تۇڭعىش پرەزيدەنت ن.نازارباەۆتىڭ باستاماسىمەن قولعا الىنعان «قامقورلىق» جوباسى اياسىندا رۋدنىي قالاسىندا پايدالانۋعا بەرىلگەن وڭالتۋ ورتالىعىنىڭ اشىلۋ راسىمىندە وبلىس اكىمى ارحيمەد مۇحامبەتوۆ قوستانايداعى نازارباەۆ زياتكەرلىك مەكتەبىنىڭ وقۋشىسى سوفيا سينيتسيناعا «ەلباسى مەدالىن» تاپسىردى.
6 جاسىنان شاحماتپەن اينالىساتىن سوفيا بىرنەشە جىل قاتارىنان وبلىستىق جانە قالالىق جارىستاردا جۇلدەلى ورىندارعا يە بولىپ ءجۇر. سوفيانىڭ ادەبيەت پەن ونەرگە دە تالابى زور. وسىدان ەكى جىل بۇرىن «التىن مەدال – 2018» حالىقارالىق كونكۋرسىنىڭ جەڭىمپازى اتانعان ول بيىل اباي قۇنانباي ۇلىنىڭ 150 جىلدىعىنا ارنالعان رەسپۋبليكالىق بايقاۋعا قاتىسىپ, مانەرلەپ وقۋدان 1-ورىندى جەڭىپ الدى. سوفيا سونىمەن قاتار ماتەماتيكا مەن ورىس ءتىلى پاندەرىنەن قالالىق وليمپيادالاردىڭ جەڭىمپازى. بۇل از دەسەڭىز, جاس سۋرەتشىلەرگە ارنالعان كونكۋرستاردان ماراپاتتارى تاعى بار.
– «ەلباسى مەدالى» جوباسى ءوزىم سياقتى تالاپتى جاستاردىڭ جان-جاقتى دامۋىنا مۇمكىندىك بەرەدى. مىسالى, مەن اتالعان جوبا ارقىلى ۆولونتەرلىكتىڭ جاستارعا قانات بىتىرەتىن قوعامعا اسا پايدالى قوزعالىس ەكەنىن ءتۇسىندىم. سونداي-اق ەسكىدەن قالعان تاريحي جادىگەرلەردىڭ ءبىز ءۇشىن قانشالىقتى ماڭىزدى ەكەنىنە كوز جەتكىزدىم. ەلباسىنىڭ تىكەلەي قامقورلىعىمەن جۇزەگە اسىرىلىپ جاتقان يگى جوبانىڭ جاستارعا بەرەرى مول, – دەيدى سوفيا.
ۇيلەستىرۋشىلەردىڭ ايتۋىنشا, «ەلباسى مەدالى» – جاستاردى كەشەندى دامىتۋعا باعىتتالعان ۇلتتىق دەڭگەيدەگى جالعىز باعدارلاما. 14-29 جاس ارالىعىنداعى جاستارعا ارنالعان باعدارلاما سپورت, دارىن مەن داعدى, كىتاپ وقۋ, ۇلتتىق مۇرا, ۆولونتەرلىك, ەكسپەديتسيالار مەن جورىقتار, ەڭبەك پراكتيكاسى سياقتى 7 نەگىزگى باعىتتان تۇرادى.
2020 جىلى «ەلباسى مەدالى» باعدارلاماسى 11 مىڭنان استام قاتىسۋشىنى, 600 تالىمگەردى, 17 ايماقتىق ۇيلەستىرۋشىلەر مەن ساراپشىلاردى قامتىعان. «ەلباسى مەدالىنىڭ» يەگەرلەرى ءبىلىم گرانتتارىن تاعايىنداۋ كەزىندە زاڭنامادا بەلگىلەنگەن تارتىپپەن ارتىقشىلىققا يە بولماق.