قوستاناي وبلىسىنىڭ پوليتسيا دەپارتامەنتىندە تاۋەلسىزدىك كۇنىنە ارنالعان سالتاناتتى ءىس-شارا ءوتتى. جيىن بارىسىندا دەپارتامەنت باستىعى بەكەت ايماعامبەتوۆ جەكە قۇرامدى تاۋەلسىزدىك كۇنىمەن قۇتتىقتادى, دەپ حابارلايدى Egemen.kz.
«ەلىمىزدە بۇكىل ادامزات قاۋىمىنالاڭداتىپ وتىرعان پاندەمياعا قارسى كۇرەس ءالى دە جالعاسۋدا. قازىرگى جاعدايدا پوليتسيا جانە مەديتسينا قىزمەتكەرلەرى الدىڭعى شەپتە ءجۇر. تۇرعىنداردىڭ قاۋىپسىزدىگى مەن ولاردىڭ دەنساۋلىعى ءبىزدىڭ موينىمىزعا جۇكتەلىپ وتىر», دەدى ايماعامبەتوۆ.
تاۋەلسىزدىك كۇنىنە وراي دەپارتامەنت باسشىلىعى ىشكى ىستەر ورگاندارىندا 32 جىلدان استام قىزمەت ەتكەن وتستاۆكاداعى پودپولكوۆنيك باتىربەك نۇرەكينگە «قر ءىىو ارداگەرى» مەدالىن تابىس ەتتى.
سونىمەن قاتار پاندەميامەن كۇرەستەگى جەمىستى ەڭبەگى ءۇشىن پرەزيدەنت جارلىعىمەن جەرگىلىكتى 25 پوليتسەي «حالىق العىسى» مەدالىمەن ماراپاتتالدى. ولاردىڭ ىشىندە اكىمشىلىك پوليتسيا باسقارماسىنىڭ باستىعى پولكوۆنيك اندرەي گريگورەۆسكي, وبلىستىق پد شتاب ءبولىمىنىڭ باستىعى پودپولكوۆنيك ابىلاي مەكەباەۆ, ۋچاسكەلىك مايور ەرىك ۆايسوۆ جانە قوستاناي قالاسى پب اعا ينسپەكتورى كاپيتان كارينا بازارباەۆا بار.
پولكوۆنيك اندرەي گريگورەۆسكي وبلىستا كوروناۆيرۋستىڭ تارالۋىن بولدىرماۋ جونىندەگى جەدەل شتابتى, ابىلاي مەكەباەۆ كارانتين كەزىندە وبلىستاعى احۋالدىق شتابتى باسقارىپ, تاۋلىك بويى سانيتارلىق جانە بلوك-بەكەتتەردىڭ جۇمىسىن رەتتەپ وتىردى.
سونداي-اق, قىزمەتتىك مىندەتتەرىن ادال اتقارعانى جانە جۇمىستا جوعارى ناتيجەلەرگە قول جەتكىزگەنى ءۇشىن 50-دەن استام قوستانايلىق پوليتسەي ماراپاتتالدى. ال پد تىلدىق قامتاماسىز ەتۋ قىزمەتىنىڭ باستىعى رۋسلان سارسەنباەۆ پەن قوستاناي قالاسى پوليتسيا باسقارماسىنىڭ ۋچاسكەلىك ينسپەكتورى اسحات جاقسىمبەكوۆ «قۇقىق ءتارتىبىن قامتاماسىز ەتۋگە قوسقان ۇلەسى ءۇشىن» مەدالىنە يە بولدى.
سالتاناتتى شارانىڭ سوڭىندا ماراپات يەلەرى دەپارتامەنت مۋزەيىندەگى تاۋەلسىزدىك كۇنىنە ارنالعان ارنايى كورمەنى تاماشالادى.