قوستانايدا ءداستۇرلى «تريۋمف» ماراپاتتاۋ ءراسىمى ءوتتى. سالتاناتتى شارا بارىسىندا وبلىس اكىمىنىڭ ورىنباسارى باقىت ەسىموۆا حالىقارالىق جانە رەسپۋبليكالىق ءبىلىم جارىستارىندا جەڭىمپاز اتانعان 20 وقۋشى مەن ولاردىڭ ۇستازدارىن ماراپاتتادى, دەپ حابارلايدى Egemen.kz.
كارانتينگە بايلانىستى راسىمگە 5 وقۋشى جانە 5 مۇعالىم قاتىستى, قالعان لاۋرەاتتار ءوز ماراپاتتارىن وزدەرى تۇراتىن اۋدان باسشىلىعىنىڭ قولىنان الاتىن بولادى.
شارادا عىلىم, شىعارماشىلىق جانە سپورت سالاسىندا جەتىستىككە جەتكەن دارىندى وقۋشىلارعا «تريۋمف» مۇسىنشەلەرى, قوستاناي وبلىسى اكىمىنىڭ العىس حاتى مەن نوۋتبۋكتەر تابىس ەتىلدى.
«بيولوگيا بويىنشا وليمپيادالارعا قاتىسۋ ماعان بولاشاق ماماندىعىمدى انىقتاۋعا كومەكتەستى. مەن دارىگەر ماماندىعىن تاڭدادىم, قوعامعا پايدامدى تيگىزگىم كەلەدى. قازىر نازارباەۆ ۋنيۆەرسيتەتىنە تۇسۋگە دايىندالىپ جاتىرمىن. ءوز مەكتەبىمنىڭ قابىرعاسىندا العان ساپالى ءبىلىم ارمانىمنىڭ جۇزەگە اسۋىنا مىندەتتى تۇردە كومەكتەسەدى», دەيدى ء«بىلىم-يننوۆاتسيا ليتسەي-ينتەرناتىنىڭ» وقۋشىسى ارمان كوشەرباەۆ.
سالتاناتتى راسىمدە جەڭىمپاز شاكىرتتەردىڭ ۇستازدارىنا دا العىس حاتتار مەن پلانشەتتەر تابىستالدى.
«تريۋمف» ماراپاتتاۋ ءراسىمى وبلىستا 2009 جىلدان بەرى جىل سايىن تاۋەلسىزدىك كۇنى قارساڭىندا ۇيىمداستىرىلىپ كەلەدى. وسى ۋاقىت ارالىعىندا ءبىر جارىم مىڭنان استام جاس عالىمدار, سپورتشىلار, ارتىستەر مەن سۋرەتشىلەر «تريۋمف» لاۋرەاتى اتاندى.