ىندەتتەن كەيىن وكپەنى قالپىنا كەلتىرۋ جۇمىستارى قالاي جۇرەدى

ونىڭ ايتۋىنشا, كوروناۆيرۋس ينفەكتسياسى بىرنەشە كەزەڭدە بولادى. ءبىرىنشىسى – ينكۋباتسيالىق كەزەڭ, وندا ۆيرۋس ادام اعزاسىنا تۇسكەنىمەن, كلينيكالىق سيمپتومدار كورىنبەيدى.

ەكىنشىسى – جرۆي-گە ۇقساس كەزەڭ, وسى ۋاقىتتا دەنە قىزۋى كوتەرىلىپ, تەرشەڭدىك پەن ۇيقىشىلدىق بايقالادى.

ءۇشىنشىسى – وكپەنىڭ قابىنۋى, ياعني وسى كەزەڭدە وكپە تىندەرىنە زاقىم كەلىپ, ترومبوۆاسكۋليت بولادى. ءبىرىنشى كەزەڭدە وكپەگە زاقىم كەلمەيدى, سوندىقتان العاشقى ءۇش-بەس كۇندە كومپيۋتەرلىك توموگرافيادان وتكەنىمەن, وكپەدە ەشتەڭە كورىنبەۋى مۇمكىن.

«وكپەدەگى بەلگىلەر ينفەكتسيا جۇققاننان كەيىنگى جەتىنشى-سەگىزىنشى كۇندە بايقالادى. جەتىنشى كۇندە كومپيۋتەرلىك توموگرافيادان وكپەنىڭ زاقىمدانۋىن تەك 7-8 پايىز دەڭگەيىندە كورۋگە بولادى, ال 14-ءشى كۇنگە قاراي وكپە 50 پايىزعا دەيىن زاقىمدانۋى مۇمكىن», دەدى دارىگەر.

كومپيۋتەرلىك توموگرافيانى جوتەل مەن ەنتىگۋ پايدا بولعاندا جاساۋ كەرەك. وكپەنىڭ زاقىمدانۋى كورسەتكىشى ناۋقاس جاعدايىنىڭ اۋىرلىعىن كورسەتپەيدى, سەبەبى ىندەتپەن قاتار ترومبوۆاسكۋليت جۇرەدى. بۇل تۇرعىدا قان قويۋلانىپ, ترومبتار پايدا بولادى. وسى كورسەتكىشتەرگە ادامنىڭ دەنساۋلىق جاعداي تىكەلەي بايلانىستى.

كەيبىر ناۋقاستاردا وكپەسى 60-70 پايىزعا زاقىمدانعانىمەن, وتتەك ساتۋراتسياسى جاقسى دەڭگەيدە كورىنەدى. سونىمەن قاتار وكپە ءتىنى 30 پايىزعا زاقىمدانعان كەيبىر ادامداردا وتتەك ساتۋراتسياسى 85-كە دەيىن تومەندەگەن جاعدايلار كەزدەستى. ويتكەنى تامىرلاردا قاننىڭ اينالىمى باياۋلاپ, كەرى اسەرى بولادى. دارىگەر كوروناۆيرۋستان ەمدەلگەننەن كەيىن وكپەنى قالپىنا كەلتىرۋگە قاتىستى كەڭەس بەردى.

«ستاتسيوناردان شىققاننان كەيىن تىنىس الۋ گيمناستيكاسىن جاساۋ ماڭىزدى. وسى ورايدا ءتۇرلى جاتتىعۋلار بار, ونى كۇنىنە 3-4 رەت جاساۋ كەرەك. كوروناۆيرۋستان ەمدەلگەننەن كەيىن اعزاعا سالقىن تيگىزبەۋ قاجەت, سونداي-اق باسقا ينفەكتسيالاردى جۇقتىرۋدان ساقتانۋ كەرەك», دەدى ك. گاركالوۆ.

تۇماۋدان ساقتانۋ كەرەك

زەرتتەۋ مالىمەتتەرىندە COVID-19 اۋرۋىنا قارسى الەۋمەتتىك شەكتەۋ شارالارىنا بايلانىستى وزگە جەدەل رەسپيراتورلى ۆيرۋستى ينفەكتسيالاردىڭ تارالۋ جيىلىگى دە الدەقايدا ازايعانى ايتىلۋدا.

تۇماۋدان قالاي ساقتانۋعا بولادى؟ استانا مەديتسينا ۋنيۆەرسيتەتى بالالار جۇقپالى اۋرۋلارى كافەدراسىنىڭ دوتسەنتى, PhD دوكتورى بايان تۋردالينانىڭ ايتۋىنشا, جرۆي-ءدىڭ ىشىندە تۇماۋ ۆيرۋسى قاۋىپتى ينفەكتسيالاردىڭ ءبىرى سانالادى. ول اسىرەسە, ەرتە جاستاعى بالالار, جۇكتى ايەلدەر مەن قوسالقى اۋرۋلارى بار ەگدە جاستاعى ادامداردا اۋىر اعىمىمەن سيپاتتالادى.

«جۇقپالى اۋرۋلاردىڭ الدىن الۋدىڭ ەڭ ءتيىمدى ءادىسى – ەكپە. سوندىقتان تۇماۋ ۆيرۋسىنا قارسى ەكپە العاندارىڭىز ءجون. بۇعان قوسا, مىندەتتى تۇردە الدىن الۋ, ساقتىق شارالارىن مەيلىنشە ۇستانۋ دا اسا قاجەت. ەڭ الدىمەن, الەۋمەتتىك اراقاشىقتىقتى تولىقتاي ساقتاۋعا تىرىسۋ كەرەك. كۇندەلىكتى تاماقتانۋ رەجيمىنە دە باسا ءمان بەرگەن ءجون», دەدى دارىگەر.

ونىڭ سوزىنە قاراعاندا, قاشىقتان وقىتۋ ءادىسىنىڭ مۇمكىندىكتەرىن پايدالانۋ قاجەت. قوعامدىق ورىنداردا مىندەتتى تۇردە ماسكا تاعىپ, قولدارىڭىزدى انتيسەپتيكالىق ەرىتىندىمەن ءجيى تازالاپ وتىرىڭىزدار. اعزانىڭ تاۋلىكتىك فيزيولوگيالىق سۋ قاجەتتىلىگىن پايدالانۋ كەرەك.

«تازا اۋادا سەرۋەندەۋدىڭ دە پايداسى وتە زور. جەدەل رەسپيراتورلى ۆيرۋستى ينفەكتسيالار مەن تۇماۋدىڭ بەلگىلەرى بايقالسا, دارىگەردىڭ كومەگىنە جۇگىنۋ كەرەك», دەدى بايان تۋردالينا.