نۇر-سۇلتان قالاسىنىڭ قۇقىق قورعاۋ ورگاندارىنىڭ قىزمەتكەرلەرى جاپپاي توبەلەسكە قاتىسى بار دەگەن كۇدىكپەن 11 ادامعا قاتىستى تەرگەۋ جۇرگىزۋدە. توبەلەس سالدارىنان ەكى ەر ادام قازا تاپتى, تاعى ءبىر ادام جاراقات الدى, دەپ حابارلايدى Egemen.kz. بۇل تۋرالى قالالىق پوليتسيا دەپارتامەنتىنىڭ ءباسپاسوز قىزمەتى مالىمدەدى.
وقيعا 22 جەلتوقسان كۇنى كەشكە بەتون زاۋىتىنىڭ اۋماعىندا بولعان. ءتارتىپ ساقشىلارى ۇرىس قارىز مىندەتتەمەلەرىنە بايلانىستى تۋعانىن حابارلادى.
اتالعان دەرەك بويىنشا 11 ادام ۇستالدى. قاقتىعىس كەزىندە سۋىق جانە اتىس قارۋى قولدانىلعان.
توبەلەس ناتيجەسىندە ەكى ەر ادام اۋرۋحاناعا جەتكىزىلدى. بىرەۋىنىڭ كەۋدە قۋىسىنا وق تيگەن, ەكىنشى ادام ءىش قۋىسىنان پىشاق جاراقاتىن العان.
ەكەۋى دە العان جاراقاتتان قايتىس بولدى. ءبىراز ۋاقىتتان كەيىن وسى وقيعاعا قاتىسى بار تاعى ءبىر ادام اۋرۋحاناعا جەتكىزىلدى.
قازىرگى ۋاقىتتا قۇقىق قورعاۋ ورگاندارىنىڭ قىزمەتكەرلەرى سوتقا دەيىنگى تەرگەۋ جۇرگىزىپ جاتىر.