سوڭعى ءۇش جىلدا وبلىسقا 721 قانداسىمىز كوشىپ كەلدى. بۇل تۋرالى وڭىرلىك كوممۋنيكاتسيالار قىزمەتىنىڭ اقپاراتتىق الاڭىندا قىزىلوردا وپد كوشى-قون پوليتسيا باسقارماسى باستىعىنىڭ مىندەتىن اتقارۋشى ساعىندىق قاميتبەكوۆ مالىمدەدى, دەپ حابارلايدى Egemen.kz
وتكەن جىلى «حالىقتىڭ كوشى-قونى تۋرالى» زاڭىنا وزگەرتۋلەر مەن تولىقتىرۋلار ەنگىزىلدى. ياعني, قانداستاردىڭ ازاماتتىق الۋ مەرزىمى قىسقارتىلدى. قازىر كوشى-قون قىزمەتى سالاسىندا 12 مەملەكەتتىك قىزمەت كورسەتىلۋدە, ونىڭ 75% ەلەكتروندى. جىل سوڭىنا دەيىن 90 پايىزعا جەتكىزىلمەك. جالپى, بيىل 96 مىڭ 640 مەملەكەتتىك قىزمەت كورسەتىلدى.
- وزدەرىڭىز بىلەتىندەي, پاندەمياعا بايلانىستى وبلىس اۋماعىنا بۇگىنگى كۇنگە شەتەلدىكتەردىڭ كەلۋى ازايدى. قازىرگى تاڭدا كوشى-قون قىزمەتى سالاسىمەن وبلىس اۋماعىنا ءتۇرلى ماقساتتارمەن 2 مىڭ 964 شەتەل ازاماتى ۋاقىتشا تىركەۋگە الىندى. وتكەن جىلى 25 مىڭنان استام وزگە ەلدىڭ ازاماتى كەلگەن بولاتىن. جىل باسىنان ەڭبەكشى كوشىپ كەلۋشىلەر شەتەلدىكتەرگە بارلىعى 6 مىڭ 507 رۇقسات راسىمدەلىپ, جەرگىلىكتى بيۋدجەتكە 92 ملن استام تەڭگە سالىق ءتۇستى, - دەدى ساعىندىق ۋبايدۋللا ۇلى.
بۇدان بولەك, حالىقتى قۇجاتتاندىرۋ ماسەلەلەرى بويىنشا مەملەكەتتىك قىزمەت كورسەتۋ ءۇشىن قاجەتتى شارالار جالعاسۋدا. مۇمكىندىگى شەكتەۋلى جانە زەينەتكەرلىك جاستاعى ادامداردى, كوپ بالالى انالاردى, مۇگەدەكتەردى قۇجاتتاندىرۋ ءۇشىن كوشى-قون قىزمەتىنىڭ جانە حقكو-نىڭ ارنايى تۇرعىلىقتى جەرى بويىنشا ۇيلەرىنە باراتىن ءموبيلدى توپتىڭ جۇمىسى ۇيىمداستىرىلعان. ءموبيلدى توپتارمەن بارلىعى 2 مىڭ 500-دەن استام تۇرعىننىڭ قۇجاتى ازىرلەندى.