قازاق مۋزىكا ونەرىنىڭ ەسىمى اڭىزعا اينالعان كورنەكتى وكىلى, كسرو جانە قازاقستان رەسپۋبليكاسى مەملەكەتتىك سىيلىقتارىنىڭ لاۋرەاتى, قازاق حالقىنىڭ سۇيىكتى ءانشىسى بيبىگۇل تولەگەنوۆا جايلى كىتاپ جارىققا شىقتى. كەشە ەلورداداعى «قازاقستان» كونتسەرت زالىندا «بيبىگۇل تولەگەنوۆا: سۇيىسپەنشىلىك, ءۇمىت جانە سەنىم» دەپ اتالاتىن سول كىتاپتىڭ تۇساۋى كەسىلدى.
قازاق مۋزىكا ونەرىنىڭ ەسىمى اڭىزعا اينالعان كورنەكتى وكىلى, كسرو جانە قازاقستان رەسپۋبليكاسى مەملەكەتتىك سىيلىقتارىنىڭ لاۋرەاتى, قازاق حالقىنىڭ سۇيىكتى ءانشىسى بيبىگۇل تولەگەنوۆا جايلى كىتاپ جارىققا شىقتى. كەشە ەلورداداعى «قازاقستان» كونتسەرت زالىندا «بيبىگۇل تولەگەنوۆا: سۇيىسپەنشىلىك, ءۇمىت جانە سەنىم» دەپ اتالاتىن سول كىتاپتىڭ تۇساۋى كەسىلدى.
بەلگىلى تۇلعا جايلى كىتاپ جازۋ قىزىق دەپ ويلايمىز. ويتكەنى, ونىڭ تىرشىلىگى ءوز شاڭىراعىنىڭ, قالا بەردى تۋعان-تۋىس, دوس-جاراننىڭ ماڭايىندا عانا ءوربيتىن اناۋ-مىناۋ قاراپايىم ادامنىڭ ومىرىنەن اناعۇرلىم كۇردەلى, اسەرلى بولسا كەرەك. اسىرەسە, اسەم انىمەن, بۇلبۇل ۇنىمەن تالايلاردىڭ جانىن تەربەگەن, جۇرەگىنە ساۋلە سەبەلەگەن, وسى كۇنى سەكسەننىڭ سەڭگىرىنە شىققانىمەن, ساحنالاردان ارەدىك جالت ەتىپ كورىنىپ جۇرگەن بيبىگۇل تولەگەنوۆا سىندى اڭىز ءانشىنىڭ ءومىر جولىندا تانىمدىق تا, تاعىلىمدىق تا وقيعالار ءجيى كەزدەسۋى ءتيىس. بۇل جەردە ءانشى تۋرالى كىتاپتى كىم جازعانى دا ماڭىزدى. كۇنى كەشە ومىردەن وزعان قازاقتىڭ قادىرلى ءانشىسى ەرمەك سەركەباەۆتىڭ قىزى, وسىعان دەيىن ءۇش كىتابىن وقىرمانعا ۇسىنىپ ۇلگەرگەن, بيبىگۇل اپايعا كىشكەنتاي كەزىنەن ەتەنە وسكەن يرينا سەركەباەۆا جازىپ وتىر. كىتاپتىڭ العىسوزىندە يرينا «مەنىڭ جۇمىس ۇستەلىمدە ونىڭ راماعا سالىنعان پورترەتى تۇرادى. جاپ-جاس كەزى. قىز جىبەك وبرازىندا ۇلتتىق كيىمدەگى تاڭعاجايىپ ارۋ. الدەبىرەۋگە قاراپ ك ۇلىمسىرەگەن ونىڭ جايدارى جۇزىنە كوز الماي قارايمىن. مەن ءۇشىن بيبىگۇل تولەگەنوۆا داۋىسى – تاۋ بوكتەرىندەگى كوكتەم لەبى, كەڭسىرىگىڭدى كەرە دەم الاتىن گۇل جايناعان الما باعى, كاۋسار بۇلاقتى كومكەرگەن اپپاق تاستار تىزبەگى مەن تاۋ سۋىنداي ءموپ-ءمولدىر مەنىڭ بالعىن بالالىق شاعىم. ءوز باسىم قانشا جەردەن تىزگىنسىز ستيۆ تايلەرگە تابىنۋشىلاردىڭ ءبىرى بولسام دا, مەنىڭ جان دۇنيەمدى جەلەپ-جەبەۋشى اۋەنىم ارقاشاندا «قازاق ءۆالسى». ءتىپتى, مىنا ءبىر شالعايدىڭ شالعايى امەريكادا جۇرسەم دە ءدال سولاي» – دەپ وي تولعايدى. وسى كىتاپتىڭ جازىلۋىنا ءانشىنى جانىنا جاقىن تۇتىپ, شىن جۇرەگىمەن جاقسى كورگەنى, ودان قالسا اتا-اناسىنىڭ بيبىگۇل تولەگەنوۆا تۋرالى مازمۇندى, عيبراتتى اڭگىمەلەرى سەبەپ بولعانىن باياندايدى.
كىتاپ ءانشىنىڭ ءوزى بايانداپ بەرگەن ەستەلىكتەرى نەگىزىندە جازىلعان. وندا باستى كەيىپكەردىڭ ءومىرى, وتباسى, ونەر جولى, قىزمەتى, ومىرىندە ماڭىزدى ورىن الاتىن ادامدار تۇگەلگە جۋىق قامتىلعان. تۇساۋكەسەر شاراسىندا ءانشى ءوزى جايلى جازىلعان دۇنيەنىڭ جارىققا شىعۋىنا سەپتىگىن تيگىزگەن «اتامۇرا» باسپاسىنا, قارجىلاي قولداۋ كورسەتكەن «پەتروقازاقستان» جانە نورت كاسپيان وپەرەيتينگ كومپانيالارىنا العىسىن ءبىلدىردى. انشىلىك عۇمىرىنىڭ ەستەلىكتەرى ورنەكتەلگەن كىتابى ارقىلى قالىڭ ەلىمەن وي بولىسكەنىن, سىرىن اقتارعانىن جەتكىزدى. كەشكە ارنايى قوناق رەتىندە قاتىسقان قازاقتىڭ تۇڭعىش عارىشكەرى توقتار اۋباكىروۆ ءانشىنىڭ اسەم ءۇنىن ماسكەۋدىڭ ورتالىق ستاديونىنان تىڭداعان ءساتىن, قازاقتىڭ سۇلۋ سازىن ەستىگەندەگى تەبىرەنىسىن, سول سازدى جەتكىزە بىلگەن ۇندە ءومىر سۇرۋگە قۇشتارلىقتى وياتاتىن, ارمان-ماقساتىڭا جەتۋگە تالپىندىراتىن كۇش-قۋات بولعانىن ومىرىندەگى ەڭ ءبىر ۇمىتىلماس وقيعالاردىڭ بىرىنە بالاپ, اڭىز انشىگە ىنىلىك ءىلتيپات ءبىلدىردى.
كەش بارىسىندا بيبىگۇل تولەگەنوۆامەن كەزدەسۋگە جينالعان قاۋىم سىرتقى ىستەر ءمينيسترى ەرلان ىدىرىسوۆتىڭ, قارجى مينيسترلىگىنىڭ جاۋاپتى حاتشىسى ناتاليا كورجوۆانىڭ, نورت كاسپيان وپەرەيتينگ كومپانياسىنىڭ توراعاسى پەر وففماننىڭ جۇرەكجاردى لەبىزدەرىن تىڭداپ, وپەرادا وزىندىك ورنەكتەرى بار جاس انشىلەر دينا حامزينا, ازامات جىلتىركوزوۆ, ەلەنا نيزامۋتدينوۆالاردىڭ ونەرىن تاماشالادى.
شارا سوڭىندا ءانشى كەشكە جينالعاندارعا ءوزى جايلى كىتاپتى ءوز قولتاڭباسىمەن ۇلەستىردى.
ايگۇل سەيىلوۆا,
«ەگەمەن قازاقستان».
سۋرەتتەردى تۇسىرگەن
ەرلان وماروۆ.