بۇگىن برازيليادا فۋتبولدان 20-شى الەم چەمپيوناتىنىڭ جەرەبەسىن تارتۋ وتكىزىلەدى. بۇل تۋرالى يتار-تاسس حابارلادى.
«الەمدىك دوداعا قاتىساتىن 32 قۇرامانى سەگىز توپقا ءبولىپ شىعارۋ جاھاندىق جارىستىڭ شەشۋشى ءساتى بولماعانىمەن, ماڭىزدى پروتسەسس بولىپ تابىلادى. 2014 جىلعى 14 ماۋسىمدا سان-پاۋلۋدا سورەدەن شىعاتىن تۋرنيرگە قاتىسۋشىلاردىڭ بۇدان ارعى تاعدىرى كوپ جاعدايدا وسىنداعى قارسىلاستارىنا بايلانىستى بولماق», – دەپ جازادى اگەنتتىك وسىعان وراي.
حالىقارالىق فۋتبول فەدەراتسياسى (فيفا) وسى جەرەبەگە دەيىن 32 كوماندانى ءتورت كارزەڭكەگە ءبولىپ قويدى. فيفا-نىڭ بيىلعى قازان ايىنداعى رەيتينگ-پاراعىنا سايكەس, ءبىرىنشى كارزەڭكەگە ەڭ ۇزدىك جەتى كوماندا, سونداي-اق الاڭ يەسى – برازيليا قۇراماسى ءتۇستى. ال قالعان كارزەڭكەلەر ءىس جۇزىندە قاتىسۋشى كوماندالاردىڭ گەوگرافيالىق پريتسيپتەرىنە قاراي تولتىرىلدى.
سونىمەن, ءبىرىنشى كارزەڭكەگە برازيليا, يسپانيا, گەرمانيا, ارگەنتينا, كولۋمبيا, بەلگيا, ۋرۋگۆاي, شۆەيتساريا سالىندى. ەكىنشى كارزەڭكە ءبىر توپتا ءبىر قۇرلىقتىڭ ەكى بىردەي كومانداسى بولماۋى كەرەك دەگەن قاعيداتپەن افريكا جانە وڭتۇستىك امەريكا قۇرامالارىنان قۇرالدى. بىراق بۇلاردىڭ سانى 7 عانا بولعاندىقتان, 8-ءشى كوماندانى ەۋروپادان الۋعا ۇيعارىم جاسالدى. سەبەبى, كارى قۇرلىقتىڭ 12 كومانداسى تولىق ەكى كارزەڭكەنى تولتىرعانىمەن, 13-ءشىسى وعان سىيماي قالاتىن. سوندىقتان ۇيىمداستىرۋشىلار مۇنى قازان ايىندا ەڭ تومەنگى كورسەتكىشتى فرانتسياعا بەرمەك بولعان. بىراق فيفا سوسىن مۇنىڭ بۇدان دا كۇردەلى ءتۇيىنىن ويلاپ تاپتى. ول جەرەبە سالۋ كەزىندە ەۋروپانىڭ شارى ەڭ سوڭىندا قالعان قۇراماسىن وسى توپتىڭ بولىنىسىنە قويۋعا شەشىم ەتتى. ءسويتىپ, ەكىنشى كارزەڭكەگە الجير, گانا, كامەرۋن, كوت-د`يۆۋار, نيگەريا, چيلي جانە ەكۆادور ءتۇستى. ءۇشىنشى كارزەڭكە سولتۇستىك امەريكا جانە ازيا قۇرلىعىنىڭ كوماندالارىمەن توپتاستى. ولاردىڭ اراسىندا گوندۋراس, كوستا-ريكا, مەكسيكا, اقش, اۆستراليا, يران, وڭتۇستىك كورەيا جانە جاپونيا قۇرامالارى بار. ال ءتورتىنشى كارزەڭكەگە ەۋروپانىڭ ءبىرىنشى كارزەڭكەگە كىرمەي قالعان 9 قۇراماسى جينالدى. جوعارىدا ايتىلعانداي, ەكىنشى كارزەڭكەدەگى 7 كوماندانىڭ قاتارىن وسىنداعى ءبىر «ارتىق» ۇجىم جەرەبە سالۋ كەزىندە تولىقتىرادى. مۇنداعىلار انگليا, بوسنيا جانە گەرتسوگوۆينا, گرەكيا, يتاليا, گوللانديا, پورتۋگاليا, رەسەي, فرانتسيا جانە حورۆاتيا قۇرامالارى بولىپ وتىر.
جەرەبە تارتۋ كەزىندە بەرلىق سەگىز توپتىڭ قۇرامى انىقتالىپ بولعاننان كەيىن, ەكىنشى-ءتورتىنشى كارزەڭكەلەردەگى قاتىسۋشىلاردىڭ رەتتىك ساندارىن انىقتاۋ ماقساتىندا تاعى ءبىر جەرەبە وتكىزىلەدى. تەك وسىدان كەيىن عانا ءتۋرنيردىڭ ازىرگە تسيفرلىق ۆاريانت بويىنشا جاساپ قويىلعان توپتىق كەستەسى كوماندالاردىڭ اتتارىمەن بىرگە جاريا بولادى.
ايدار ورىسباەۆ.
دەرەككوز: Itar-tass.com