بيىل وبلىستىڭ دەنساۋلىق ساقتاۋ سالاسىنا 56,5 ملرد تەڭگە ءبولىندى. بۇل تۋرالى باق وكىلدەرىمەن كەزدەسكەن «الەۋمەتتىك مەديتسينالىق ساقتاندىرۋ قورى» كەاق قوستاناي وبلىسى بويىنشا فيليالىنىڭ ديرەكتورى ساۋلە ايمۇحامبەتوۆا ايتتى.
قوستاناي وبلىسىندا 60 ەمدەۋ مەكەمەسى تۇرعىندارعا تەگىن قىزمەت كورسەتەدى. بيىل ءوڭىردىڭ دەنساۋلىق ساقتاۋ سالاسىن قارجىلاندىرۋعا Covid-19-عا بولىنگەن قاراجاتتى ەسەپتەمەگەندە, 56,5 ملرد تەڭگە قاراستىرىلعان. ءمامس ەسەبىنەن 16,8 ملرد تەڭگە باعىتتالدى.
«2020 جىلى قارجىلاندىرۋ كولەمى سكرينينگتەر بويىنشا 3 ەسە, جوعارى تەحنولوگيالىق مەديتسينالىق قىزمەتتەر ساناتىندا 12 ەسە, مەديتسينالىق وڭالتۋ بويىنشا 27 ەسە ءوستى. كت جانە مرت جۇرگىزۋدى قارجىلاندىرۋ وتكەن جىلدان 3,2 ەسە ارتىق. قازىرگى ۋاقىتتا قوستاناي وبلىسىندا 6 كت جانە 5 مرت اپپاراتى بار. 2020 جىلدىڭ قاراشا ايىندا رۋدنىي قالالىق كوپسالالى اۋرۋحاناسىنا تاعى ءبىر مرت اپپاراتى جانە قوستاناي وبلىستىق اۋرۋحاناسىنا, ارقالىق وڭىرلىك اۋرۋحاناسىنا, رۋدنىي قالالىق كوپسالالى اۋرۋحاناسىنا جانە جىتىقارا اۋداندىق اۋرۋحاناسىنا 4 كت اپپاراتى ساتىپ الىندى. 2020 جىلدىڭ 10 ايىندا مەديتسينالىق ۇيىمدارعا حالىققا مەديتسينالىق قىزمەت كورسەتكەنى ءۇشىن 40 ملرد 347 ملن تەڭگە تولەندى. شىعىنداردىڭ باسىم بولىگى ستاتسيوناردا مامانداندىرىلعان مەديتسينالىق كومەكتى قامتاماسىز ەتۋگە جۇمسالدى. جالپى, تاۋلىكتىك ستاتسيونارلاردا – 45147, كۇندىزگى ستاتسيونارلاردا 64620 پاتسيەنت, اۋىل ستاتسيونارلارىندا 32153 ادام ەم قابىلدادى», - دەيدى ساۋلە ايمۇحامبەتوۆا.
قارجىلاندىرۋدىڭ ءوسۋى حالىققا مەديتسينالىق قىزمەت كورسەتۋدىڭ ساپاسىن ارتتىرۋعا مۇمكىندىك بەردى. ماسەلەن, قاراجاتتىڭ كوبەيگەنى ايماقتا بۋىن اۋىستىرۋ وپەراتسياسىن جاساۋعا ىقپال ەتتى. جىل باسىنان بەرى ءدال وسىنداي وتا وبلىستىڭ 180 تۇرعىنىنا جاسالدى. ولاردىڭ ءبارى ءمامس جۇيەسىندە تىركەلگەن.
«تىزە نەمەسە جامباس اۋىستىرۋ وپەراتسياسى ميلليون تەڭگەدەن اسادى, بىراق ساقتاندىرىلعان پاتسيەنتتەر ءۇشىن بۇل تەگىن. 2019 جىلى ءبىزدىڭ وبلىستا 35 ملن تەڭگەگە وسىنداي 37 وپەراتسيا جۇرگىزىلدى. بيىل 180 ادامعا تەگىن وتا جاسالىپ وتىر. وسى جىلى «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە تۇزەتۋلەر ەنگىزىلدى. ناتيجەسىندە ساقتاندىرىلماعان پاتسيەنتتەرگە شۇعىل مەديتسينالىق كومەك كەپىلدەندىرىلگەن پاكەتتە كورسەتىلەتىن بولدى. مۇنى حالىق تۇسىنبەي, جەكە ەمحانالارعا جۇگىنىپ جاتادى», - دەدى قور باسشىسى.