ەل پرەزيدەنتى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ ماقساتىندا الماتى وبلىسىنىڭ تالعار اۋدانىندا سەرۆيستىك اكىمدىك اشىلدى. بۇل - الماتى وبلىسى بويىنشا اشىلىپ وتىرعان 20-شى سەرۆيستىك اكىمدىك. ەندى اۋدان تۇرعىندارى ءار بولىمدەردى ىزدەمەي-اق قاجەتتى قىزمەتتەردى ءبىر عيماراتتا الا الادى, دەپ حابارلايدى Egemen.kz الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ.
سەرۆيستىك اكىمدىكتىڭ اشىلۋىنا قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى ەرنار ماقاجانوۆ ارنايى قاتىسىپ, جاسالعان مۇمكىندىكتەرمەن تانىسىپ قايتتى. «Open space» قاعيداتىمەن جۇمىس ىستەيتىن ورتالىقتا 9 مەكەمە تۇرعىندارعا جىلجىمايتىن م ۇلىك راسىمدەۋ, قۇرلىسقا رۇقسات الۋ, الەۋمەتتىك تولەمدەردى تاعايىنداۋ, ەلەكتروندىق تسيفرلىق قولتاڭبا اشتىرۋ, اۋىل شارۋاشىلىعى مەن جەر قاتىناستارى جانە باسقا دا سالالار بويىنشا جالپى سانى 48 مەملەكەتتىك قىزمەت ءتۇرىن كورسەتەدى. مۇندا كۇتۋ زالى مەن بالالارعا ارنالعان شاعىن ويىن الاڭى بار. قازىردىڭ وزىندە قىزۋ جۇمىسىن باستاعان ورتالىققا كەلۋشى تۇرعىندار مۇنداعى ەلەكتروندى كەزەكتىڭ, قاجەتتى قىزمەتتى ءبىر جەرگە شوعىرلاندىرۋدىڭ قولايلى ەكەنىن ايتۋدا. ورتالىق قىزمەت الۋشىلاردىڭ ۋاقىتىن, كۇش-جىگەرىن, قارجىسىن ۇنەمدەۋگە مۇمكىندىك بەرەدى.
قر سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى ەرنار ماقاجانوۆ نىساننىڭ اشىلۋى كەزىندە:
- بۇل – الماتى وبلىسىندا اشىلىپ وتىرعان 20-شى سەرۆيستىك اكىمدىك. وسى جوبالار حالىققا جانى بولۋعا, اشىقتىقتى قامتاماسىز ەتۋگە مۇمكىندىك بەرەدى. بۇگىن سەرۆيستىك اكىمدىك اشۋ ارقىلى تالعار اۋدانىنىڭ تۇرعىندارىنا قولايلى جاعداي جاسالىپ وتىر. مەملەكەتتىك قىزمەت الۋ بويىنشا ازاماتتاردىڭ ساۋالدارىنا وسىندا وتىرعان ماماندار جاۋاپ بەرەدى, ءتيىستى قىزمەت كورسەتەدى. مەملەكەت باسشىسى قاسىم-جومارت توقاەۆتىڭ قازاقستان حالقىنا جولداۋىندا ايتىلعانداي, ءبىزدىڭ ورتاق مىندەتىمىز – ازاماتتاردىڭ بارلىق سىندارلى ساۋالدارىنا جەدەل جانە ءتيىمدى جاۋاپ بەرەتىن "حالىق ۇنىنە قۇلاق اساتىن مەملەكەت" تۇجىرىمداماسىن جۇزەگە اسىرۋ», - دەدى.
سونداي-اق عيماراتتا "جەتىسۋ – ادالدىق الاڭى" جوباسىمەن جابدىقتالعان ازاماتتاردى قابىلداۋ كابينەتى ورنالاسقان. بۇل جەردە اۋدان اكىمى, اكىم ورىنباسارلارى, مەكەمە باسشىلارى تۇرعىنداردى جەكە ماسەلەلەرى بويىنشا قابىلداۋ جۇرگىزەدى.