قازاقستان رەسپۋبليكاسىنىڭ باس پروكۋرورى اسحات داۋىلباەۆ كاناداعا جاساعان ساپارى بارىسىندا بىرقاتار مەملەكەتتىك ورگان باسشىلارىمەن كەزدەستى. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
وسىدان ەكى كۇن بۇرىن ا. داۋىلباەۆ سەنات سپيكەرى نوەل كينسەللامەن كەزدەسۋ كەزىندە قۇقىقتىق سالاداعى ىنتىماقتاستىقتىڭ كەلەشەگى تۋرالى وي ءبولىستى. قازاقستان مەن كانادا اراسىندا دوستىق پەن ءتيىمدى قاتىناستىڭ ورناعانىنا لايىقتى باعا بەرگەن اڭگىمەلەسۋشىلەر وسى جولعى ساپاردىڭ قۇقىقتىق جۇيەنى دامىتۋعا ارنالعانىن اتاپ ءوتتى. ءسوز ورايىندا باس پروكۋرور ا. داۋىلباەۆ قازاقستان پروكۋراتۋراسىنىڭ قاداعالاۋشىلىق جانە قۇقىق قورعاۋ قىزمەتىنىڭ نەگىزگى باعىتتارىن ايتا كەلە, قازىرگى زامانعى قاۋىپ-قاتەرلەرگە قارسى تۇرۋ ورايىندا حالىقارالىق قۇقىقتىق ىنتىماقتاستىقتى كەڭەيتۋدىڭ ماڭىزدىلىعىنا ايرىقشا نازار اۋدارىلعانىنا ماڭىز بەردى.
كانادا ازىرگە قازاقستان قىلمىستىق ىستەر بويىنشا ءوزارا قۇقىقتىق كومەك كورسەتۋ تۋرالى كەلىسىم-شارت جاساسقان امەريكا قۇرلىعىنداعى ءبىرىنشى ءارى جالعىز مەملەكەت بولىپ ەسەپتەلەدى. ال بۇگىندە قول قويىلعان كەلىسىم-شارت راتيفيكاتسيالانۋعا ازىرلەنۋ ۇستىندە.
قۇقىقتىق سالاداعى ءوزارا ىنتىماقتاستىقتى تەرەڭدەتۋ ماقساتىندا سەناتتىڭ سپيكەرى كريمينولوگيا جانە حالىقارالىق قۇقىقتى وقيتىن ستۋدەنتتەرمەن الماسۋدىڭ بىرلەسكەن باعدارلاماسىن جاساۋعا ۇسىنىس جاسادى.
باس پروكۋرور كانادانىڭ ازاماتتىق جانە يمميگراتسيا ءمينيسترى كريس الەكساندەرمەن كەزدەسۋى بارىسىندا كوشى-قون پروتسەسىن قۇقىقتىق رەتتەۋ سالاسىنداعى كانادالىق تاجىريبەنى زەردەلەۋگە نيەتتەستىگىن ءبىلدىردى. سونداي-اق; كانادا ادىلەت ءمينيسترىنىڭ ءبىرىنشى ورىنباسارى جانە باس پروكۋرورى ۋيليام پينتنيمەن كەزدەسۋ بارىسىندا ترانسۇلتتىق ۇيىمداسقان قىلمىسپەن, ەسىرتكىنىڭ زاڭسىز اينالىمىمەن, كيبەرقىلمىستىلىقپەن جانە تەرروريزممەن كۇرەس سالالارىنداعى ءوزارا ءىس-قيمىلدىڭ وزەكتى ماسەلەلەرىن تالقىلادى. كوشى-قون اعىنىنا باقىلاۋ مەن قىلمىسكەرلەردى ەكستراديتسيالاۋ ماسەلەسى دە نازاردان قاعىس قالعان جوق. وسى رەتتە, قازاقستاننىڭ قىلمىستىق جانە قىلمىستىق اتقارۋ زاڭنامالارىن رەفورمالاۋ سالاسىندا ەۋروپالىق ەلدەرمەن ىنتىماقتاستىق تاجىريبەسى كانادالىق تاراپتىڭ قىزىعۋشىلىعىن تۋعىزدى.
كەزدەسۋ قورىتىندىسىندا تاراپتار ديالوگتى جالعاستىرۋعا جانە ءبىزدىڭ ەلدەر اراسىنداعى كەلىسىم-شارتتىق-قۇقىقتىق بازانى ودان ءارى كەڭەيتۋگە ۋاعدالاستى.
دانيار تۇيمەباي.
دەرەككوز: باس پروكۋراتۋرانىڭ ءباسپاسوز قىزمەتى