كەيىنگى جىلدارى قوستاناي وبلىسىندا مال ۇرلىعى بەلەڭ الىپ كەتتى. وبلىستىق پوليتسيا دەپارتامەنتىنىڭ باستىعى بەكەت ايتماعامبەتوۆ ايماق تۇرعىندارىمەن الەۋمەتتىك جەلى ارقىلى ونلاين رەجىمدە وتكەن كەزدەسۋىندە وڭىردە بيىل 189 مال ۇرلىعىنىڭ تىركەلگەنىن تىلگە تيەك ەتە كەلىپ, قىلمىستىڭ بۇل ءتۇرى كوبىنە تۇرعىنداردىڭ قوراداعى مالدى قاراۋسىز جىبەرە سالۋىنىڭ سالدارىنان بولاتىنىن ايتتى.
ماسەلەن, بيىل وبلىستا ورىن العان 124 ۇرلىق ورىستە ەركىن جايىلىپ جۇرگەن مالعا قاتىستى جاسالسا, مۇنىڭ سىرتىندا, قاراۋسىز قالىپ, بەتىمەن جايىلىپ كەتكەن 150 باس مالدى پوليتسيا ىزدەپ تاۋىپ, يەلەرىنە قايتارىپ بەرگەن. دەگەنمەن دەپارتامەنت باستىعى مال ۇرلىعى بيىل وتكەن جىلمەن سالىستىرعاندا 30%-عا ازايىپ, اتالعان قىلمىستىڭ اشىلۋ دەڭگەيىنىڭ دە جوعارى ەكەنىن جەتكىزدى. «بۇل كورسەتكىشكە ەڭ الدىمەن پوليتسيا قىزمەتكەرلەرىنىڭ كاسىبي شەبەرلىگىنىڭ ناتيجەسىندە قول جەتكىزىپ وتىرمىز», دەگەن دەپارتامەنت باسشىسىنىڭ ءسوزىنىڭ جانى بار. مىسالى, بيىل پاترۋلدىك پوليتسيا قىزمەتكەرلەرى بىرنەشە جىل بويى مال ۇرلىعىمەن اينالىسىپ كەلگەن قىلمىستىق توپتى ۇستادى. قاراپايىم حالىقتى قان قاقساتقان قىلمىستىق توپتىڭ وبلىستىڭ 6 اۋدانىنداعى 11 ۇيدەن 12 جىلقى, 5 ءىرى قارا, 68 ۇساق مال, 1 مال تاسيتىن تىركەمە جانە «ۆاز» 2112 اۆتوكولىگىن ۇرلاعانى انىقتالىپ وتىر. جابىرلەنۋشىلەرگە كەلگەن شىعىن كولەمى 22 ملن تەڭگەدەن اسىپ كەتەدى.
كۇدىكتىلەر قولعا تۇسكەنىمەن, ءاۋ باستا وزدەرىنە تاعىلعان ايىپتى مويىنداماي, جاۋاپتان جالتارىپ كەتە بەردى. بىرنەشە جىل بويى, ءار ۋاقىت كەزەڭىندە, ءبىر-بىرىنەن شالعاي جاتقان ءار ەلدى مەكەندە جاسالعان شىتىرمان قىلمىستىڭ بەتىن اشۋ شىنىمەن دە اسا قيىن شارۋا. مۇنداي ساتتە اسا تاجىريبەلى تەرگەۋشىنىڭ ءوزى تىعىرىققا تىرەلىپ, ءىس تولىق اشىلماي قالۋى مۇمكىن. الايدا بۇكىل وبلىس جۇرتشىلىعىن دۇرلىكتىرگەن اتىشۋلى ءىستى تالدىرماش قانا كەلگەن قازاقتىڭ قاراكوز قىزى باستان-اياق الىپ شىقتى. قوستانايدىڭ سايىن دالاسىندا قاسقىرداي جورتىپ, اۋىل-اۋىلدى تورۋىلداپ ءجۇرىپ, تالاي وتباسىن ناپاقاسىنان ايىرىپ, قوراداعى مالىن وڭگەرىپ الىپ كەتكەن «ەكى اياقتى قاسقىرلاردى» جارتى جىل تالماي تەرگەپ, قىلمىستىق ىسكە تىركەلگەن 27 ەپيزود بويىنشا بۇلتارتپاس دالەلمەن ارقايسىسىنا ايىبىن ارقالاتقان قىلىشتىڭ جۇزىندەي وتكىر مىنەزدى وجەت قىز – قامىستى اۋداندىق پوليتسيا ءبولىمىنىڭ اعا تەرگەۋشىسى, پوليتسيا مايورى جانار توقاەۆا ەدى.
– قىلمىستىق توپتىڭ قۇرامىندا ءۇش ادام بار. ۇشەۋى دە التىنسارين اۋدانىنداعى سيلانتەۆ اۋىلىنىڭ تۇرعىندارى – ارىستان مۇحامەتوۆ پەن بەكتەمىس رامازانوۆ 32 جاستا, ال باۋىرجان بەگىموۆ وتىز تورتتە. اتىشۋلى قىلمىسقا قاتىستى ءبىر-ەكى ەپيزودقا عانا توقتالايىن, بىلتىر ناۋرىز ايىندا ۇشەۋى سيلانتەۆ اۋىلىنىڭ تۇرعىنى ك.جىلقىشينوۆتىڭ 2 بيەسىن 3 ق ۇلىنىمەن قوسىپ ۇرلاپ اكەتكەن. مال يەسىنە كەلگەن جالپى شىعىن كولەمى 1 ملن 250 مىڭ تەڭگە شاماسىندا. سول جىلى مامىر ايىندا ب.بەگىموۆ باستاعان قىلمىستىق توپ سارىكولدەن ۇزىنكولگە باراتىن كۇرە جولدىڭ بويىندا جەرگىلىكتى تۇرعىن ا.ساكەنوۆانىڭ 4 جاسار اسىل تۇقىمدى بۇقاشىعىن ۇرلايدى. بارىمتاشىلار ءىرى قارا مالدى الدىمەن مىلتىقپەن اتىپ, ودان كەيىن ەتىن ءبولىپ, كولىككە تيەپ العان. تەرگەۋ بارىسىندا وقيعا ورنى مۇقيات تەكسەرىلدى. ناتيجەسىندە, سارىكول اۋدانىنا قاراستى پاۆلىش-سپاسسك اۋىلىنان 4 جارىم شاقىرىم جەردە «يج-16» ۇلگىسىندەگى 16 كاليبرلى مىلتىقتىڭ ەكى وعى تابىلدى. تەرگەۋ بارىسىندا كۇدىكتىلەردى بۇلتارتپاي مويىنداتۋ ءۇشىن ءاربىر قىلمىستى ناقتى ايعاقتارمەن دالەلدەۋ كەرەك. بۇل شارۋا وڭايعا سوققان جوق, الايدا كريميناليستيكا سالاسىنداعى ارىپتەستەرىمنىڭ كومەگىمەن ءۇش كۇدىكتىنىڭ دە قىلمىسى دالەلدەنىپ, ءىس سوتقا جىبەرىلدى. وسىلايشا, وبلىستىق سوت قىلمىسكەرلەردىڭ ارقايسىسىن 5 جىلعا باس بوستاندىعىنان ايىرۋ تۋرالى ۇكىم شىعاردى, دەيدى بىلىكتى ج.توقاەۆا.
تەرگەۋ سالاسىندا 13 جىل بويى ەڭبەك ەتىپ كەلە جاتقان بىلىكتى مامان وسى ۋاقىتقا دەيىن جۇزگە جۋىق قىلمىستى اشكەرەلەدى. سونىڭ ىشىندە ءالى كۇنگە دەيىن جاناردىڭ جادىنان كەتپەيتىن تاعى ءبىر اسا اۋىر قىلمىستىق ءىس بار. پوليتسيا مايورى بىلتىر قوستانايدا 26 بويجەتكەندى التى جىل بويى جەزوكشەلىكپەن اينالىسۋعا ماجبۇرلەپ كەلگەن 6 ادامنان قۇرالعان قىلمىستىق توپقا قاتىستى تەرگەۋ ءىسىن اياقتاپ, سوتقا جىبەردى.
– جابىرلەنۋشىلەردىڭ ءبارىن ىزدەپ تاپتىق. ولاردىڭ بەسەۋى كامەلەتكە تولماعاندار. ەڭ كىشىسى 14 جاستا. سوت شەشىمىمەن قىلمىستىق توپتىڭ ۇيىمداستىرۋشىسى 18 جىلعا سوتتالدى. قالعاندارى 15-16 جىلعا باس بوستاندىعىنان ايىرۋ جازاسىنا كەسىلدى, – دەدى تەرگەۋشى.
«ايەل ادامعا تەرگەۋشى بولۋ قيىن ەمەس پە, پوليتسياعا قىزمەتكە كەلۋگە نە تۇرتكى بولدى؟» دەپ سۇراپ ەدىم, «مەكتەپ قابىرعاسىندا جۇرگەندە تەرگەۋشى بولسام عوي دەپ ارماندايتىنمىن. ويتكەنى ول كەزدە تەلەديداردان «سپرۋت» ءفيلمى ءجۇرىپ جاتتى. ءفيلمنىڭ باس كەيىپكەرى, ادىلدىك جوقشىسى كوميسسار كاتانيدىڭ قايسارلىعى مەن جانكەشتىلىگىنە قايران قالاتىنمىن. قيالشىل جاس كەزىمىز عوي, وسىنداي بولسام عوي دەپ ارماندايتىنمىن. مەن ارمانى ورىندالعان اداممىن», دەدى جانار جىميىپ.
قوستاناي وبلىسى