سولتۇستىك قازاقستان وبلىسىندا 200 بالا جاڭا جىل مەرەكەسىنە وراي پرەزيدەنتتىڭ سىيلىعىن الادى, دەپ حابارلايدى Egemen.kz
سقو ءبىلىم باسقارماسىنىڭ باسشىسى گۇلميرا كارىموۆا بريفينگكە قاتىسىپ, مەكتەپتەردە جاڭا جىل مەرەكەسىنە ارنالعان ءىس-شارالاردىڭ ءوتۋ تارتىبىنە توقتالدى. بيىل ءداستۇرلى پرەزيدەنتتىك شىرشا 24 جەلتوقسانعا جوسپارلانعان.
ساعات 11.00-دە باستالاتىن «عاجايىپقا تولى جاڭا جىل!» اتتى مەرەكەلىك ەرتەڭگىلىك ونلاين وتەتىندىكتەن, ونى وبلىستىق تەلەارنا جانە الەۋمەتتىك جەلىلەر ارقىلى بارلىق بالا تاماشالاۋعا مۇمكىندىك الماق.
«پرەزيدەنت اكىمشىلىگىنىڭ ۇسىنىسىن ەسكەرە وتىرىپ ۇيىمداستىرامىز. مەملەكەت باسشىسىنىڭ اتىنان 200 بالاعا سىيلىق تابىستالادى. ولار: جەتىم بالالار, از قامتىلعان جانە كوپ بالالى وتباسىلاردىڭ بالالارى, ەرەكشە ءبىلىم بەرۋدى قاجەت ەتەتىن, مۇگەدەك, سونداي-اق, سپورتتا, بىلىمدە دارىندى, شىعارماشىلىقتا نەمەسە قوعامدىق ومىردە بەلگىلى ءبىر جەتىستىككە جەتكەن بالالار. اياز اتا مەن اقشاقار ءار جەتكىنشەككە بارىپ, سىيلىقتى سالتاناتتى تۇردە تابىس ەتەدى. بۇگىندە سىيلىقتار ءازىر, مەرەكەلىك باعدارلاما دايىن», دەيدى گۇلميرا كارىموۆا.
وقۋشىلاردى پرەزيدەنت اتىنان ءوڭىر باسشىسى ق.اقساقالوۆ قۇتتىقتايدى. كەيىن بالالار جاڭاجىلدىق ەرتەگىنى تاماشالاماق. ال 25 جەلتوقساندا ەرتەڭگىلىكتەر اۋداندار مەن پەتروپاۆلدا وتپەك.
«بارلىق مەكتەپتەردىڭ كەزەكشى سىنىپتارىندا جاڭاجىلدىق ەرتەڭگىلىكتەر شىرشانىڭ قاسىندا وتەدى. سانيتارلىق-ەپيدەميولوگيالىق تالاپتاردى قاتاڭ ساقتاي وتىرا ۇيىمداستىرامىز. 25 بالادان ارتىق قاتىسپايدى. مەكتەپكە دەيىنگى ءبىلىم بەرۋ مەكەمەلەرىندە ەرتەڭگىلىكتەر كەستە بويىنشا 21 جەلتوقساننان باستالادى. انيماتورلار مەن اتا-انالاردىڭ قاتىسۋىنا رۇقسات جوق. ال قاشىقتان ءبىلىم الىپ جاتقان بالالارعا اياز اتا مەن اقشاقار بەينەقۇتتىقتاۋ ارنايدى», دەيدى ءبىلىم باسقارماسىنىڭ باسشىسى.