ماڭعىستاۋ وبلىسىندا 123 ءموبيلدى بريگادا جۇمىس ىستەيدى. ونىڭ 76-سى اقتاۋ قالاسىندا, 47-ءسى اۋداندارعا تيەسىلى. بۇل تۋرالى قوعامدىق كوممۋنيكاتسيا ورتالىعىندا وتكەن بريفينگتە ماڭعىستاۋ وبلىسى دەنساۋلىق ساقتاۋ باسقارماسى باسشىسىنىڭ ورىنباسارى ءلاززات ەسەنعاليەۆا ءمالىم ەتتى.
ونىڭ ايتۋىنشا, تۇرعىندار ءوزىن جايسىز سەزىنگەن جاعدايدا تىركەلگەن ەمحاناعا قوڭىراۋ شالىپ, ءموبيلدى بريگادانى شاقىرتا الادى. ارنايى توپ قاۋىپتى ۆيرۋستىڭ بەلگىلەرى جانە پنەۆمونيا بەلگىلەرى بار تۇرعىندار مەن سوزىلمالى اۋرۋلارى بار ناۋقاستارعا ۇيدەن قىزمەت كورسەتەدى. سونداي-اق جۇكتى ايەلدەر مەن بالالارعا پاتروناج جۇرگىزەدى.
«ماڭعىستاۋ وبلىسى بويىنشا 412 ينفەكتسيالىق توسەك ورىن بار. قوسىمشا رەانيماتسيالىق 54 توسەك ورىن جاساقتالدى. ال رەزەرۆتە 2 452 توسەك ورىن دايىن تۇر. وڭىردەگى ەپيدەميولوگيالىق جاعداي ناشارلاعان كەزدە قولدانىلاتىن بولادى», - دەدى ءلاززات ەسەنعاليەۆا.
ايتا كەتەيىك, 9 جەلتوقسان كۇنى وڭىردە «Covid-19» ينفەكتسياسىن جۇقتىرعان 9 ادام تىركەلدى. ونىڭ 7-ءى بۇرىن-سوندى ىندەتتى جۇقتىرعان ادامدارمەن جاقىن قارىم-قاتىناستا بولعان.