قوستاناي وبلىسىندا قىلمىس دەڭگەيى ءۇش ەسە ازايدى. بۇل تۋرالى ايماق تۇرعىندارىمەن الەۋمەتتىك جەلىدە ونلاين رەجىمدە كەزدەسكەن قوستاناي وبلىسى پولتسيا دەپارتامەنتىنىڭ باستىعى بەكەت ايتماعامبەتوۆ ايتتى, دەپ حابارلايدى Egemen.kz.
"بيىل قىلمىستىڭ نەگىزگى تۇرلەرى دەڭگەيىنىڭ تۇراقتى تومەندەۋى بايقالادى. ولاردىڭ قاتارىندا كىسى ءولتىرۋ, دەنساۋلىققا اۋىر زيان كەلتىرۋ, زورلىق, قاراقشىلىق, توناۋ, ۇرلىق, الاياقتىق, بۇزاقىلىق جانە كولىك ۇرلىعى سياقتى قىلمىس ءتۇرى بار", - دەدى دەپارتامەنت باسشىسى.
ايماقتا مال ۇرلىعىنىڭ دەڭگەيى 30%-عا ازايعان. وبلىستا بيىل تىركەلگەن 189 مال ۇرلىعىنىڭ 150-گە جۋىعى ورىستە قاراۋسىز جۇرگەن مالعا قاتىستى جاسالعان.
بەكەت ايماعامبەتوۆ پاتەر توناۋ قىلمىسىنىڭ دەڭگەيى 45%-عا تومەندەگەنىن ايتتى. سونىمەن قاتار بۇرىن سوتتالعان ادامدار جاساعان قىلمىستاردى ەداۋىر ازايعانى بايقالادى. جاسوسپىرىمدەر قىلمىسى مەن بالالارعا قاتىستى قىلمىستاردىڭ دا دەڭگەيى تومەندەگەن. ال قوعامدىق ورىنداردا جانە كوشەلەردە جاسالعان قىلمىستار 40%-عا ازايىپ وتىر.
"مۇنىڭ بارلىعى ءتيىمدى جۇرگىزىلىپ جاتقان قىلمىستىڭ الدىن الۋ شارالارىنا تىكەلەي بايلانىستى. بىرنەشە جىلدان بەرى وبلىستا تۇرعىن ۇيلەردىڭ اۋلالارىندا جاياۋ پاترۋلدەۋ تاجىريبەسى جالعاسۋدا. بيىل قىلمىستىڭ كوپتەگەن ءتۇرى, سونىڭ ىشىندە م ۇلىك ۇرلىعىنا قاتىستى قىلمىستاردىڭ اشىلۋ دەڭگەيى جاقساردى. اسا اۋىر قىلمىس تۇرلەرىنىڭ اشىلۋ دەڭگەيى دە ارتتى", - دەدى بەكەت ايماعامبەتوۆ.
سونىمەن قاتار بيىل وبلىستا ورىن العان قاراقشىلىق, بوپسالاۋ, بۇزاقىلىق, جاس بالالاردى ازعىندىققا يتەرمەلەۋ, كولىك ۇرلاۋ قىلمىستارى تولىق اشىلدى.