بقو قىلمىستىق ىستەر جونىندەگى مامانداندىرىلعان اۋدانارالىق سوتىندا جانىبەك اۋدانىنىڭ تۇرعىنى نازار ساپارعاليەۆكە ۇكىم شىقتى, دەپ حابارلايدى Egemen.kz
سۋديا باقىت ەرماحانوۆ جاريا ەتكەن سوت ۇكىمىمەن 18 جاستاعى ن.ساپارعاليەۆ قر قك 99-بابىنا سايكەس ايىپتى دەپ تانىلىپ, 15 جىلعا باس بوستاندىعىنان ايىرۋ جازاسىن قاۋىپسىزدىگى بارىنشا جوعارى قىلمىستىق-اتقارۋ جۇيەسى مەكەمەسىندە وتەۋگە سوتتالدى.
وعان قوسا سوتتالۋشى جابىرلەنۋشىنىڭ وتباسىنا 10 ملن تەڭگە مورالدىق زالالدى وتەۋگە مىندەتتەلدى. قاندى وقيعا بيىلعى ءساۋىر ايىندا قامىستى اۋىلىندا بولدى. دوسىمەن جۇرگەن ن.ساپارعاليەۆكە وزدەرىنەن ۇلكەن ەكى اۋىلداسى تيىسكەن. سوتتالۋشى بۇل جونىندە ءوزىنىڭ اعاسىنا ايتىپ, كومەكتەسۋدى وتىنگەن. كۇندىز سوزگە كەلگەن تاراپپەن حابارلاسىپ, كەزدەسۋ بەلگىلەگەن.
كەزدەسۋگە جابىرلەنۋشى تاراپىنان بەس, ايىپتالۋشى جاعىنان سەگىز ادام بارعان. ن.ساپارعاليەۆ ءاسۇي پىشاعىن الا شىعىپ, توبەلەس كەزىندە جابىرلەنۋشى ك-نىڭ كەۋدە تۇسىنا جۇمساعان.
جابىرلەنۋشى اۋرۋحاناعا بارار جولدا كوز جۇمدى. ايتا كەتەتىن جايت, جابىرلەنۋشى ن.ساپارعاليەۆپەن جانجالداسپاعان. ول سول كۇنى تەك دوستارىنا ەرىپ كەلگەن. كۋالار قايىرىمدى, ەلگەزەك ادام رەتىندە سيپاتتاعان مارقۇمنىڭ سوڭىندا جارى, ءۇش بالاسى قالدى.
سوت ۇكىمى زاڭدى كۇشىنە ەنگەن جوق. ەسكە سالا كەتەيىك, بۇدان بۇرىن بقو سوتىنىڭ ءوز ايەلىن كەپىلدىككە العان تۇرعىنعا قاتىستى ۇكىمدى وزگەرىسسىز قالدىرعانىن جازعان بولاتىنبىز.