان.

ونىڭ ىشىندە جاپپاي كاسىپكەرلىكتى دامىتۋ باعىتى بويىنشا 3676 ادام بيزنەس-باستاۋ جوباسى اياسىندا كاسىپكەرلىك نەگىزدەرىنە وقۋعا جولداندى. 1 085 ادام 3 ملن تەڭگەدەن باستالاتىن شاعىن نەسيەمەن قامتاماسىز ەتىلگەن. 8 مىڭنان اسا ادام 550 مىڭ تەڭگەدەن مەملەكەتتىك گرانت الىپ, كاسىبىن دوڭگەلەتۋدە. اتقارىلعان جۇمىستاردىڭ ناتيجەسىندە ايماقتا 1037 جاڭا جۇمىس ورىندارى اشىلىپ وتىر. مەملەكەتتىك جانە ۇكىمەتتىك باعدارلامالار شەڭبەرىندە 64,3 مىڭ جۇمىس ورىندارى قۇرىلعان. 3761 ادام كاسىپكەر رەتىندە تىركەلىپ, بيزنەسپەن اينالىسۋدا. باسىم بولىگى, ياعني 7 مىڭنان استام ازامات مال جانە قۇس شارۋاشىلى مەن ەگىن شارۋاشىلىعىن دامىتۋعا كىرىسكەن. 2517 ازامات حالىققا قىزمەت كورسەتۋ سالاسىنا بەت بۇرىپ, تىگىن, كونديتەر تسەحى, شاشتاراز, ءدارىحانا, سۇلۋلىق سالونى, اۆتوكولىك جوندەۋ ورتالىعى, جيحاز تسەحى جانە باسقا سالادا ءوز كاسىبىن دامىتۋدا.