قالدىقتاردىڭ كلاسسيفيكاتسياسى ەۋروپالىق كاتالوگقا سايكەستەندىرىلدى. بۇل تۋرالى سەناتتىڭ جالپى وتىرىسىندا ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتتى, دەپ حابارلايدى Egemen.kz
ونىڭ ايتۋىنشا, ءوندىرىس جانە تۇتىنۋ قالدىقتارى ماسەلەلەرىن شەشۋ ماقساتىندا قالدىقتارمەن جۇمىس ىستەۋ سالاسىنداعى تەرمينولوگيا مەن ەرەجەلەر حالىقارالىق تالاپتارعا سايكەس كەلتىرىلگەن.
«جوبادا قالدىقتارمەن كەزەڭ-كەزەڭىمەن جۇمىس ىستەۋگە باعىتتالعان قالدىقتار يەرارحياسى قاراستىرىلعان. بۇل دەگەنىمىز, ەڭ الدىمەن, جينالاتىن قالدىقتاردى ازايتۋعا باعىتتالعان نورما. جينالعان قالدىقتاردى قايتا پايدالانۋ, قايتا وڭدەۋ, كادەگە جاراتۋ قاجەت. تەك وسىدان كەيىن عانا پوليگونداردا كومۋ قاجەتتىلىگىن قاراستىرۋ كەرەك. سونداي-اق, حالىقتى تۇرمىستىق-قاتتى قالدىقتاردى جيناۋدىڭ, كادەگە جاراتۋدىڭ جانە قايتا وڭدەۋدىڭ, قالدىقتاردى بولەك جيناۋدىڭ راتسيونالدى جۇيەسى تۋرالى حاباردار ەتۋ جۇزەگە اسىرىلاتىن بولادى», دەدى مينيستر قر ەكولوگيالىق كودەكسىنىڭ جوباسىن تالقىلاۋ كەزىندە.
وسى ورايدا ول قالدىقتاردىڭ كلاسسيفيكاتسياسى ەۋروپالىق كاتالوگقا سايكەستەندىرىلگەنىن جەتكىزدى.
«وندا قاۋىپتى ەمەس تە, قاۋىپتى دە قالدىقتاردىڭ تىزبەسى كورسەتىلەدى. بۇل رەتتە, زاڭسىز قوقىس تاستاۋ ماسەلەسىن جۇيەلى تۇردە شەشۋ ءۇشىن جاڭا ەكولوگيالىق كودەكستە قوقىس شىعاراتىن كولىكتەرگە GPS-داتچيكتەردى مىندەتتى تۇردە ورناتۋ ماسەلەسى كوزدەلگەن», دەدى مىرزاعاليەۆ.
بۇدان بۇرىن حابارلانعانداي, ەلىمىزدەگى 50 ءىرى كاسىپورىندى ەڭ وزىق قولجەتىمدى تەحنولوگيالارعا اۋىستىرۋ جوسپارلانعان.