ۇلتتىق بانك بيىل قىركۇيەك ايىندا «باسپانا حيت» باعدارلاماسى بويىنشا جاڭا وزگەرىستەردى بەكىتكەن بولاتىن. باعدارلامانىڭ جاڭا تالاپتارىنا سايكەس قازاقستان ازاماتتارى ەكىنشى دەڭگەيدەگى بانكتىڭ جوباسى بويىنشا ۇلەستىك قاتىسۋ شەڭبەرىندە نەمەسە تۇرعىن ءۇي قۇرىلىسىنىڭ جالعىز وپەراتورىنىڭ كەپىلدىگىمەن سالىناتىن تۇرعىن ءۇيدى ساتىپ الۋعا يپوتەكا رەسىمدەي الادى, دەپ حابارلايدى Egemen.kz.
باستاپقى نارىق ءۇشىن تۇرعىن ءۇي قۇنىنىڭ ەڭ جوعارى ليميتتەرى نۇر-سۇلتان, الماتى قالالارىندا 25 ملن تەڭگەدەن 35 ملن تەڭگەگە دەيىن, سونداي-اق باستاپقى جانە قايتالاما تۇرعىن ءۇي ءۇشىن - شىمكەنت قالاسىندا 25 ملن تەڭگەگە دەيىن جانە قاراعاندى قالاسىندا 20 ملن تەڭگەگە دەيىن وزگەرتىلدى.
«باسپانا حيت» باعدارلاماسىنىڭ جاڭا تالاپتارىن ءبىرىنشى بولىپ الماتى قالاسىنىڭ تۇرعىنى ءلايلا اناسوۆا پايدالانىپ كوردى.
«كوپتەن بەرى ءۇيىمىزدى كەڭەيتۋ جولدارىن ىزدەگەن ەدىم. ءبىز وتباسىمىزبەن ەكى بولمەلى پاتەردە تۇردىق. ونىڭ كولەمى نەبارى 50 شارشى مەتر. ءبىز ءۇشىن وتە تار ەدى. سالىنىپ جاتقان ءۇيدىڭ دايىن ۇيگە قاراعاندا ارزان ەكەنىن بىلەتىن ەدىم. بىراق قۇرىلىس سالۋشىنىڭ ءبولىپ تولەۋ تالاپتارى ماعان قولايسىز بولدى», دەيدى ل. اناسوۆا.
ونىڭ ايتۋى بويىنشا, «باسپانا حيت» باعدارلاماسى بويىنشا سالىناتىن تۇرعىن ءۇيدى ساتىپ الۋعا بولاتىنى تۋرالى اقپاراتتى ارىپتەسىنەن ەستىگەن. سول بويىنشا جاڭالىقتاردى وقىپ, ءبىلىپ ءجۇردى. باعاسى قىمبات ەمەس جانە ورنالاسقان جەرى بارىنشا قولايلى, قۇرىلىستىڭ اياقتالۋىنا كەپىلدىگى بار تۇرعىن ءۇي كەشەندەرىن ىزدەستىرە باستاعان.
«ناتيجەسىندە تسەنتركرەديت بانك اككرەديتتەگەن Qazaq Stroy قۇرىلىس كومپانياسىنان «Terracotta» تۇرعىن ءۇي كەشەنىن تاڭدادىم. زەينەتاقى قورىنان الىناتىن قاراجاتتىڭ ەسەبىنەن يپوتەكانى جارتىلاي جابۋعا نيەتتىمىن. قۇرىلىسشىلار ءۇيىمىزدى كەلەسى جىلدىڭ كۇزىندە پايدالانۋعا بەرۋگە ۋادە بەرىپ وتىر», - دەيدى ءلايلا.
«قازاقستاننىڭ ورنىقتىلىق قورى» اق باسقارما توراعاسىنىڭ ورىنباسارى رۇستەم قىدىقوۆتىڭ ايتۋىنشا, بانكتەر قارجىلىق تۇراقتىلىعىن تەكسەرىپ, اككرەديتاتسيادان وتكىزگەن قۇرىلىس كومپانيالارىنىڭ سالىنىپ جاتقان تۇرعىن ءۇي نىساندارى «باسپانا حيت» باعدارلاماسىنا قاتىسا الادى.
«باسپانا حيت» باعدارلاماسىنىڭ جاڭا تالاپتارى تۇرعىن ءۇيدىڭ قولجەتىمدىلىگىن ارتتىرۋعا جانە باستاپقى تۇرعىن ۇيگە سۇرانىستى كوبەيتۋگە باعىتتالعان. جاقىن ارادا باعدارلامانىڭ جاڭا تالاپتارى بويىنشا يپوتەكالىق قارىزدار بەرۋگە باسقا دا بانكتەر مەن اككرەديتتەلگەن قۇرىلىس سالۋشىلار قوسىلادى», - دەدى رۇستەم قىدىقوۆ.
ەستەرىڭىزدە بولسا, قازاقستان رەسپۋبليكاسىنىڭ ۇلتتىق بانكى تۇرعىن ءۇي نارىعىندا ۇزاق مەرزىمدى كرەديتتەۋدى ىنتالاندىرۋ ماقساتىندا «باسپانا حيت» يپوتەكاسىن 2018 جىلى ىسكە قوسقان ەدى. بۇگىنگى كۇنى 40 مىڭنان استام قازاقستاندىق وسى باعدارلاما بويىنشا ءۇيلى بولدى.