ونىڭ اتاعىنان ات ۇرىككەندەي. مەديتسينا عىلىمدارىنىڭ دوكتورى, پروفەسسور, «جىلدىڭ ۇزدىك دارىگەرى»... دەگەنمەن, ونىڭ ەڭبەگىن باعالاۋ, موينىنا العان جاۋاپكەرشىلىك جۇگىن سالماقتاۋ ءۇشىن وسى سياقتى اتاق-داڭقىنا قاتىستى اتاۋلاردى تىزبەلەمەي-اق, دوكتور پيا دەسەك تە جەتىپ جاتىر. بۇگىندە ونىڭ ەسىمىنىڭ مەديتسينانىڭ باسىم باعىتتارىنىڭ ءبىرى – كارديوحيرۋرگيامەن قاتار اتالۋى ۇيرەنشىكتى جاعدايعا اينالىپ بارادى. كارديوحيرۋرگيا دەسەك, ەڭ الدىمەن ويعا يۋري ۆلاديميروۆيچ پيا ورالاتىنى انىق.
ونىڭ اتاعىنان ات ۇرىككەندەي. مەديتسينا عىلىمدارىنىڭ دوكتورى, پروفەسسور, «جىلدىڭ ۇزدىك دارىگەرى»... دەگەنمەن, ونىڭ ەڭبەگىن باعالاۋ, موينىنا العان جاۋاپكەرشىلىك جۇگىن سالماقتاۋ ءۇشىن وسى سياقتى اتاق-داڭقىنا قاتىستى اتاۋلاردى تىزبەلەمەي-اق, دوكتور پيا دەسەك تە جەتىپ جاتىر. بۇگىندە ونىڭ ەسىمىنىڭ مەديتسينانىڭ باسىم باعىتتارىنىڭ ءبىرى – كارديوحيرۋرگيامەن قاتار اتالۋى ۇيرەنشىكتى جاعدايعا اينالىپ بارادى. كارديوحيرۋرگيا دەسەك, ەڭ الدىمەن ويعا يۋري ۆلاديميروۆيچ پيا ورالاتىنى انىق.
– يۋري ۆلاديميروۆيچ, ءبىز سىزبەن ءبىرىنشى رەت كەزدەسىپ وتىرعان جوقپىز. وسىنداي سىر-سۇحباتتاردىڭ بارىسىندا ۇلتتىق عىلىمي كارديوحيرۋرگيالىق ورتالىقتىڭ ورتالىق ازيا ايماعىنداعى قىزمەتى الەمدىك ساپا ستاندارتتارىنا ساي كوشباستاۋشى ۇيىمعا اينالىپ كەلە جاتقانىن ماقتانىشپەن ايتقان ەدىڭىز. سوڭعى وقيعالار ءسىز باسقاراتىن ۇجىمنىڭ تانىمالدىلىعى باسقا قۇرلىقتاردا دا وسە تۇسكەنىنە كوز جەتكىزىپ وتىرعان سياقتى ما, قالاي؟
– ول راس. وسىدان ءبىراز بۇرىن ءبىز تۇرىك رەسپۋبليكاسىنىڭ كارديوحيرۋرگتەرىمەن ءوزارا ىنتىماقتاستىق تۋرالى كەلىسىمگە وتىردىق. ال وعان دەيىن ليتۆالىق, يزرايلدىك, چەحيالىق, قىرعىزستاندىق جانە امەريكالىق ءارىپتەستەرىمىزبەن دە وسىنداي مەموراندۋمعا قول قويعان بولاتىنبىز. بۇل بىزگە نە بەرەدى دەگەنگە كەلسەك, بىرىنشىدەن, مەموراندۋمعا قول قويعان ەمدەۋ مەكەمەلەرى بىرلەسكەن عىلىمي-زەرتتەۋ جۇمىستارىن دامىتا وتىرىپ, زاماناۋي تەحنولوگيالاردى قولدانۋ سالاسىندا تاجىريبە الماسا الادى. سول سياقتى, عىلىمي سەمينارلار مەن كونفەرەنتسيالار ۇيىمداستىرۋ, مەديتسينا جانە باسقارۋ پەرسونالىنىڭ بىلىكتىلىگىن ارتتىرۋعا باعىتتالعان شارالار جۇگىن دە كوپ بولىپ كوتەرۋ مۇمكىندىگى مولايىپ وتىر.
– وسى تۇرعىدان العاندا قازاقستاندىق تاجىريبە باسقالاردىڭ قىزىعۋشىلىعىن تۋعىزاتىنداي دارەجەگە جەتتى دەپ ايتا الامىز با؟
– ۇستىمىزدەگى جىلى ءبىز رەسپۋبليكا دەنساۋلىق ساقتاۋ مينيسترلىگىنىڭ قولداۋىمەن «ينتەگراتسيا ارقىلى – تابىسقا» دەگەن تاقىرىپتا كارديوحيرۋرگتەردىڭ ەكىنشى ۇلتتىق كونگرەسىن وتكىزدىك. وعان 18 ەلدەن وسى سالانىڭ كورنەكتى وكىلدەرى قاتىستى. كونگرەس باعدارلاماسىنا سايكەس 8 شەبەرلىك سىنىبى ۇيىمداستىرىلدى. جالپى ايتقاندا, كونگرەس كارديوحيرۋرگيادا زاماناۋي تەحنولوگيالاردى قولدانۋدىڭ نەعۇرلىم پەرسپەكتيۆالى, ءتيىمدى باعىتتارىن انىقتاۋعا, كارديوحيرۋرگيانى دامىتۋدا ستراتەگيالىق شەشىمدەر قابىلداۋعا جول اشتى دەۋگە تولىق نەگىز بار.
وسى كونگرەسكە قاتىسقان تەحاس جۇرەك ينستيتۋتىنىڭ ديرەكتورى وسكار فرەيزەر تىلشىلەرگە بەرگەن سۇحباتىندا بىلاي دەدى: «سىزدەردىڭ كارديوحيرۋرگيالىق ورتالىقتارىڭىزدىڭ جاعدايى مەنى تاڭعالدىردى. ماماندارىڭىز زاماناۋي جابدىقتاردى جاقسى مەڭگەرىپ العان. مەن ءوزىم دە بىرنەشە وتاعا قاتىستىم. ءبارى ويداعىداي ءوتتى. مەن قازاقستاندا مۇنداي دەڭگەيگە كەزدەسەمىن دەپ ويلاعان جوق ەدىم. سىزدەر كەيبىر ەۋروپا ەلدەرىنەن دە وزىپ كەتىپسىزدەر».
شەتەلدىك ماماننىڭ مۇنداي باعاسى ءبىز ءۇشىن اسا قىمبات. ءويتكەنى, دوكتور فرەيزەر كوپ كارديوحيرۋرگتىڭ ءبىرى ەمەس, سوزىلمالى جۇرەك تالماسىنىڭ اۋىر ءتۇرلەرىن وتا جاساۋ ارقىلى ەمدەۋدىڭ كوشباسىندا جۇرگەن, ەسىمى الەمگە تانىمال دارىگەر. بۇگىندە ول باسقاراتىن جۇرەك-قان تامىرلارى اۋرۋلارىن ەمدەۋ ينستيتۋتى جۇرەك الماستىرۋ مەن قان اينالىمىن مەحانيكالىق جولمەن قولداۋ جونىنەن الەمدەگى ەڭ ۇزدىك ەمدەۋ مەكەمەلەرىنىڭ بىرىنەن سانالادى. ال و.فرەيزەردىڭ ءوزى بولسا, وسى ۋاقىتقا دەيىن 1200-دەن استام ادامنىڭ جۇرەگىن الماستىرعان ناعىز مايتالمان.
– جۇرەك الماستىرۋ دەمەكشى, جاقىندا سىزدەر دە وسىنداي وتانى ءساتتى وتكىزدىڭىزدەر عوي.
– ءيا, بۇل – ءبىز جاساعان وسىنداي ەكىنشى وتا. ول ۇلتتىق عىلىمي كارديوحيرۋرگيالىق ورتالىقتىڭ, ا.ن.سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ, سانيتارلىق اۆياتسيانىڭ رەسپۋبليكالىق ورتالىعىنىڭ جانە الماتى قالاسىنداعى بىرقاتار كلينيكالاردىڭ ۇيلەسىمدى قىزمەتىنىڭ ناتيجەسىندە مۇمكىن بولدى. ءۇستىمىزدەگى جىلعى قاراشانىڭ 6-سى كۇنى ۇلتتىق عىلىمي كارديوحيرۋرگيالىق ورتالىقتىڭ ترانسپلانتاتسيا جونىندەگى بيۋروسىنا الماتىداعى جەدەل جاردەم اۋرۋحاناسىنان ميىنا زاقىم كەلگەن سىرقاتتىڭ قايتىس بولعانى تۋرالى حابار ءتۇستى. قايتىس بولعان كىسىنىڭ جاقىن تۋىستارى ونىڭ ورگاندارىن باسقا ادامعا ترانسپلانتاتسيالاۋعا كەلىسىمدەرىن بەردى. ءبىز جەدەل جولعا شىقتىق. ءسويتىپ, كەلەسى كۇنى دونوردىڭ جۇرەگىن استاناعا جەتكىزدىك.
بۇل ارادا ءبىز مىنا ءبىر جايدى ەرەكشە اتاپ كورسەتۋىمىز كەرەك. دونور جۇرەگى استاناعا امەريكا قۇراما شتاتتارىنان ساتىپ الىنعان OrganCareSystem دەپ اتالاتىن زاماناۋي جابدىقپەن جەتكىزىلدى. بۇعان دەيىن بۇل جۇيە الەمنىڭ ءۇش جەتەكشى كلينيكاسىندا – اقش-تا, اۆستراليا مەن گەرمانيادا قولدانىلىپ كەلسە, ەندى ولاردىڭ قاتارىنا قازاقستان دا قوسىلدى. كەڭ-بايتاق جەرى بار, كوپتەگەن ايماقتارى اكىمشىلىك ورتالىقتاردان شالعاي جاتقان قازاقستان ءۇشىن مۇنداي عاجايىپ قوندىرعىنى پايدالانۋدىڭ ماڭىزى زور.
– جاڭا ءوزىڭىز دە امەريكالىق دارىگەردىڭ ۇلتتىق عىلىمي كارديوحيرۋرگيالىق ورتالىقتىڭ بۇگىنگى جاي-كۇيىنە تاڭدانىس ءبىلدىرگەنىن ايتتىڭىز. ارينە, مۇنىڭ ءبارى ءبىر جىلدا اتقارىلعان, ءوزىنەن ءوزى ورنىنا كەلە قالعان جۇمىستار ەمەس قوي. وسى ارادا ءسال شەگىنىس جاساساق...
– سوڭعى جىلدارى قازاقستاندا كارديوحيرۋرگيا سالاسىندا رەۆوليۋتسيا جاسالدى دەۋگە بولادى. استانالىق كلينيكانىڭ حالىقارالىق زەرتتەۋ باعدارلاماسىنا قوسىلۋى دا وسىنىڭ دالەلى. شىنى سول, مۇنىڭ ءبارى مەملەكەت باسشىسى نۇرسۇلتان نازارباەۆتىڭ ارقاسى, سول كىسى جۇرگىزىپ وتىرعان سىندارلى ساياساتتىڭ جەمىسى. ولاي دەيتىنىم, ءبىزدىڭ ىسىمىزگە ەلباسىنىڭ ارنايى تاپسىرماسى بويىنشا جاسالعان كارديوحيرۋرگيا سالاسىن دامىتۋدىڭ 2007-2009 جىلدارعا ارنالعان باعدارلاماسى تىڭ سەرپىن بەردى.
حح عاسىردىڭ ەكىنشى جارتىسىنان باستاپ بۇكىل الەمدى شارپىعان جۇرەك-قان تامىرلارى اۋرۋلارى ءبىزدىڭ ەلىمىزدە دە جىلدان-جىلعا ءورشىپ كەلەدى. مەديتسينالىق دەرەكتەر بويىنشا, جۇرەك-قان تامىرلارى اۋرۋلارى سالدارىنان جىل سايىن الەمدە 15 ميلليونداي ادام ومىرمەن قوش ايتىسسا, قازاقستاندا دا ءولىم-ءجىتىم بويىنشا جۇرەك اۋرۋلارى ءبىرىنشى ورىندا تۇر.
جاعدايدى جاقسارتۋ ءۇشىن جىل سايىن جۇرەككە كەم دەگەندە 15-16 مىڭ وتا جاسالۋعا ءتيىس. ول ءۇشىن, ارينە, جاقسى بازا, بىلىكتى ءدارىگەرلەر, قارجى, ءبىر سوزبەن ايتقاندا, كارديوحيرۋرگيا سالاسىنا شىنايى قامقورلىق قاجەت. وسىعان بايلانىستى ەلباسى باتىل شەشىم قابىلدادى. قازىر كارديوحيرۋرگيالىق ورتالىقتار استانادا عانا ەمەس, وبلىستاردا دا سالىنۋدا. مىنە, وسىلاي قازاقستاندىق كارديوحيرۋرگتەردىڭ ارمانى جۇزەگە اسىپ, قازىر الەمدە قولدانىلاتىن بارلىق جوعارى تەحنولوگيالار وتانداستارىمىزدىڭ يگىلىگىنە اينالىپ وتىر.
قازىرگى ورتالىق بارلىق حالىقارالىق ستاندارتتارعا ساي دەپ نىق سەنىممەن ايتۋعا بولادى. مۇندا ءبىر مەزگىلدە 180 ادام ەم الادى, 6 وتا جاساۋ بلوگى بار. مۇنىڭ ءوزى جىل سايىن جۇرەككە 3000 اشىق وتا جاساۋعا, سول سياقتى, كەۋدە كلەتكالارىن كەسپەي-اق جۇرەك تامىرلارىنىڭ قالىپتى جۇمىسىن قامتاماسىز ەتەتىن شارالار قولدانۋعا جول اشىپ وتىر. قولدانىستاعى جابدىقتاردىڭ ءبارى – ەۋروپالىق وندىرۋشىلەردىڭ ونىمدەرى.
– قازىر ەلدە مەديتسينا قىزمەتكەرلەرىن دايارلايتىن جوعارى وقۋ ورىندارى از ەمەس. سونىڭ وزىندە كوپتەگەن ايماقتاردا دارىگەرلەر جەتىسپەيدى. امەريكادا, ەۋروپا ەلدەرىندە كارديوحيرۋرگيا سالاسىنىڭ ماماندارىن دايارلاۋعا ورتا ەسەپپەن ون جىل كەتەدى ەكەن. سىزدەر وسى ماسەلەنى قالاي شەشىپ جاتىرسىزدار؟
– ورتالىقتا وسى سالانىڭ ەڭ ۇزدىك ماماندارى شوعىرلانعان. ولاردىڭ كوپشىلىگى اقش, گەرمانيا, يزرايل, ءتۇركيا, ليتۆا, رەسەي جانە بەلورۋسسيانىڭ جەتەكشى كلينيكالارىندا وقىعان.
ءبىزدىڭ دارىگەرلەرىمىز ءجيى-ءجيى شەتەلدەرگە شىعىپ, وزدەرىنىڭ بىلىكتىلىكتەرىن ارتتىرىپ وتىرادى. سول سياقتى, سوڭعى كەزدە ءبىزدىڭ ورتالىققا شەتەلدىك ارىپتەستەرىمىز دە ءجيى اتباسىن بۇراتىن بولدى. ولار مۇندا تاجىريبە الماسۋمەن بىرگە, شەبەرلىك سىنىپتارىن وتكىزەدى, بىرلەسكەن وتالارعا قاتىسادى.
– شەتەلدەردە ترانسپلانتاتسيا جاساتۋ وتە قىمبات ەكەنىن بىلەمىز. ونى قاراپايىم ادامداردىڭ قالتاسى كوتەرە بەرمەيدى. ال ءوز ەلىمىزدە بۇل وتالاردىڭ قولجەتىمدىلىگى قامتاماسىز ەتىلگەن جانە تەگىن جاسالادى. سونىڭ وزىندە ازىرشە ەكى-اق ادامنىڭ جۇرەگى الماستىرىلدى. بۇل از ەمەس پە؟ جاڭا ءوزىڭىز امەريكالىق ءبىر حيرۋرگتىڭ ءوزى مىڭنان استام ادامعا ءومىر سىيلاعانىن ايتتىڭىز عوي.
– قازىرگى تاڭدا قازاقستاندا ءومىرى تىكەلەي دونور اعزالارىنا تاۋەلدى 5 مىڭعا جۋىق ادام ەسەپتە تۇر. ەڭ قيىنى دونور ماسەلەسى ەدى, قازىر بۇل ورايدا ىلگەرىلەۋشىلىك بار. راس, قايتىس بولعان تۋىستارىنىڭ ورگاندارىن باسقا ادامنىڭ ءومىرىن ساقتاپ قالۋعا پايدالانۋعا ەكىنىڭ ءبىرى كەلىسە قويمايدى. سول سياقتى, ازىرشە جۇرەگىن الماستىرۋعا تاۋەكەل ەتۋشىلەر دە كوپ ەمەس. كەزىندە جانىبەك وسپانوۆ تا بىردەن كەلىسە قويعان جوق-تى.
– ايتپاقشى, ەلىمىزدە ءبىرىنشى بولىپ جۇرەگىن اۋىستىرعان جانىبەك وسپانوۆتىڭ جاعدايى قالاي؟ ءالى دە سىزدەردىڭ باقىلاۋلارىڭىزدا شىعار؟
– جانىبەكتىڭ جاعدايى جامان ەمەس, قازىر وسى اۋرۋحانانىڭ ستاتيستيكا جانە پاتسيەنتتەر قوزعالىسى بولىمىندە ىستەيدى. سىرتتاي وقۋعا ءتۇستى. بولاشاقتا پسيحولوگ ماماندىعىن الىپ شىقپاق.
– يۋري ۆلاديميروۆيچ, سوڭعى جىلدارى ەلىمىزدەگى كارديوحيرۋرگيا سالاسىنىڭ كۇرت وزگەرگەنى ايدان انىق. قازىر استانا مەن الماتىنى بىلاي قويعاندا, ايماقتاردا دا جۇرەككە كۇردەلى وتالار جاسالا باستادى. وبلىستارمەن سىزدەردىڭ قانداي بايلانىستارىڭىز بار؟
– سوڭعى ۋاقىتتاردا ەلىمىزدىڭ تاڭداۋلى كارديوحيرۋرگتەرى مەن كارديولوگتارىنىڭ وڭىرلەرگە شىعىپ تۇرۋى داستۇرگە اينالدى. مۇنداي ساپارلاردىڭ بارىسىندا ءبىزدىڭ ماماندارىمىز جەرگىلىكتى جەرلەردەگى سىرقاتتاردى قابىلدايدى. ايماقتاعى ارىپتەستەرمەن شەبەرلىك سىنىپتارىن وتكىزىپ, وتالارعا قاتىسادى. وسى تاياۋدا عانا ءبىزدىڭ دارىگەرلەرىمىز اقتوبە, باتىس قازاقستان, قوستاناي جانە ماڭعىستاۋ وبلىستارىندا بولىپ قايتتى. ماسەلەن, قوستاناي وبلىسىندا بولعان №1 كارديوحيرۋرگيا بولىمشەسىنىڭ مەڭگەرۋشىسى تيمۋر لەسبەكوۆ باستاعان دارىگەرلەر جۇرەگى اۋىراتىن 70 ادامدى قابىلداپ, ولارعا ءتيىستى اقىل-كەڭەستەر بەردى.
مەن ءوزىم دە ءبىر توپ ارىپتەستەرىممەن بىرگە ماڭعىستاۋ وبلىسىندا بولدىم. وندا ءبىز 40 شاقتى سىرقاتتى قابىلداپ, 3 ادامعا وتا جاسادىق, جەرگىلىكتى ءارىپتەستەرىمىزبەن شەبەرلىك سىنىپتارىن وتكىزدىك.
– ءومىر ءبىر ورىندا تۇرمايدى عوي, سىزدەر دە قول جەتكەنگە توقمەيىلسىپ وتىرماعان بولارسىزدار؟
– ءيا, قازىرگى جاعدايدى وسىدان ءبىر-ەكى جىل بۇرىنعىمەن مۇلدە سالىستىرۋعا بولمايدى, ايىرماشىلىق جەر مەن كوكتەي. ورتالىقتا ROC Safe جۇيەسىن قولدانۋ ارقىلى كارديوحيرۋرگيالىق وتالاردى جۇرگىزۋ تەحنولوگياسى ەنگىزىلدى. بۇل ەمدەلۋشىلەر ءۇشىن جاڭا, ءتيىمدى جانە قاۋىپسىز تەحنولوگيا سانالادى. وسى جۇيەنى قولدانا وتىرىپ وتا جاسالعاندا ۋاقىتشا جاساندى ۆەنتيلياتسيا قىسقارتىلىپ, وتادان كەيىنگى قاننىڭ ازايۋى (مەرتسات اريتمياسى جانە قان كەتۋ) سالدارىنان وتا كەزىندە جانە ودان كەيىنگى ۋاقىتتا قان قۇيۋ قاجەتتىلىگى تومەندەيدى. اورتوكورونارلىق شۋنتتەۋ جانە جۇرەك كلاپاندارىن پروتەزدەۋ بارىسىندا جۇرەك ىرعاعىنىڭ بۇزىلۋى بار سىرقاتتاردى ەمدەۋدە Cardioblate جۇيەسىنىڭ ينتراوپەراتسيوندىق راديوجيىلىكتى ابلاتسياسى – يننوۆاتسيالىق تەحنولوگيالارىمەن وتالار جاسالا باستادى. بۇدان باسقا, ەندوۆاسكۋليارلىق حيرۋرگتەرمەن بىرلەسە وتىرا, پاتسيەنتتەرگە قيىن گيبريدتى وتالار جاسالۋدا. ورتالىقتىڭ تاعى ءبىر جەتىستىگى – جۇرەككە اشىق وپەراتسيا جاساۋ بارىسىندا ەكستراكورپورالدى مەمبراندى وكسيگەناتسيا ءادىسى ەنگىزىلدى. ءسويتىپ, دەم الىسى قيىنداعان جاندارعا وتا جاساۋ بارىسىندا ەگۋ ارقىلى قانىنا وتتەگى تولتىرىلاتىن بولدى. سونداي-اق, ينتەرۆەنتسيالىق كارديولوگيا ءدارىگەرلەرىنىڭ باستاماسىمەن تۋا بىتكەن جۇرەك اقاۋى بار ناۋقاستاردىڭ جۇرەك قارىنشاسىنداعى «كوپىردىڭ» اقاۋىن ترانسكاتەتەر ارقىلى جابۋعا ارنالعان تەحنولوگيا ەنگىزىلدى. قازاقستاندا العاش رەت ءبىر جاسقا دەيىنگى بالالارعا, ءتۋابىتتى جۇرەك اقاۋى بار سابيلەرگە, سونىمەن قاتار, ءبىر عانا قارىنشاسى بار جۇرەكتەرگە جوعارى تەحنولوگيالىق, كوپساتىلى كارديوحيرۋرگيالىق وتالار جاسالۋدا.
بولاشاقتا جۇرەگىندە اقاۋى بار ناۋقاستارعا جۇرەك ترانسپلانتاتسياسى بويىنشا وتالار, جۇرەك كلاپانىندا اقاۋى بار ناۋقاستارعا اورتالدى كلاپاندى تەرى ارقىلى پروتەزدەۋ, ارتەريالدى گيپەرتەنزيا تەراپياسىنا ينتەرۆەنتسيالىق ەمدەۋ, جۇرەكتە از ينۆازيۆتى ەندوسكوپيالىق وتالار, اريتمياسى بار بالالارعا جوعارى مامانداندىرىلعان كومەك كورسەتۋ, از ءينۆازيۆتى ەندوۆاسكۋليارلى ارالاسۋلار جوسپارلانۋدا.
ورتالىقتا جۇرەك ىرعاعىنىڭ بۇزىلۋى, جۇرەكتىڭ كەنەتتەن توقتاپ قالۋىنىڭ گەنەتيكالىق ۇردىستەرى تۋرالى عىلىمي-تەحنيكالىق جوبانى جۇزەگە اسىرۋ بويىنشا جۇمىس باستالدى. وسى جوبانىڭ جۇزەگە اسىرىلۋى جۇرەكتىڭ كەنەتتەن توقتاپ قالۋ قاۋپى جوعارى مەرتسات اريتمياسى بار ادامداردىڭ جۇرەك ىرعاعى بۇزىلۋىنىڭ دامۋ مەحانيزمى مەن سەبەپتەرىن انىقتاۋعا مۇمكىندىك بەرەدى جانە دياگنوستيكاسىنىڭ جاڭا ادىستەرىن ازىرلەۋگە كومەكتەسەدى.
– اڭگىمەڭىزگە راحمەت. ىستەرىڭىزگە ساتتىلىك تىلەيمىز.
اڭگىمەلەسكەن
جاراسباي سۇلەيمەنوۆ,
«ەگەمەن قازاقستان».