كەشە وڭتۇستىك افريكا رەسپۋبليكاسىنىڭ بۇرىنعى پرەزيدەنتى نەلسون ماندەلا قايتىس بولدى. بۇل تۋرالى يتار-تاسس حابارلادى.
وار پرەزيدەنتى دجەيكوب زۋما بۇل كۇندى قارالى كۇن دەپ اتاپ, ەل اۋماعىنداعى بۇكىل تۋلاردى تۇسىرۋگە تاپسىرما بەردى. «نەلسون ماندەلا 5 جەلتوقسان كۇنى 20 ساعات 50 مينۋتتا تۋعان-تۋىستارىنىڭ ورتاسىندا تىپ-تىنىش كەتىپ قالدى. ءبىزدىڭ حالقىمىز ۇلى پەرزەنتىنەن ايرىلدى», – دەدى ول.
نوبەل سىيلىعىنىڭ لاۋرەاتى, اپارتەيدكە قارسى كۇرەستىڭ ۇلتتىق قاھارمانىمەن قوشتاسۋ ءۇشىن ونىڭ يوحاننەسبۋرگ قالاسىنداعى ءۇيىنىڭ الدىنا جۇزدەگەن ادام جينالدى.
مارقۇمنىڭ وتباسى وار-دىڭ تۇڭعىش قارا ءناسىلدى پرەزيدەنتىن كۋنۋ قالاسى باتىس كەيپ پروۆينتسياسىندا جەرلەمەك. سەبەبى, مۇندا ماندەلانىڭ ۇلكەن ۇلى ماكاتو, تۇڭعىش قىزى ماكازيۆە مەن ەكىنشى ۇلى تەمبەكيلە جەرلەنگەن ەكەن.
وڭتۇستىك افريكا رەسپۋبليكاسىنىڭ تاريحىنداعى ءبىرىنشى قارا ءناسىلدى پرەزيدەنت 1918 جىلى 18 شىلدەدە كۋنۋ دەرەۆنياسىندا تەمبۋ تايپاسىنىڭ كوسەمى وتباسىندا تۋعان. دۇنيەگە كەلگەن كەزىندە وعان كوسا تىلىنەن سوزبە-ءسوز اۋدارعاندا «اعاشتان بۇتاق جۇلۋ», ال بەينەلى تىلدە «ب ۇلىڭعىر» دەگەن ماعىنا بەرەتىن «روليحاحلا» اتتى ەسىم بەرىلگەن ەكەن. ال مەكتەپتە وقي باستاعان شاعىندا اعىلشىننىڭ «نەلسون» دەگەن اتىن الادى. كەيىنىرەك ول وزدەرىنىڭ توبىنىڭ ۇيعارىمىمەن ماديبا اتالا باستايدى.
ماندەلا 1944 جىلى وڭتۇستىك افريكانىڭ ۇلتتىق كونگرەسى (اۇك) قۇرامىنا مۇشە بولىپ ەندى. ول 1952 جىلى وسى كونگرەستىڭ ترانسۆاال پروۆينتسياسىنداعى ۇيىمىن باسقارۋ تىزگىنىن قولعا الدى. وسى جۇمىستاعى بەلسەندىلىگى ءۇشىن 1964 جىلى 12 ماۋسىمدا «ۇكىمەتتى قۇلاتۋ ءۇشىن قارۋلى كوتەرىلىس ۇيىمداستىردى» دەگەن ايىپتاۋمەن ءومىر بويعى تۇرمەدە وتىرۋ جازاسىنا كەسىلدى. 1982 جىلعا دەيىن روببەن ارالىندا وتىردى. سودان كەيىن كەيپتاۋنداعى «پولسموور» اباقتىسىنا اۋدارىلدى. ول 1991 جىلعى 11 اقپاندا الەم قاۋىمداستىعىنىڭ قىسىمىمەن تۇرمەدەن بوساپ, بوستاندىققا شىقتى.
نەلسون ماندەلا 1994 جىلدىڭ 9 مامىرىنان 1999 جىلدىڭ 16 ماۋسىمىنا دەيىن وار-دىڭ پرەزيدەنتى بولدى. ونىڭ حالىقارالىق ناگرادالارى دا وتە كوپ. سونىڭ ىشىندە 1993 جىلى العان نوبەل سىيلىعىنىڭ لاۋرەاتى اتاعى دا بار.
نەلسون ماندەلا ءۇشىنشى مارتەسىندە موزامبيكتىڭ اۆيااپاتتا قازا تاپقان پرەزيدەنتى سامورا ماشەلدىڭ جەسىرى – گراسە ماشەلگە ۇيلەنگەن. ونىڭ بەس ۇلى بولدى. بۇلاردىڭ ۇشەۋ قازىر ومىردە جوق. ۇلدارىنان قىرىقتان اسا نەمەرە مەن شوبەرە كوردى.
ايدار ورىسباەۆ.
دەرەككوز: Itar-tass.com