فەيسبۋكتەگى پاراقشاسىندا ارنايى جازبا قالدىرعان مينيستر مەملەكەت باسشىسى قاسىم-جومارت توقاەۆ ءوز جولداۋىندا بالالاردىڭ قولونەر مەن شىعارماشىلىقتىڭ باستاپقى نەگىزدەرىمەن تانىسۋى ءۇشىن «بالالار ۇيىرمەسى» قىزمەتىن قايتا جانداندىرۋ تۋرالى تاپسىرما بەرگەنىن العا تارتتى.
ونىڭ ايتۋىنشا, قوسىمشا ءبىلىمسىز بالالاردىڭ الەۋەتىن تولىق اشۋ مۇمكىن ەمەس.
- سوندىقتان ءار بالانىڭ ساباقتان تىس ۇيىرمەلەر مەن سەكتسيالارعا قاتىسۋ مۇمكىندىگى بولۋى ماڭىزدى. ەلىمىزدە مەملەكەتتىك قوسىمشا ءبىلىم بەرۋ مەكەمەلەرى ءبىز قالاعانداي كوپ ەمەس. سوندىقتان بالالاردى قوسىمشا بىلىممەن قامتۋ ءۇشىن ءتيىستى جۇمىستى اتقارۋدامىز. وسى رەتتە جاعىمدى جاڭالىقپەن بولىسپەكپىن.
جاقىن ارادا بالالاردىڭ مەملەكەتتىك تاپسىرىس ارقىلى جەكەمەنشىك ۇيىمداردا دا قوسىمشا ءبىلىم الۋىنا جاعداي جاسالادى, دەدى ايماعامبەتوۆ.
مينستر مۇنداي نورما ء«بىلىم تۋرالى» قر زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا قامتىلعانىن جانە ول پارلامەنت ءماجىلىسىنىڭ ەكى وقىلىمىنان وتكەنىن دە تىلگە تيەك ەتتى.
قوسىمشا ءبىلىم بەرۋ جۇيەسىنە وقۋشىلار سارايلارى, ءتۇرلى ۇيىرمەلەر, سەكتسيالار, كوركەمونەر جانە مۋزىكا مەكتەپتەرى, جاس تەحنيكتەر ستانتسيالارى جانە ت.ب. ەنەدى.
بۇل باعىت ارقىلى بالا قوسىمشا ءبىلىم الىپ, ءتۇرلى داعدىلارىن دامىتاتىنىن ايتقان مينيستر, بۇل تاقىرىپتى تارقاتىپ ءتۇسىندىرىپ بەردى.
ونىڭ ايتۋىنشا, مەملەكەت تاراپىنان اقشا ءبولىپ, وقۋشىلار سارايىن, ونەر مەكتەپتەرىن سالۋ, ۇيىرمەلەر اشۋ – ءبىر بولەك.
- دەگەنمەن مەملەكەتتىك تاپسىرىس ارقىلى جەكەمەنشىك ورتالىقتاردا بالانىڭ قوسىمشا ءبىلىم الۋىنا جاعداي جاساۋ ماڭىزدى. بۇل – مەملەكەتتىك-جەكەشەلىك ارىپتەستىك قاعيداتى. بۇعان دەيىن وسىنداي جۇيە ارقىلى قىسقا مەرزىم ىشىندە مەملەكەت تاراپىنان ۇلكەن سالىمدارسىز بالاباقشالارداعى ورىن جەتىسپەۋشىلىك پروبلەماسى ايتارلىقتاي شەشىلگەن بولاتىن. ونى جەكە بالاباقشالاردىڭ دامۋ تاجىريبەسىنەن بايقاۋعا بولادى. ياعني, كاسىپكەرلەر ءوز ەسەبىنەن مەكتەپكە دەيىنگى ءبىلىم بەرۋ مەكەمەسىن تولىعىمەن سالادى نەمەسە عيماراتتى جابدىقتايدى, ال مەملەكەت ءاربىر بالاعا مەملەكەتتىك تاپسىرىستى ورنالاستىرۋ ارقىلى اقشا تولەيدى, دەپ ءتۇسىندىردى مينيستر.
- ناتيجەسىندە مەملەكەت قۇرىلىسقا جانە ماتەريالدىق-تەحنيكالىق بازاعا جۇمسالاتىن اقشانى ۇنەمدەيدى. ماسەلەن, سوڭعى 10 جىلدا جەكە ينۆەستيتسيالاردىڭ ەسەبىنەن بالاباقشالاردىڭ سانى 10 ەسە ءوستى.
سونداي-اق, اسحات ايماعامبەتوۆ مينيسترلىك قوسىمشا ءبىلىم بەرۋ جۇيەسىندە دە وسىنداي تەتىكتى قولداناتىنىن اتاپ ءوتتى. ونىڭ مالىمدەۋىنشە, مەملەكەتتىك-جەكەشەلىك ارىپتەستىك ارقاسىندا قىسقا مەرزىم ىشىندە بالالاردى ۇيىرمەلەرمەن جانە سەكتسيالارمەن قامتۋ دەڭگەيىن ايتارلىقتاي شىعىنسىز ارتتىرۋعا بولادى.
- جۇمىس ىستەپ تۇرعان قوسىمشا ءبىلىم بەرەتىن مەملەكەتتىك ۇيىمدار دا ءوز قىزمەتىن جالعاستىرىپ, داميتىن بولادى. وتكەن جىلى مەكتەپتەن تىس ۇيىمداردى جاپپاي وڭتايلاندىرۋ توقتاتىلعانىن اتاپ وتكىم كەلەدى, بۇل دا بالالاردىڭ قوسىمشا ءبىلىم الۋعا تەڭ قول جەتكىزۋىن قامتاماسىز ەتۋگە وڭ اسەر ەتەدى.
سونىمەن قاتار, سوڭعى ەكى جىلدا تالدىقورعان جانە پەتروپاۆل قالالارىندا وقۋشىلار سارايلارى اشىلدى. بيىل اتىراۋ جانە تۇركىستان قالالارىندا وقۋشىلار سارايلارى سالىندى, تۇركىستان وبلىسىندا بالالار مۋزىكا مەكتەبى, وسكەمەن قالاسىندا «SMART» كرەاتيۆتى ءبىلىم بەرۋ ورتالىعى اشىلدى. قازىر كوكشەتاۋ جانە قاراعاندى قالالارىندا ەكى وقۋشىلار سارايىنىڭ قۇرىلىسى ءجۇرىپ جاتىر. الماتى قالاسىنداعى وقۋشىلار سارايىندا قايتا جوندەۋ جۇمىستارى جۇرگىزىلمەك جانە جامبىل وبلىسىندا وقۋشىلار سارايىنىڭ قۇرىلىسى جوسپارلانعان.
پەداگوگ مارتەبەسى تۋرالى زاڭعا سايكەس قوسىمشا ءبىلىم بەرۋ قىزمەتكەرلەرىنىڭ دە ەڭبەكاقىسى جىل سايىن وسەتىن بولادى, ساناتتار ءۇشىن قوسىمشا اقىلارى ۇلعايتىلادى.سوندىقتان قوسىمشا ءبىلىم بەرۋدى دامىتۋدىڭ جاڭا كەزەڭى باستالدى دەپ سەنىممەن ايتا الامىن, دەپ جازباسىن اياقتادى ول.