بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق ءوسۋدى قالپىنا كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكى وقىلىمدا قارالدى. قۇجاتقا تولىقتىرۋلار ەنگىزىلگەندىكتەن, زاڭ جوباسى ماجىلىسكە قايتارىلدى, دەپ حابارلايدى Egemen.kz.
زاڭ جوباسى ەل ەكونوميكاسىنىڭ ساپالى جانە تۇراقتى دامۋىن زاڭنامالىق تۇرعىدان قامتاماسىز ەتۋ ماقساتىندا ازىرلەندى. اتالعان زاڭ جوباسىمەن قازاقستان رەسپۋبليكاسىنىڭ 85 زاڭنامالىق اكتىسىنە وزگەرىستەر مەن تولىقتىرۋلار ەنگىزىلەدى.
قۇجاتتا سالىمشىلاردىڭ تۇرعىن ءۇي جاعدايلارىن جاقسارتۋ جانە ەمدەلۋگە اقى تولەۋ ءۇشىن بىرىڭعاي زەينەتاقى جيناقتاۋ قورىنداعى مىندەتتى زەينەتاقى جارنالارى جانە مىندەتتى كاسىپتىك زەينەتاقى جارنالارى ەسەبىنەن بىرجولعى زەينەتاقى تولەمدەرىنە قۇقىعى كوزدەلەدى.
سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ قورىتىندىسىنا قاراعاندا, زاڭ جوباسىندا بەيرەزيدەنت-بانك فيليالىن اشۋعا رۇقسات بەرۋدى, ليتسەنزيالاۋ, دەپوزيتتەرگە كەپىلدىك بەرۋ جانە ساقتاندىرۋ تولەمدەرى, سونداي-اق قىزمەتىن توقتاتۋ ماسەلەلەرىن قوسا العاندا, قازاقستان رەسپۋبليكاسىنداعى بەيرەزيدەنت-بانكتەردىڭ فيليالدارىن, بەيرەزيدەنت ساقتاندىرۋۇيىمدارىنىڭ فيليالدارىن قۇرۋ جانە ولاردىڭ قىزمەتىن جۇزەگە اسىرۋ ءتارتىبى رەگلامەنتتەلەدى.
زاڭ جوباسىندا جەر زاڭناماسىنا ەرەكشە قورعالاتىن تابيعي اۋماقتاردىڭ جەرىن بوسالقى جەرگە اۋىستىرۋ تارتىبىنە قاتىستى وزگەرىستەر ەنگىزىلەدى, مۇنداي اۋىستىرۋ ءۇشىن ەرەكشە جاعدايلاردىڭ تىزبەسى كەڭەيتىلەدى. بۇدان باسقا, اۆتوموبيل كولىگى سالاسىنداعى تاسىمالداۋ قىزمەتىنە بايلانىستى قۇجاتتاردى تىركەۋدى, ەسەپكە الۋدى, وڭدەۋدى جانە ساقتاۋدى قامتاماسىز ەتۋگە باعىتتالعان تاسىمالداۋ سالاسىنداعى بىرىڭعاي اقپاراتتىق جۇيەنى ەنگىزۋ, سونداي-اق زياتكەرلىك كولىك جۇيەسىن قۇرۋ جانە ونىڭ جۇمىس ىستەۋ ءتارتىبى كوزدەلەدى. قۇجات اياسىندا مەملەكەتكە تيەسىلى باعالى قاعازداردى شەت مەملەكەتتەردىڭ قور بيرجالارىندا وتكىزۋ مۇمكىندىگى بەرىلەدى.
زاڭ جوباسىندا «ەلەكتروندىق ۇكىمەت» ۆەب-پورتالى ارقىلى ەلەكتروندىق نىساندا مەملەكەتتىك قىزمەتتەر كورسەتۋ جانە «ەلەكتروندىق ۇكىمەت» شليۋزىندە ورنالاسقان سەرۆيستەرمەن ينتەگراتسيالانعان اقپاراتتاندىرۋ وبەكتىلەرىنىڭ قىزمەتى رەگلامەنتتەلەدى. زاڭ جوباسىمەن جۇمىس بارىسىندا قر پارلامەنتى سەناتى كوميتەتتەرىنىڭ بىرقاتار وزگەرىستەر مەن تولىقتىرۋلار ەنگىزۋ قاجەتتىگى تۋىندادى. سەناتور ەدىل مامىتبەكوۆ قۇجاتتى قاراۋ كەزىندەگى تالقىلاۋ بارىسىندا ناقتىلاۋشى سيپاتتاعى وزگەرىستەر مەن تولىقتىرۋلار ەنگىزۋ قاجەتتىگى بولعانىن اتاپ ءوتتى. وسى ورايدا ىشكى قاراما-قايشىلىقتى بولدىرماۋ جانە زاڭ جوباسىنىڭ نورمالارىن قولدانىسقا ەنگىزۋ ەسكەرىلگەن. ءوز كەزەگىندە سەنات توراعاسى ماۋلەن اشىمباەۆ اتالعان زاع جوباسىنا قاتىستى پىكىر ءبىلدىردى.
«مەملەكەت باسشىسىنىڭ تاپسىرماسىمەن ازاماتتاردىڭ ءوز زەينەتاقى جيناعىنىڭ ءبىر بولىگىن باسپانا الۋعا جانە ەمدەلۋگە جۇمساۋى ءۇشىن قولدانۋ قۇقىعى بەلگىلەنەدى. سونداي-اق, كاسىپكەرلەرگە ءوزى بىرلەسىپ جۇمىس ىستەيتىن تاراپتىڭ جاعدايىن انىقتاۋعا جانە ءىس-ارەكەتىنىڭ تاۋەكەلىن ازايتۋعا مۇمكىندىك بەرەتىن بيزنەس-سەرىكتەستەردىڭ ءتىزىلىمىن دايىنداۋ قاراستىرىلعان», دەدى م. اشىمباەۆ.
سەنات توراعاسى «بىرىڭعاي تەرەزە» قاعيداسى بويىنشا «بيزنەسكە ارنالعان ۇكىمەت» قىزمەتىن ىسكە قوسۋ كوزدەلىپ وتىرعانىن اتاپ ءوتتى. زاڭ جوباسى ميكروقارجى ۇيىمدارى مەن باسشىلارعا قويىلاتىن تالاپتاردى ارتتىرۋدى دا كوزدەيدى. بۇل قارىز الۋشىلاردىڭ مۇددەلەرىن قورعاۋعا جانە قارجى نارىعىندا تۇراقتىلىقتى قامتاماسىز ەتۋگە مۇمكىندىك بەرەدى. سەناتورلار زاڭ جوباسىن پىسىقتاپ, ماجىلىسكە قايتاردى.