قر سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ولجاس بەكتەنوۆ مەملەكەتتىك قىزمەتشىلەردىڭ, پارلامەنت دەپۋتاتتارى مەن سۋديالارعا شەتەلدىك بانكتەردە شوت اشۋعا تىيىم سالۋعا قاتىستى زاڭداعى جاڭا نوۆەللانىڭ ءمان-جايىن ءتۇسىندىردى, دەپ حابارلايدى Egemen.kz
«مەملەكەتتىك قىزمەت – بىرقاتار شەكتەۋلەردى قابىلداۋدى كوزدەيتىن قىزمەتتىڭ ەرەكشە ءتۇرى. وسى تۇزەتۋلەردى ازىرلەۋ كەزىندە ەل مەن حالىقتىڭ مۇددەسى ءۇشىن قىزمەت ەتۋ يدەولوگياسى باسشىلىققا الىندى. ەندى مەملەكەتتىك قىزمەتشىلەردى قىزمەتكە تاعايىنداۋ كەزىندە شەتەلدەگى شوتتارىن جابۋ ءۇشىن التى ايلىق مەرزىم بەرىلەدى. جۇمىس ىستەپ جۇرگەن مەملەكەتتىك قىزمەتشىلەرگە قاتىستى ءسوز قوزعاساق, ولارعا زاڭ قولدانىسقا ەنگىزىلگەن كۇننەن باستاپ قازاقستان رەسپۋبليكاسىنان تىس اۋماقتا ورنالاسقان شەتەلدىك بانكتىك شوتتاردى جابۋعا التى اي بەرىلەدى», دەدى ولجاس بەكتەنوۆ وكق-دا وتكەن ءباسپاسوز ءماسليحاتىندا.
ونىڭ ايتۋىنشا, بۇل رەتتە مەملەكەتتىك قىزمەتشىلەردىڭ شەتەلدىك بانكتەردە شوتتارىنىڭ بولۋىنا قۇقىعى بار جاعدايلار ايقىندالعان.
«ولاردىڭ قاتارىندا: شەتەلدە جۇمىس ىستەۋ, وقۋ, تاعىلىمدامادان ءوتۋ, ءىسساپار نەمەسە ەمدەلۋدەن ءوتۋ, كامەلەتكە تولماعان بالانىڭ زاڭدى وكىلى رەتىندە شەتەلدە بولۋ جاعدايلارى بار. ەگەر مەملەكەتتىك قىزمەتشى شەتەلدىك بانكتەگى شوتتى جاپقىسى كەلمەسە, مەملەكەتتىك قىزمەتتەن كەتۋگە نيەت بىلدىرسە, وندا ول ءوز ەركىمەن جۇمىستان شىعۋ تۋرالى ءوتىنىش بەرە الادى», دەدى ول.