اتىراۋدا تاۋەلسىزدىك كۇنى مەرەكەسى قارساڭىندا ەنەرگەتيكا جانە قۇرىلىس كوللەدجىنىڭ ستۋدەنتتەرى ءۇشىن 100 ورىندىق جاتاقحانا اشىلدى. جاڭا جاتاقحانا ەلباسى – تۇڭعىش پرەزيدەنتتىڭ بەس الەۋمەتتىك باستاماسى اياسىندا بوي كوتەرگەن ەدى.
ونىڭ قۇرىلىسىنا «تەڭىزشەۆرويل» جشس «يگىلىك» الەۋمەتتىك باعدارلاماسى ارقىلى قارجى ءبولدى. ءتورت قاباتتى جاتاقحانا بولمەلەرى كۇندەلىكتى تۇرمىسقا قاجەتتى جابدىقتارمەن قامتاماسىز ەتىلگەن. مۇندا ستۋدەنتتەرمەن بىرگە جاس وتباسىلار دا تۇرا الادى. ءار قاباتتا 4 تەلەديدار مەن 12 اۆتوماتتى كىر جۋ ماشينكاسى بار.
– وڭىردەگى 24 تەحنيكالىق جانە كاسىپتىك ءبىلىم بەرەتىن كوللەدجدەردە 15 مىڭنان استام ستۋدەنت ءبىلىم الادى. ولاردىڭ جاتاقحاناعا سۇرانىسىن 2022 جىلعا دەيىن شەشۋدى كوزدەپ وتىرمىز. ەلباسىنىڭ «بەس الەۋمەتتىك باستاما» ۇندەۋىندەگى تاپسىرماسىنا سايكەس, 2018 جىلى ارنايى جول كارتاسى قابىلداندى. سونىڭ اياسىندا ەكى جاتاقحانانىڭ قۇرىلىسى اياقتالدى. ال اتىراۋ قالاسى جانە يندەر مەن جىلىوي اۋداندارىندا كوللەدج جاتاقحانالارى سالىنىپ جاتىر, – دەدى ايماق باسشىسى ماحامبەت دوسمۇحامبەتوۆ.
قازىر اتالعان كوللەدجدە 773 ستۋدەنت وقيدى. ونىڭ 189-ى – اۋىلدىق ەلدى مەكەندەردىڭ جاستارى. سونداي-اق ينجەنەر-وقىتۋشىلار قۇرامىنداعى 93 ماماننىڭ جيىرماسى وزگە وڭىرلەر مەن اۋىلداردان كەلىپتى.