بيىلعى 21 جەلتوقساندا استرونومدار مەن جۇلدىزدى اسپاندى سۇيەتىندەر سيرەك كەزدەسەتىن قۇبىلىستى – ساتۋرن مەن يۋپيتەردىڭ « ۇلى قوسىلۋىن» تاماشالاي الادى, دەپ حابارلايدى Egemen.kz
ماسكەۋ پلانەتاريىندە ايتىلعان مالىمەتكە قاراعاندا, بۇل استرونوميالىق قۇبىلىس سوڭعى رەت جەردەن 794 جىل بۇرىن بايقالعان. استرولوگتاردىڭ بولجامىنشا, بۇل قۇبىلىس كەشكى ۋاقىتتا, شامامەن 21.12.2020 جىلى ساعات 21:21-تە كورىنۋى ىقتيمال.
ساتۋرن مەن يۋپيتەر جارقىن قوس جۇلدىزعا ۇقساۋى ءتيىس. كەيبىر استرونومدار ۆيفلەەم جۇلدىزى تۋرالى بيبليالىق اڭىزدا ءدال وسى ەكى پلانەتانىڭ بىرىگۋى ايتىلاتىنىن جوققا شىعارمايدى. يۋپيتەر – ديامەترى 143,000 شاقىرىم بولاتىن كۇن جۇيەسىندەگى ەڭ ۇلكەن جانە ۆەنەرادان كەيىنگى جارىق ەكىنشى پلانەتا, ساتۋرنعا شامامەن 20 جىلدا ءبىر رەت جاقىندايدى. بىراق ەكى الىپتىڭ ەڭ ۇلكەن كورشىلەسۋى بۇل جولى بىرنەشە عاسىردا ءبىر رەت بولادى. ۆاندەربيلت ۋنيۆەرسيتەتىنىڭ (اقش) استرونوميا پروفەسسورى دەۆيد ۆەينتراۋب بىلاي دەيدى:
«مەنىڭ ويىمشا, مۇنداي وقيعا ادام ومىرىندە ءبىر-اق رەت بولۋى مۇمكىن. بۇل – سيرەك ءارى ەرەكشە قۇبىلىس», دەپ اتاپ ءوتتى.
استرونومدار اۋەسقوي تەلەسكوپتىڭ كومەگىمەن جاقىن پلانەتالاردى عانا ەمەس, ولاردىڭ كەيبىر سەرىكتەرىن دە كورۋگە بولادى دەپ ۋادە بەرەدى. اۋا رايى مۇمكىندىك بەرسە, ولاردى كۇن باتقاننان كەيىن بىردەن كورۋگە بولادى.
ەگەر 21 جەلتوقساندا اۋا رايى قولايسىز بولسا, وندا ءسىز كەيىنىرەك قايتالاپ كورە الاسىز: يۋپيتەر مەن ساتۋرن تاعى بىرنەشە كۇن جاقىن قاشىقتىقتا بولادى. ساراپشىلار بۇل استرونوميالىق قۇبىلىستىڭ ءمانىن كۇن اينالاسىنداعى پلانەتالاردىڭ ءتۇرلى اينالۋ جىلدامدىعىندا تۇسىندىرەدى: يۋپيتەرگە شامامەن 12 جىل, ساتۋرنعا 29 جىلدان استام ۋاقىت قاجەت.
ءار 20 جىل سايىن جەردەن قاراعاندا پلانەتالار ءبىر-بىرىنە جاقىندايتىن سياقتى. شىن مانىندە, ولار ءبىر-بىرىنەن جانە جەردەن دە وتە الىس: مىسالى, 21 جەلتوقسانداعى ساتۋرن پلانەتامىزدان, يۋپيتەردەن ەكى ەسە الىس بولادى, اتاپ ايتقاندا: نەمىس اەروعارىشتىق ورتالىعىنىڭ (DLR) مالىمەتتەرى بويىنشا 1,6 ميلليارد شاقىرىم قاشىقتىقتا. ماماندار ەكى پلانەتانىڭ بايلانىسىن «كۇن توقىراۋىنىڭ جۇلدىزى» دەپ اتايدى. ويتكەنى ول 21 جەلتوقساندا ورىن الادى. دۇيسەنبىدە ورتا ەندىكتەردەگى كۇندىزگى ۋاقىت ەڭ قىسقا بولادى جانە جەتى ساعاتتى قۇرايدى.
دەمەك ىمىرت باستالعاننان كەيىنگى ءتۇننىڭ ۇزاقتىعى جانە 22 جەلتوقساننىڭ تاڭى جىلىنا ەڭ ۇزاق بولادى. كەلەسى قوسىلۋ – 2080 جىلدىڭ 15 ناۋرىزى.